“Agu yo nayamba rimo Gbia i gúari pati ingapai dunduko.”2 TIM. 2:19.

1. Gine nyakipa ha rogo gaani irisombori yo?

YA MO mo abingo gu rimo nga Yekova ni kekehe ti vuro bambu watadu ti vuro kurahe? Nirengo, mo aima du na ngbarago ka bihe ti gu regbo re. Rimo Mbori na nyanyakipa ha rogo gaani irisombori yo wangia ani aDezire Yekova. Rogo zegino dunduko, badona ho nga ga aboro du na rimo Mbori riyo wa ani te. Ono wa vura duhe wo, ani ima inoho nga taatapai ngaha kadu na rimo Mbori rirani te.

2. Padu ani na rimo Mbori rirani naye na gini ngbatunga tindiro furani?

2 Anga pa manga ani sunge na rimo Mbori nisaha nasa gupai nga Yekova inipai furani te. Si naida ani raki ringbisihe kuti gako arugute du tipa ruru mangaapai. Si du nga ndu gupai Ziazia Kekeapai atingida rani ti ni nga si naida ga Yekova aboro “gúari pati gbigbitapai.” (Tam. 34:14) Gu mokedi nangia Pauro afura tipa gipai re ziazia ho ko aya ni wẽ: “Agu yo nayamba rimoGbia i gúari pati ingapai dunduko.” (Oni gedi 2 Timoteo 2:19.) Wangia ani aDezire Yekova, aboro ima inoho nga ani ninaayamba rimo Yekova. Ono wai rengbe ani ka guari pati ingapai?

 “ONI GÚARI PATI” GBEGBERẼPAI

3, 4. Gini veresi wene abainipai tipa Ziazia Kekeapai adigi nisakipai tipaha, na tipagine?

3 Ani bingo gupai nasa Pauro ko pe agu afugoko du rogo 2 Timoteo 2:19. Gi veresi re nafura tipa “gu nyanyaki mburupai nga ga Mbori,” fuani ko afura tipa gupai naaduni kekehe ti vuro gunyanyaki mburupai re. Bambataha naya, “Gbia ini agu yo nga gako yo,” si teketeke kinawai duhe rogo Pa Geda Aboro 16:5. (Oni bi gu kekeapai ye mbata fu gere.) Gu uehe nga, “agu yo nayamba rimo Gbia i gúari pati ingapai dunduko,” na dungu wene abainipai tipa Ziazia Kekeapai aima digo nifura tipaha. Tipagine?

4 Agu afugo Pauro re nayugo gupai nga ko adi agi apai re rogo kura waraga kia. Ono tie, ba ho rogo Kuru Ndika nayugo gupai nga Pauro adi agi apai re rogoho te. Sidu, ginipai gu mokedi re aaida ka pehe ho ko aya ni wẽ: “Agu yo nayamba rimo Gbia i gúari pati ingapai dunduko”? Fuo Pauro pe gipai re nibasa, ko arogodi apai rogo akapita 16 rogo Pa Geda Aboro nafura tipa gu samungu nangia ga Kora. Yamo gu ue pai ko apehe rengbe kadu nga si nabipa kina gu samungu re?

5-7. Ginipai namangi ti rago Moize Pauro afura tipaha rogo 2 Timoteo 2:19? (Oni bi gu sura du ti tonatonaha.)

5 Ziazia Kekeapai naya Datana na Abirama nangia awiiri Eriaba akoditiyo na Kora ni abangbasia abasamungu kuti aMoize na Arona. (Geda 16:1-5) I airisango Moize te, na i aaidanga kuti gu pagbia Mbori afuhe fuko a te. Agu abasamungu re aasungo kina dagba ga Mbori aboro na kini moi gu idapase nga agu aboro naadu ni ruruyo fu Mbori ngbapai. Ho regbo ada ni be Yekova ko yugu kparakparapai dagba agu aboro naadu ni ruru airisiko na abasamungu, ko ape gupai fuyo na adunga ni mbumbupai tipa ka mangaha ya.

6 Gu pangbanga re naya: “Yekova ki ya fu Mose, ‘Mo gúmba pai fu rimbasa, ki ya, Oni gúari pati ga Kora baraka, na ga Datana, na ga Abirama.’ Mose ki guari ki ndu koyo du aDatana ni na Abirama; ga awiri aYisaraere abaakumba ki nipeke ko. Ko ki ya fu rimbasa, ‘Mi nakpara fu roni, oni gúari pati gu bamburoko nga ga gi gbegberẽ aboro re, ka oni zádi nga he nga gayo ya, i ka roga roni ku sa yo wa sa na gayo ngapai.’ Sidu, i ki gbandaka yo pati ga Kora baraka, na ga Datana, na ga Abirama.” (Geda 16:23-27) Yekova ki imi agu aboro dunduko naasamungu kusayo. Tipa gu airisi Yekova naadu ni ruruyo fuko, ko abatasi ungayo ti gu regbo i aguari pati gbegberẽpai.

