Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri (Gu du Tipa Dungurati)  |  Banzinga 2017

Oni Moi Bangironi Fuo Gupai Nyakipaha Gbe

Oni Moi Bangironi Fuo Gupai Nyakipaha Gbe

“I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.”​—Tam. 83:18.

ABIA: 46, 16

1, 2. (a) Gini nyanyakipa pai nabi ngbatunga aboro dunduko? (b) Wai du nyakipa bi ani gu pai re na nyanyakipaha?

TIPA badungu aboro areme, guhe i abihe na nyanyakipaha gbe nga marã. I namaa berãyo tipa kina dungura aũkumuko watadu kakuti agu ahe du beyo. Tipa kura aboro, aborokporo, padu wenengai ti kpotose, watadu agu apai du boro na diabese rogoho nga agu apai i abihe nga si nyakipaha kisusi.

2 Ono tie, gu nyanyakipa pai gbe nabi rani dunduko nga pa dia gbarasarimo kusayo ti ga Yekova bakere pagbia. Si naida ani banda tirani tipa ka bangirani gonga ti gi nyanyakipa pai re ya. Wai du rengbe bangirani ka go ti ni? Ani ima rengba kaa maa bangirani gbe tipa kina agu apai nga ga raka, bangirani kini go ti wai nzunzu nyakipa dia gbarasarimo kusayo ti ga Yekova bakere pagbia. Watadu ani rengbe ka mbu gu dungu fudifudiapai ani agbia tirani na ni si sarani ani mbu berẽpa gu nyanyakipa pai re. Ono ka ani aabi pa dia gbarasarimo kusayo ti ga Yekova bakere pagbia na nyanyakipaha, ani nika du na rengba ka sovura kuti agu akpakarapai ani agbia tirani na ni na aʹuru dunduko. Na si nika sarani a ani mbedi na Yekova wenengai.

TIPAGINE NYAKIPAHA TI NI GBE?

3. Gini apai Satana akusihe nibipa ga Mbori zogarago?

3 Gu mangapai nga ga Satana Bakitingbanga adu wai ka i ya Yekova  amanganga pai na gako bakere pagbia ngba ruru gene te. Ko aya ga Mbori zogarago ni gbegberẽhe na Yekova naká na wene apai be agu aboro ko akusi yo. Ringbisihe kuti Bakitingbanga, aboro arengbe kadu na bakere ngbarago kidu wenengai ka si adu nga i nazoga tiyo. (Bam. P. 3:1-5) A wa tiiworo fugo Satana aayugoho, ko aya boro ho du ni ruru ni fu Mbori kpotoniyo te, na ai boro rengbe ka ká ga Yekova zogarago ka ni du rogo kere fudifudipai. (Eyo. 2:4, 5) Ringbisihe kuti ga Bakitingbanga soapai, Yekova nambu regbo tipa agu apai aboro asusa rogoho yugu gu rengo du tipa raka tii gu zogarago angianga ga Mbori ya.

4. Tipagine si aida i rugusi gupai arugusa ti ni nga ga bakere pagbia?

4 Rengo ngaha nga, Yekova ima inoho nga agu apai Bakitingbanga apekehe tipa ko re nga zire. Tipagine Mbori nasia ka mbu gi pai re ti ni si niindu kumbatayo, kini mbu regbo fu Satana ko asadi ka yugo gako pai ni rengo? Karagapai kuti gu sanahe re nakoda aboro gbiati amaraika dunduko. (Oni gedi Atambuahe 83:18.) Gu kurapai berewe nga, gu bambata arogotise Mbori ambakadi yo aká ga Yekova zogarago, na kina gu bangisa pai re dungu kura aboro adigi nimangihe da ku areme. Gipai re ima rengba ka sa kura aboro i nibakibangiriyo singia ga Bakitingbanga pai aduadu ni rengo. Wadu he nga gupai re ata runga berã aboro yo watadu amaraika te, zangagiatise nika du kindi dagba rikaaboro, angbatunga aboro, aborokporo gbiati aboro dunduko ni basasa. Ono ho i nika dia gbarasa rimo ni kusayo ti ga Yekova bakere pagbia, aboro dunduko nika du kutii bee gako ruru zogarago nyeanye kindi. Zereda nika karaga tihe ku rogo zegino dunduko.​—Ef. 1:​9, 10.

