1. Oni penga pa gu gbegberẽ berã naadu rii gaMbori aboro yo. (Oni bi gu sura du ti tonatonaha.)

ROGO wiso sa, gu gbiamotumo nangia Arona aru barabangiri gubamburoko nangia ga irisomborina ũ zo guzuguzu fuõngua beko. Kora na gu gako aboro naadu 250 aru patiko na gayo aũ zo motumo a tipa ka zoho fu Yekova. (Geda 16:16-18) Ti tonatonaha, agi aboro re dunduko nangia airisimbori na ni ruruyo fu Yekova. Ono tie, agi aboro re angia gbegberẽẽ sino aboro na kini idi ka dia sunge gbiamotumo be Arona. (Geda 16:1-11) I anangi tiyo na gu berã nga Yekova nika ida aida na gayo irisombori. Ono gu gayo maabangirise re aadunga ni ruruhe bangiri Yekova te, mbiko ko nabi agu apai du kpoto aboro gbiati gu gbegberẽ berãpai du yo na ni.—Yere. 17:10.

2. Ginipai Moize aima fura tipaha, na ya mo gu afugo re ada nirengo?

² Mbata fu gu uru re,Moize aima ya: “Wiso Yekova ayugo gu ni nga gako ni.” (Geda 16:5) Nirengo, Yekova aima kparaka dagba agu aboro nangia ndikidi airisiko na aguyo nangia kungbo airawia ho ‘we akuru yo du Yekova ni ki riti gu 250 akumba naye na fuõngua.’ (Geda 16:35; 26:10) Ti kina gu bangisa regbo re, Yekova abanda raka Arona ka yugo na ni  nga ko nangia ndikidi boromotumo na ni ndikidi irisimbori.—Oni gedi 1 Akorindo 8:3.

3. (a) Gini ngbatungapai namangi ti regbo gu mokedi nangia Pauro? (b) Ginipai Yekova amangihe na agu aboro naasamungu bakuru kusayo?

³ Pai wa gure akuru berewe fuo bete agarã wa 1,500 kusa ti regbo gu mokedi nangia Pauro. Agu aboro aaya i nga aKristano atona ka yugo iraira yugopai; wa si avura duwo, i aakodatiyo kindi na gu dungurati nangia ga aKristano. Si nawira wa agi abasamungu kuti ndikidi pambori re aamanga tiyo wakina agu aboro naadu rogo dungurati. Agi aboro naabi apai taata re, gayo samungu adu ni kerepai fu ruru aKristano. Agi awaru naadu na kpoto akandoro tiyo re atona ka ‘ba ga aguyo idapase kusayo.’ (2 Tim. 2:16-18) Ono tie, ka Yekova aabi apai taata, ka Pauro aima ino gipai re nibi waiMbori amangipai kuti gu samungu nangia ga Kora na agu aboro nangbe na ko mbata kusayo. Nibi gipai re, ani bingo gupai du rogo Ziazia Kekeapai na ki bi gupai rengbe ani ka wirikaha behe.

4. Ginipai Pauro adu na kido tipaha, na wai ko ayugu gi gako kido re fu Timoteo?

⁴ Pauro aima inoho nga Yekova arengbanga ka ida na ziree irisombori te, na ko aima inoho a nga Yekova ima ino agu aboro nagiasangba ko. Pauro ayugu gako kido rogo agu afugo ga Mbori toro adu kugii ko ko kehe fu Timoteo. Fuo Pauro fura tipa gu imisiri agi abasamungu re aye na ni ku rogo dungurati, ko aya: “Gu nyanyaki mburupai nga ga Mbori naru kindi, ni gi dezire re nga, ‘Gbia ini agu yo nga gako yo,’ ‘agu yo nayamba rimo Gbia i gúari pati ingapai dunduko.’”—2 Tim. 2:18, 19.

5, 6. Gini nyanyakipa pai du ti agu afugo Pauro amangisunge na ni nga “gu nyanyaki mburupai nga ga Mbori,” na wai gipai re adu na sangbanaha kurii Timoteo?

⁵ Gini nyanyakipa pai du rogo agu afugo Pauro du rogo gi veresi re? Gere nga gu bangisa ba du gu fugo rogoho nga “gu nyanyaki mburupai nga ga Mbori.” Ziazia Kekeapai mangisunge na gu fugo nga “mburupai” ni masaku tipa dungu apai, kodihe na Yerusarema nangia ga aYisaraere bagbata. (Tam. 87:1, 2) Gupai Yesu amangihe tipa ga Yekova ringbisapai digisitihe si awa kina mburupai. (1 Kor. 3:11; 1 Pet. 2:6) Ginipai naadu berã Pauro yo ho ko akepai ni tipa “gu nyanyaki mburupai nga ga Mbori”?