7 Yekova ima ino gupai du kpoto aboro yo. Ko ima ino agu aboro du ni ruruyo fuko.Wa vura duhe wo, si naida agu aboro du ni ruruyo fuko mangipai amanga nga ka kparatiyo ti gbegberẽ aboro. Si taata tie ani ya Pauro afura tipa gu pangbanga du rogo Pa Geda Aboro 16:5, 23-27 ho ko aya ni wẽ: “Agu yo nayamba rimo Gbia i gúari pati ingapai dunduko.” Gupai ko apehe re na ngbanya na agu afugo naya: “Gbia ini agu yo nga gako yo.”2 Tim. 2:19.

MO NE “MUMUNGO SAKAPAI NAZANGA INAHE”

8. Tipagine kungbo mangasunge na rimo Yekova watadu kungbo du rogo dungurati arengbanga ti ni ka undo boro ya?

8 Pa fura Pauro tipa agu apai namangi ti rago Moize nayugo gupai nga ko aatingida Timoteo nga ko mangipai amanga tipa ka banda gako wene pagume na Yekova. Anga padu ko gbua rogo dungurati si aaidaha beko te, a wa kungbo yamba rimo Yekova aarengbanga ka batasa agu  abasamungu naadu ti rago Moize ya. Ndikidi airisimbori duwa ka i gúari pati ingapai. Ginipai Timoteo awirikihe ti gipai re? Na ginipai rengbe ga Yekova aboro areme ka wirikaha ti agu afugo ga Mbori toro adu kugii Pauro ko kekehe re?

9. Wai “mumungo sakapai nazanga inahe” agbarasipa gu dungurati nga ga aKristano naadu mbata?

9 Fugo Mbori ima fu arugute tipa gu ngbatunga gbegberẽ apai si aida aKristano sogoho. Ni kpiapai, gu kura averesi i adi 2 Timoteo 2:19 dagbaha, Pauro aya fu Timoteo wẽ ngbanga ‘ti kango mbiko afugo’ te, na ko “né kungba fura bau.” (Oni gedi 2 Timoteo 2:14, 16, 23.) Kura aboro rogo dungurati atona ka yugo iraira yugopai. Na berewe a, aguyo atona ka kusa agu aberãpai naye na kparakaro. Ka si vura du nga gi ngbatunga aberãpai re angia agu apai Ziazia Kekeapai asoganga ha ya, si aye na kparakaro dagba aboro. Si aye na papaya, tikango, na ka aboro adunga wenengai rogo toro yo ya. Si du Pauro anyakasipai ti ni nga i ne “mumungo sakapai nazanga inahe.”

10. Ginipai si aida ani mangihe ho ani nagbiatirani ni na abasamungu?

10 Ga Yekova aboro agbianga tiyo areme na abasamungu kuti ndikidi pambori dedede rogo dungurati te. Wa vura duhe wo, ka ani gbiatirani na gu yugopai adunga kuti gu nga ga Ziazia Kekeapai ya, ka si vura du nga ani gbiahawari, si naida ani sogoho asoga. Gbegberẽpai du ngaha furani ka sakapai na abasamungu, singia ka sungo na yo rogo ba sa, keka awaraga fuyo, watadu kaa fura na yo ngba kura agene. Ka si vura du nga ani naida ka undo ni, gu ngbatunga sakapai re andunga sa na gupai ani nawisigihe rogo Ziazia Kekeapai te. Kurigure, wangia ani ga Yekova aboro, ani aidanga ka kodatirani na abasamungu te.

Oni bandatironi ti sakapai na abasamungu kuti ndikidi pambori (Oni bi genewaraga 10)

11. Ginipai rengbe ka kusa “mumungo sakapai,” na wai rengbe agu aKristano nga abaakumba ka maa wene kpiapai?

11 Gu kura apai kinaho berewe rengbe ka gbarasa gu zereda du rogo dungurati kupati gu nga ga abasamungu re. Ni kpiapai, agu abipai du aboro na ni ni bakiakia tipa aũngbarago rengbe ka kusa mumungo sakapai nazanga inahe.” Kina rengo ngaha nga, ho boro angi agu ambaro ni nakuo ga Yekova arugute du tipa ruru mangaapai, si naida abaakumba rugu ni tipa ka ni yengo na kpakarapai ya. (Tam. 11:5; Ef. 5:3-5) Onowa vura duhewo, si aidanga abaakumba moi gayo aberãpai te. I mangipai ringbisihe na agu arugute du fu ababiapai rogo Ziazia Kekeapai naya: “Oni mbú ti ga Mbori rimbasa akandoro du dagba roni, . . . Ka oni dú nga ni abazogo agu yo i aasia payo fu roni ya, ono oni dú ni kpiahe fu rimbasa akandoro.”1 Pet. 5:2, 3; oni gedi 2 Akorindo 1:24.

