Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Banzinga 2017

Waigu Rengbe Ani ka Ngana Kura Apai Susi Kungbo Ngbanya Kpotose?

Waigu Rengbe Ani ka Ngana Kura Apai Susi Kungbo Ngbanya Kpotose?

DON nga boro sa dagba aDezire Yekova Kanada yo namanga asadatise kaa fura na agu aboro naraka bangiri agene. Don afura tipa boro sa dagba gi ngbatunga aboro re yo ki ya: “Kumba kpuko aadunga ti ni ya naana raka bangirigene rimoko angia Peter angia gu yangara birikobiriko boro mi abi ni. Bibi ko aima gberã ni kerehe na ko anaado aboro ado kusayo tiko. Ko aima ká gu undo nga ga aboro bara dunguhe.” Ono wa si avura duwo, tipa agarã naima susa 14, Don amangi ome na zerangbaduse ka yugo weneringise fu gi kumba kpuko aadunga ti ni re ya.

Rogo gu kura uru sa, Peter asana Don nga: “Tipagine mo agberesa gamo regbo ti ni na mi? Aboro dunduko aima mbure nisare. Tipagine mo aberãpa re ti ni? Don amangisunge na averesi biata rogo birĩ yo tipa ka zio ngbadu Peter yo. Bambatapai nga, ko asana Peter singia ko ini gupai nga Mbori na kina ndikidi rimoko ti ni na ko ki ya fuko ko gedihe kina boro rogo Ziazia Kekeapai yo rogo Atambuahe 83:18. Fuani tipa Don yugu gu ndupai fu Peter ko aaberãpa ko ti ni, ko asana Peter ko gedi ARomo 10:13, 14 nga gu nape gupai nga “gu ni ka kpari ni rimo Gbia ni bati abata.” Ni yangaraha, Don ki gedi Matayo 9:​36 na ki sana Peter ko gedihe fu tiko. Gu veresi re naya: “Ho [Yesu] abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.” Ho Peter agedihe ni, ko ki ta kpara akpara ni sanahe nga: “Ya mo mi nga boro sa dagba agi akandoro re?”

Peter ki tona ka manga ariapai. Ko ambidi ime, ki mbakadi maingbako, na ki vo gu wene roko Don afuhe fuko. Peter andu kumbatayo kaa nye ni gigiri ko.

Wiri buku adu kina be Peter ko anaakeka gako apai rogoho. Agu apai ko aakekaha ti tonatona gako waraga adu na kina pa gberãrago rogoho, ono agu apai ko atona ka kekaha barambeda adu kia. Pai sa ko akehe aya: “Mi wirikipai areme tipa rimo Mbori. Awere, ho mi nikaa kpara ni, mi nikaa kpara fu Yekova. Si ima ngba ka ino rimoko. Don aya Yekova rengbe arengba kadu nga Bakureami, gu boro rengbe ka degatuni fere ti  aregbo dunduko ka si vura du kina ti gini regbo vurũ na tipagine vurũ.”

Peter ake yangara afugoko fu awirinako. Ko akepai nga:

“Ngbanga kpotore areme te. Mi nabihe nga gbinza ima da tire. Ono ka si vura du vurũ nga gimi yangara uru du areme, mi ima inoho nga mi abi bakureami abi [nga Don] Paradizo yo. Ka oni ageda gipai re, mi ti ni berewe te. Ono ka oni bi kumba kporokpiore yo nga guko oni ainongo ko ya, oni fura na ko, na mi nahõpai beroni, oni gedi gi tooni buku re [Ko aafura tipa gu buku i aawisigo Ziazia Kekeapai rogoho nga “The Truth That Leads to Eternal Life” nga gu ko agbiaha agarã kusayo mbata]. * Si nape gupai nga mi abi bakureami abi berewe Paradizo yo. Mi ima ida kuti gupai re na kpotoreyo dunduko. Wirinaroni kpinyemu roni gbe nga, Peter.”

Tingbafuo kpio Peter, dawiriko nga Ummi aya: “He wa agarã ue kusayo, Peter agbia gene ka fura na mi. Gure nangia gu bambata regbo vuru badungu agarã yo ko adu na ngbarago rogoho. Zavura ko ki momu.” Ri agumba gupai fu Don nga: “Mi du wa ka mi gedi gu buku re, mbiko ai guhe rengbe ka zio ngbadu kawire yo nga kparakpara he.” Ummi aidi a ka wisigo gu buku na boro sa dagba aDezire Yekova yo nakuru barambeda nga Gini Apai Nzunzu Ziazia Kekeapai Ayugoho?

Ani ima rengba a ka zanga maaberã rani kina fuo bibi boro, ka yugo ndikidi nyemuse, na kadu na zerangbaduse na ngbatunga aboro dunduko. (1 Tim. 2:​3, 4) Wa ani kaa mangaha wo, ani rengbe ka fõngbadu agu aboro yo du wakina Peter nga aguyo angbanga bibi yo ti aboro ya ono du na wene ngbaduyo yo. Ani ima rengba kadu na gu kido nga Mbori nga guko “nangera ku kpoto aboro yo,” nika sa rengo si sono ngbadu agu aboro yo du na nyemuhe.​—1 Sam. 16:7; Yo. 6:​44.

^ genewaraga 7 ADezire Yekova nakusi gu buku re, ono i aima mbu kusaha.