⁶ Pauro afura tipa “gu nyanyaki mburupai nga ga Mbori” ti gu regbo ko afura tipa agu afugo Moize apehe fu Kora na agu aboro naangbe na ko du ni kekehe rogo Pa Geda Aboro 16:5. Pauro aafura tipa gupai namangi ti rago Moize re ka ngarasa Timoteo na ka tingida ko na pa gu tandu du Yekova na ni ka inopa gu samungu du kpoto aboro yo na ki ruguhe. Anga agu abasamungu naadu rogo dungurati aaida ka gbarasapa ga Yekova ringbisapai kinawai si adu tipa aguyo naadu ti rago Kora te. Pauro afuranga sirisiri tipa gupai “gu nyanyaki mburupai nga ga Mbori” arukubaha te. Ono tie, agu afugo Pauro amangisunge na ni re aima aundoTimoteo ko kido kuti agu agene Yekova amangapai ngbaha.

7. Tipagine rengbe ani ti ni kadu na kido nga Yekova amangapai amanga ni ruruhe?

⁷ Ga Yekova bangua arugute arengbanga ka aria tihe te.Atambuahe 33:11 naya: “Sangba Yekova naru ku baha waragoagira, agu aberã du kpotoko yo si fu rika ngbatunga aboro dunduko.” Gu kura averesi nafura tipa ga Yekova zogarago, weneringise, rurupai, gbiati hipai ni gbangaha. (Gate 15:18; Tam. 106:1; 112:9; 117:2)  Maraki 3:6 naya: “Mi nga Yekova mi asa nga pa re wa sa te.” Teketeke a, Yakoba 1:17 naya Yekova nga gu boro “adu nga na satise ti ko ya, na kirima satise a ya.”

8, 9. Ginipai rengbe ani ka wirikaha ti gu kpiapai du rogo fugo Pauro yo?

⁸ Agu afugo Pauro du rogo 2 Timoteo 2:19 nafura wa gu pangbanga keyo ho ti vuro he. Mbata kusayo, si aningia sino aboro ka kepai ti bambu tipa ka yugo gu boro naamehe watadu iraha. Pauro nangia bambata boro namangisunge na ngbatunga gi kpiapai re rogo gako kekeapai yo. * “Gu nyanyaki mburupai nga gaMbori” re na arogoyo ti ni ue. Ni bambataha, “Yekova ayugo gu ni nga gako ni” na uehe nga “agu yo nayamba rimo Gbia i gúari pati ingapai dunduko.” Gipai re natingida rani na gupai ani agedaha rogo Pa Geda Aboro 16:5.—Oni gedihe.

⁹ Ginipai rengbe ani ka wirikaha ti agi afugo Pauro re? Tipa ga Yekova aboro, agu apai nyakipaha bangiriko na gako bangua arugute i nagbiaha ku rogoho ue nga: (1) Yekova nakpinyemu agu aboro du ni ruruyo fuko, na (2) Yekova aidanga na iraira mangapai te. Gini ngbanya du dagba gipai re na gupai nabipa samungu rogo dungurati?

10. Wai gu mangapai nangia ga abasamungu afudi gu ruru aKristano naadu ti rago Pauro?

¹⁰ Si nawirawa Timoteo gbiati kura ruru aKristano adu na bakabangirise tipa gu mangapai nangia ga agu asamungu naadu dagbayo. Kura aKristano aima rengba ka sanahe tipa ndu gupai i ambu ngbatunga agu aboro re ti ni rogo dungurati. Si nawira wa kura ruru aKristano aasana tiyo asana singia Yekova aini gu kparakparapai naadu dagba ndikidi airisombori na agu airabiriki nangia abasamungu re.—Amo. 20:29, 30.

11, 12. Wai ga Pauro waraga angarasi ga Timoteo idapase?

¹¹ Nirengo, afugo Pauro aima ngarasa gaTimoteo idapasembiko si atingidi kona gupai Yekova amangihe fu Arona ho Yekova asogo Kora ni na agu aboro nasamungu kutiko na ki imiyo kusayo. Gupai Pauro aida ka pehe nga ka si vura du nga aboro kina dagbayo naya i nga aKristano, Yekova nika ino agu aboro aino nzunzu nga gako yo, a wa ko amangihe ti rago Moize.