12, 13. (a) Gini bipai du aDezire Yekova na ni nibipa sia aũngbarago, na gini bangua arugute nga ga Ziazia Kekeapai du tipaha? (b) Gu bangua arugute saki ani pai tipaha rogo genewaraga 12, wai si abipa dungu agu pai du tipa gaani raka?

12 Nibi gupai du tipa aũngbarago, gaani riigbu arũngo andiko tipa gu ngbatunga avidio, ambaro, abuku, watadu agu abia si aida ani bandatirani ti ni te. Tipagine? Mbiko Ziazia Kekeapai nangarasa aboro ni basasa i raba “gayo berã nga ga makiapai . . . ka kpara rurupai kusayo ti irairapai.” (Eb. 5:14, NW) Ziazia Kekeapai na bangua arugute rogoho rengbe aKristano ka mangasunge na ni ho i asia aũngbarago ni. Rogo agu abangiriaba nga ga raka, si naida gaani sasa du nga ka ‘kpária pa gu he ngba ti Gbia.’ (Ef. 5:10) Ziazia Kekeapai naya abariikporo na pagbia beyo, sidu, si aidanga i nimbu gayo aborokporo i niye na gu ngbatunga  aũngbarago angbanga ya te. *1 Kor. 11:3; Ef. 6:1-4.

13 Gu bangua arugute nga ga Ziazia Kekeapai saki ani pai tipaha kuari re, si tipa kina aũngbarago sa te. Agu apai du tipa mbakadatise na votise, kaza na riahe, na gu kura apai ima rengba ka kusa kpakarapai. Sidu, ka si du nga pai ho nakuo agu arugute du rogo Ziazia Kekeapai te, ga Yekova aboro nabanda tiyo ti tikango riipa ngbatunga apai wa gure mbiko ‘ga Gbia moyambu atanga kpata te, ono ni ni bayee ni fu aboro dũ.’2 Tim. 2:24.

ONI BANDATIRONI TI GBEGBERẼ KODATISE

14. Gini kpiapai Pauro amangisunge na ni tipa ani bandatirani ti gbegberẽ kodatise?

14 Gini kura gene rengbe agu aboro ‘nayamba rimo Gbia ka gúari pati ingapai’ ngbaha? I rengbe ka mangaha ni zanga kodayo tiyo na agu aboro namanga gbegberẽ apai. Fuo Pauro fura tipa gi gako kpiapai du tipa gu “nyanyaki mburupai nga ga Mbori” re, ko ape gu kura kpiapai berewe. Ko afura tipa “bakere bambu” du na “aũsunge ni kina dahabu na feda sa te, ono ga ngua na pere a; gu sa irisa, kura ha sa irisa te.” (2 Tim. 2:20, 21) Fuani, ko arugu aKristano i ‘girisi tiyo’ watadu i kparatiyo ti agu aũsunge i amanganga sunge na ni “sa irisa” ya.

15, 16. Ginipai ani awirikaha be gu kpiapai nga ga “bakere bambu”?

15 Rogo gu kpiapai re yo nga gine? Pauro amangisunge namasaku tipa ka ringbisa gu dungurati nga ga aKristano kuti “bakere bambu,” na agu aboro du rogo dungurati nga “aũsunge,” watadu aũkporo. Rogo kporo, gu kura aũsunge kinaho rengbe arengba ka gberã be akuraha watadu be zanga ino mangasunge na ni. Irakporo nakpara ngbatunga he wa gure kusayo ti agu akuraha du ni wenehe, gbe ka si du nga i naapasa riahe rogoho.

16 Wakina gure a, ga Yekova aboro namanga ome tipa ka raka gigiri raka, na kini mangi ome ka zanga kodatiyo na agu aboro du rogo dungurati nye kuti kuo ga  Yekova arugute du tipa ruru mangaapai. (Oni gedi 1 AKorindo 15:33.) Kangia rengo du nga aboro kina rogo dungurati namangapai wa gure, si naida ani du na bakere rubangirise ki ‘kpara’ tirani ti kodatise na agu aboro du zegiyo mbiko badunguyo nga ‘airakpinyemumarã, abasasangba avunguyo, airazanga ziaziapai, airasoapai, airaerã, akpinga nyemu wenepai ya, airabiriki, na ni akpinyemu sangba borose susi nyemu Mbori.’2 Tim. 3:1-5.