5. Gaani bangiriba nga gine nibipa songoda gupai du tipa ga Yekova bakere pagbia?

5 I nika dia gbarasa rimo adia kusayo ti ga Mbori bakere pagbia na gu zogarago nga ga Satana gbiati ga aboro nika ti ati na i nika gbarasaha agbarasa kusayo. Ga Mbori zogarago vurube gu Kindo Nga ga Masiya nika duadu na diabese, na ti gu regbo re, agu aboro nakakuti ruru mangaapai aima yugoho nga aboro ima rengba ka ngbe na ga Mbori zogarago. (Yes. 45:23, 24) Ya mo mo naida kadu dagba agu aboro naka kuti ruru mangaapai kidu ni agu aboro nasongoda gu bakere pagbia nga ga Yekova? Zanga kapa, mo naida aida kadu dagbayo. Tipa kadu ni agu aboro nakakuti ruru mangaapai, si naida ani moi bangirani kuti gu nyanyakipa pai re na ki gi rogo wai yo nyakipaha nzunzu.

DIA GBARASA RIMO KUSAYO NYAKIPAHA KISUSI GAANI BATA

6. Wai du nyakipa dia gbarasa rimo kusayo ti ga Yekova bakere pagbia?

6 A wa ani nibihe, dia gbarasa rimo kusayo ti ga Yekova bakere pagbia nga gu nyanyakipa pai gbe nakoda ngbatunga aboro dunduko. Paha ima nyakaha kisusi gu ngbarago nga ga ai boro. Ya mo gu rengo re nayugo gupai nga nyakingo pa gaani bata te watadu Yekova aberãnga parani nzunzu te? Wagusa te. Tipagine adunga ha ti ni wo ya?

7, 8. Tipagine du dia gbarasa rimo kusayo ti ga Mbori bakere pagbia akoda pa digiso gako akidohe ti ni?

7 Yekova ima kpinyemu ngbatunga aboro dunduko na ko nabiyo na nyanyakipa yo. Ko aidi ka mangasunge na kure Wiriko tipa ani du na rengba ka gbia nyenye bata. (Yo. 3:​16; 1 Yo. 4:9) Ka Yekova aadigisongo gako akidohe ya, ka Bakitingbanga ayambu Mbori nga irazire nga ko nga gu boro naka na weneapai be aboro na kini zogo yo ngba gbegberẽ gene. Ka si ayugu gupai ayugoho a nga rengo du asogo rengo ni naapehe nga: “Wari du gu kidohe ni tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.” (2 Pet. 3:​3, 4) Sidu, Yekova nika ida gupai nga dia gbarasa rimo kusayo ti gako bakere pagbia kodi bata nga ga aboro giasangba! (Oni gedi Yesaya 55:10, 11.) Kurigure, ga Yekova nyemuse nayugo pa wai  du gako bakere pagbia. Sidu, ani rengbe arengba kadu na kido nga ko nikaa kpinyemu gako ruru amoyambu, kini biyo na nyanyaki payo ti aregbo dunduko.​—Gate 34:6.

8 Ho ani aida ni kuti gupai nga ga Yekova bakere pagbia na nyanyakipaha gbe, ani abingo pa gaani bata na paha kusende te watadu si ayugongo gupai nga parani anyakanga bangiri Mbori te te. Gu pai gbua ani amangaha nga ani na ruru bipai ni maa ani ga Yekova bakere pagbia gbiati gaani bata rogo gaha ndikidi bangiriaba. Gu ruru bipai re na nyanyakipaha ka ani aida ka maa bangirani fuo gipai du nyakipaha kisusi re na ki ngbe na ga Yekova ruru zogarago.

GUPAI ANI AWIRIKAHA T I DU NA RURU BIPAI

9. Ginipai Satana apehe nibipa Eyobo? (Oni bi gu sura duti tonatonaha.)

9 Gupai si aida ani du na ruru bipai ti ni ni kekehe rogo gu kitabu nga ga Eyobo, nga kitabu sa dagba agu akitabu nga ga Ziazia Kekeapai i akehe bakuru kusayo. Yo nga ni re, ani nawirikapa gupai Satana apehe nga ka i rungosi Eyobo ni kerehe, ko nambu Mbori kindi. Satana afu gu berãpai fu Mbori nga kinako nitiko rungosi Eyobo. Yekova aamanganga ha wo te, ono ko ambu Satana ko asadi Eyobo, ni ya ko fu Satana: “Agu ahe dunduko du be ko si kina tii be ro.” (Oni gedi Eyobo 1:​7-​12.) Vuru wiri umba regbo yo, ga Eyobo amoyambu, gbiati awiriko bawe ko akpinyemuyo gbe akpiki, na pa agu ahe naasongoda raka ko ki gberẽ dunduko. Satana amangi gipai re rogo gu gene yo naangera wa ka i ya Mbori du nitiko naaye na agu arungo re kuti Eyobo. (Eyo. 1:​13-​19) Fuo gure, Satana aukadi Eyobo na kere kaza. (Eyo. 2:7) Gako imisiri akii kina kumbatayo be gu gbegberẽ afugo nangia ga diako gbiati agu akumba biata namangi tiyo nga i angia wene abakureako.​—Eyo. 2:9; 3:​11; 16:2.