¹² Yekova a_arianga sinoko te, si kina  kubaha. Ko aidanga iraira mangapai te, na ho da regbo ni beko, ko duwa ka ko saringbanga gu boro aidanga ka saberã ni ya. Wa Timoteo angia gu boro “nayamba rimo Gbia,” si atingidiko a na gupainga si naida ko sogo gu irairapai naaye be agu asamungu re. *

13. Gini kido si aida ani du na ni?

¹³ Anidunduko ima rengba ka gbia ngarasaro ti agi afugo Pauro re. Ni bambata pai, si nangarasa rani ka ino gupai nga Yekova ima inopai tipa padu ani ni ruru rani fuko. Anga kina kungbo ini’ini rani gbua inoko ho te. Kuba gure, Yekova na nyemu agu aboro nga gako yo. Ziazia Kekeapai naya: “Bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.” (2 Peka 16:9) Sidu tie, ani rengbe ka du na kido nga ka ani amanga apai fu Yekova “na wene sangba kpoto yo,” bangiriko agonga tirani te.—1 Tim. 1:5; 1 Kor. 15:58.

14. Gini ngbatunga irisombori Yekova aidanga na ni ya?

¹⁴ Si nangarasa rani a ka ino gupai nga Yekova arengbanga ka mbu agu aboro nasamungu ku rogo dungurati te. Wa duhe nga “bangiri Yekova naora koyo na kono auru kpotosende no dunduko,” ko ima ino agu aboro adunga “kpotoyo yo ziazia koyo du ko ni” ya. Asanza 3:32 naya: “Irakeretu nga kere gbegberẽ boro bangiri Yekova,” na ngbatunga agu aboro re namanga tiyo nga i nagiasangba Yekova baraho i amanga ingapaini ni gbuko. Ka si vura dungaboro biriki ima rengba ka nanga kura aboro, Yekova nga boro rurupai ima inoho nga “gu boro naoka gani tiandika ni aú nga te.”—Snz. 28:13; oni gedi 1 Timoteo 5:24; AEbere 4:13.

15. Ginipai si aida ani mbuhe, na tipagine?

¹⁵ Badungu airisi Yekova nairisoko ni ruruyo. Badungu aboro rogo dungurati a’asadanga ka irisombori rogo biriki ni wia te. Wa vura duhe wo, kangia pai wa gure anaamanga amanga ti rago Moize na ti rago agu aKristano naadumbata, si ima rengba ka manga areme a. (2 Tim. 3:1, 5) Ono tie, ya mo si naida ani nitiko kuti akuarani aKristano, kini bihe nga i ni ruruyo fu Yekova te? Wagusa te! Si adu furani ni gbegberẽ pai ani berẽ pa akuarani nga gbegberẽ apai kinaho i amangaha ni birĩ. (Oni gedi ARomo 14:10-12; 1 Akorindo 13:7.) Gu nyakipaha gbe nga, kangia sinorani du nga kaa tiko kuti akuarani nga i ni ruruyo te, si rengbe ka gbarasa rani rogo toro yo.

16. (a) Ginipai rengbe ani ni basasa ka mangaha tipa ka kusa gbegberẽ apai ngbaduraniyo? (b) Gini undo rengbe ani ka gbiaha ti gu sanduki nga  “Oni Wísigi Tironi . . . Oni Ásadi Tironi . . .”?

¹⁶ AKristano ni basasa si aida i ‘asadi kina gayo sunge.’ (Gara. 6:4) Mbiko gu ingapai du tirani, ani ima rengba ka tona ka iriso Yekova tipa gbegberẽ ndupai zanga ani inihe. (Eb. 3:12, 13) Si naida ani wisigi ndu gupai ani airiso Yekova ti ni ti aregbo dunduko. Si naida ani sana tirani nga: ‘Ya mo mi nairiso Yekova mbiko mi nakpinyemu ko na gako bakere pagbia? Watadu mi nairisoko gbua tipa kina gu weneapai nika manga fere Paradizo yo?’ (Yugo. 4:11) Nirengo, ani dunduko rengbe ka gbia undo ka aniwisigi gaanimangapai na kimangi ariapai ti gu gbegberẽ apai du ngbaduraniyo.

17, 18. Tipagine si aida ani du ti ni ni ruru rani rogo gaani irisombori fu Yekova?

¹⁷ Ka ani du ni ruru rani rogo gaani irisombori yo, ani nika gbia badungu amaku.  Bake papara Atambuahe aya: “Boro maku nga gu ni Yekova ageda nga irairapai kuti ni ya, nga gu ni adu nga na biriki ti toroni a ya.” (Tam. 32:2) Nirengo, agu aboro nakusa biriki kusayo kpotoyo yo i na ngbarago, na i nika gbia bakere ngbarago rogo gu raka nika du ku mbatayo.

¹⁸ Wa du rago re, Yekova nika kusa agu aboro akusa namanga ingapai ni gbuko kuyangura, na ki “kparaka dagba rurupai na gbegberẽ pai, na dagba gu boro namanga pa Mbori na gu boro amanga nga pa ko ya.” (Mara. 3:18) Sidu, si nangarasa rani ka ino gupai nga, “bangiri Gbia du fuo ruru aboro, na tuko ni haha ha tipa gayo akpe.”—1 Pet. 3:12.