YEKOVA NAFU MAKU AFU KURII GAANI DU NI RURUSE

17. Ginipai ruru aYisaraere amangihe ka zanga rimiso tiyo ku rogo gbegberẽpai?

17 Ziazia Kekeapai nafura tipa wai aYisaraere amangipai ni ruruyo ho Mbori aya ni fuyo wẽ, “oni gúari pati ga aKora baraka, na ga Datana, na ga Abirama.” Gu pangbanga re naya “i ki gbandaka.” (Geda 16:24, 27) I amangipai niipo kuti gupai i agumbaha fuyo. Ziazia Kekeapai nayugo gupai nga i adegetuyo kuti gupai i agihe na ki guari ho nibasa zanga keesa. Gu ruru aboro naadu ho, i aaidanga gbegberẽpai mangiyo te. I adu na giasangba. I asongodi Yekova kuba songoda gbegberẽpai. Ginipai ani awirikaha ti gipai re?

18. Ginipai Pauro aaida ka pehe ho ko arugu Timoteo ni ko “óro be ga paranga gbegberẽ nyemuahe”?

18 Ho daha ni nga si naida ani banda gaani pagume na Yekova, si naida ani mangipai niipo zanga keesa. Gere nangia gupai Pauro aida ka pehe fu Timoteo ho ko aya ni fukowẽ,mo ‘óro be ga paranga gbegberẽ nyemuahe.’ (2 Tim. 2:22) Ti gu regbo ko ape gipai re, Timoteo aima duho ni ngangara paranga kumba, na si nawirawa garãko adu wa 30. Ono tie, gu gbegberẽ ‘nyemuahe nga ga paranga’ si abingo pa garã boro te. Si adu nga ka Timoteo gbiatiko na ngbatunga nyemupai wa gure, ko “óro” behe. Ka pepai ngba kura gene, si aaida Timoteo “gúari pati ingapai.” Yesu apepai wa gure ho ko aya ni wẽ: “Singia bangiro ka mangi ro mo koto, mo ki mo ho amo.” (Mt. 18:9) Areme, agu aKristano namangapai kuti agi arugute re i anginga mbaro na agu apai rengbe ka gbarasapa yo rogo toro yo te.

19. Wai kura aboro namangi ome tipa ka bandatiyo ti agu apai rengbe ka gbarasayo rogo toro yo?

19 Agu aboro naadu na kpakarapai tipa mbirabuda mbata fu i da ni aDezire Yekova, i ima diaberã ka zanga mbiraha berewe. Agu akurayo ima mbu gu kura ngbatunga aũngbarago i nabihe nga si ima rengba ka gbarasapa gu rurumangapai du tiyo wa vura duhe nga Ziazia Kekeapai azangahe tipaha te. (Tam. 101:3) Ni kpiapai, kura wirinarani adu na ngbarago tipa kaa do gu ngbatunga gbere naadu ni wasiwasihe. Ono fuo kowiriki rengo, ko adiberã nga ko aidanga ka do guhe nga gbere kandara dagba aDezire Yekova te, mbiko si ima rengba ka zingisa nyemu gu gbegberẽ dogbere naadu mbata tiko. Kina rengo du ngaha nga, Ziazia Kekeapai azanga aKristano ti mbirabuda, dogbere, watadu gu kura apai nga gu agberãnga ya te. Ono tie, si naida animangi ome amanga tipa ka bandatirani be agu apai rengbe ka maa gaani idapase ngbapai yo.

20. Wa vura duhe nga taatapai ngaha tipa ka “gúari pati ingapai” te, ginihe nafu wasa furani na kido?

20 Padu ani na rimo mbori rirani nga taatapai gbua te. Si naida ani “gúari pati ingapai” na ki “gúari pati gbigbitapai.” (Tam. 34:14) Nirengo, taatapai ngaha tipa kaa manga gipai re dedede te. Nairiwo gu ngbarago du ani na ni ka ino gupai nga Yekova nikaa kpinyemu “agu yo nga gako yo” dedede gbiati agu aboro nandu ngba gako agene du ni ruruhe.2 Tim. 2:19; oni gedi 2 Pekapai 16:9a.

^ genewaraga 12 See the jw.org article “Do You Ban Certain Movies, Books, or Songs?” under ABOUT US > FREQUENTLY ASKED QUESTIONS.