10. (a) Ginipai Eyobo amangihe nga gu nayugu pa gako kakuti ruru mangaapai fu Mbori? (b) Rogo gini gene ko aye kadu na wiri iraira bipai?

10 Sangbana gupai Satana agumbaha angia gine? Ga Satana pai aima yugoho tihe ni zire. Eyobo aká ka sa giiko na Mbori. (Eyo. 27:5) Ono tie, Eyobo aima ye kadu na wiri iraira bipai tipa bete regbo. Ko atona kaa berã kina pa wai ko adu ni ruruko, zavura kini idi ka ino ndu gupai ko aarungo ti ni. (Eyo. 7:​20; 13:24) Ani ima rengba ka berãha nga ga Eyobo pai aruaru nibipa agu arungosiro ko aandu rogoho. Ono tie, Mbori abi gupai nga si naida ko rugu ga Eyobo berãpai arugaha. Ginipai Yekova agumbaha fuko?

11, 12. Ginipai Yekova aundo Eyobo ko rugutiko na ni, na wai du Eyobo amangipai kutini?

11 Akapita biama rogo gu kitabu nga ga Eyobo hi be afugo Yekova fu Eyobo, tona ti kapita 38 kuti 41. Ba ho ani abi gupai rogoho nga Mbori ape ndu gupai nzunzu fu Eyobo ko aarungo ti ni te. Gu memepai naadu rogo afugo  Yekova yo angianga ka sakarogo ndu gupai yo ko aarungo ti ni te, si du wa ka i ya Mbori naida ka rugusa gupai bangiri Eyobo nga ko naarungosi ko te te. Kuba gure, Yekova aaida ka undo Eyobo ko ini pa wai pako adu kusende ti Mbori du ni bakere ko. Na ko aundo Eyobo ko bi gupai nga kura nyanyakipa apai kinaho si aaida Eyobo naabaka bangiriko tipaha. (Oni gedi Eyobo 38:18-​21.) Gipai re aundo Eyobo ko ye kadu na ruru bipai berewe.

12 Ya mo Yekova angia kere iigirã boro ka fu gu ngbatunga rugute re fu Eyobo, nga guko naima hi kere fudifudiapai? Mbori angianga kere boro te, na Eyobo aaberãnga ha wo a te. Wa Eyobo avura du rogo kere arungosiro vurũ, ko aima ye ka tona fura na tambuahe. Ko ape gupai nga: “Mi payasi tire ki sa gi berã rogo nvutu na kuke yo.” Gure angia sangbana ga Yekova nyanyaki rugute, nga gu naadu a ni wenehe. (Eyo. 42:​1-6) Mbata kusayo, Eyobo aima gbia rugute a be gu paranga kumba nangia Eriu. (Eyo. 32:​5-​10) Fuo Eyobo di ga Mbori rugute kugume na ki rugusi gako bipai, Yekova atakipande pa ida ko na ga Eyobo du ni ruruse ti regbo asada fu kura aboro.​—Eyo. 42:​7, 8.

13. Wai du ga Yekova rugute arengbe ka undo Eyobo tingbafuo gako fudifudiapai?

13 Ga Yekova rugute aima rengba kaa undo Eyobo kindi kumbatayo zavura tifuo nyasa gako fudifudiapai. Ngba gini gene? Sidu, wa vura duhe nga, “Yekova afu maku fu Eyobo ti kusa rago susi gu naadu mbata,” si nawira gupai nga si aima dia regbo tipa Eyobo u na gako apai ki karagatihe kubaha. Kusa ko aye “ki du na awiriko nga akumba saba na ade biata.” (Eyo. 42:12-​14) Nirengo, nyemu bibi agu awiri Eyobo Satana aimiyo anaamanga ko amanga. Si nawira gupai nga ko anaatingidapa gako arungosiro atingida ti kura aregbo. Ka si vura du nga ko aima ye ki gi tiko na ndu gupai ko adu ti ni rogo fudifudiapai, ko aima rengba kaa berã nga tipagine si aidaha aida ti ni ko rungo wa gure. Singia gini apai ko anaaberãha, ko ani berẽ aberã kurii ga Yekova rugute. Mangaha wo anirengbe ka undoko ko du na ruru bipai na kini fu wasa fuko.​—Tam. 94:19.

Ya mo ani rengbe ka ngera ki susi gaani akpakarapai tipa ka bi gu rengo du ti ni? (Oni bi genewaraga 14)

14. Ginipai rengbe ani ka wirikaha ti gu pangbanga du tipa Eyobo?

14 Ani ima rengba a kadu na ruru bipai na ki gbia wasa ti gu pangbanga nga ga Eyobo. Gu kurapai berewe nga, Yekova abandaha ‘tipa gaani wirikapai, ani moi bangirani mbiko gu zera nga ga kekeapai na wasa.’ (Rom. 15:4) Ginipai ani awirikaha? Gu banguapai ani awirikaha nga: Ka ani naaberãnga kina tipa raka rani gbe bangirani ki go ti gipai nyakipaha gbe re ya, nga pa dia gbarasarimo kusayo ti gu bakere pagbia nga ga Yekova. Na si naida ani rugutirani na gupai nga gaani bangiriba rogo gi nyanyakipa pai re nakoda nye ani ni rururani zavura rogo akpakarapai, wa gu Eyobo amangihe.

15. Ginipai gaani padu ni ruruse rogo asada adigisoho?

 15 Tipagine duhe ti ni ni pa wasa ka berãkurii wai nyakipa gaani padu ni ruruse? Bambiko ho ani agbiatirani ni na aʹasada, pai kinaho si amangaha. Kuba gupai nga si yugu gupai nga rago ima gberã ti Yekova na ani, si naundo rani ani yugu gupai nga ani nasongoda ga Mbori bakere pagbia. (Snz. 27:11) Gaani hipai nakusa “inahe” na kini nyakasi gaani mabangirise. (Oni gedi ARomo 5:​3-5.) Gu pangbanga du tipa Eyobo nayugo gupai nga “[Yekova] na bakere nunga ti ko, na bakere inapai.” (Yak. 5:​11) Sidu, ani ima rengba kadu na kido nga ko nika fu mosoro afu furani gbiati agu aboro dunduko nasongoda gako bakere pagbia. Ino gipai re naundo rani ani “dati zera dũ na gbanga hipai ni ngbarago.”​—Koro. 1:​11.

ONI NAAMAA BANGIRONI KINDI

16. Tipagine si aida ani naatingida tirani ti ni na wai nyakipa songoda ga Yekova bakere pagbia?

16 Nirengo, maa bangirani sa dia gbarasarimo kusayo ti ga Yekova bakere pagbia ima rengba kadu ni mbumbuhe. Gaani fudifudiapai ima rengba kadu wa ka i ya si nafu afu ri omerani ti kura aregbo. Zavura agu arukutuhe ima rengba kaa ta rirani yo ka ani aberã gbe kina kuriihe. Sidu tie, si naida ani naatingida tirani dedede na wai nyakipa songoda ga Mbori bakere pagbia ho ani agbiatirani ni na akpakarapai.

17. Wai rengbe manga ga Mbori sunge dedede ka undo rani ani moi bangirani sa gupai nyakipaha gbe?

17 Ndu kindi kumbatayo kaa manga ga Mbori sunge dedede ima rengba ka undo rani ani naamaa bangirani sa gupai nyakipaha kisusi. Ni kpiapai, Dezire Yekova rimori angia Renee awoki be gu kaza nayosorasi papara boro na bangabanga igirã gbiati kansa. Ho ri adu ni bambungua yo, ri amangi dezirepai fu agu aboro naamangasunge bambungua yo, aborokaza, gbiati agu aboro naaye kaa bi ri. Rogo gu kura bambungua sa, ri adi asaa nga 80 kuti tungusapai vuru gimo yo ue na beberehe gbua. Zavura ho Renee aambeda ni na kpio, bangiiri aagonga ti ga Yekova bakere pagbia te. Gure asa gupai nga bete gari aigirã zorõ.

18. Wai du pangbanga nga ga wirina sa ayugopa gu undo duti songoda ga Yekova bakere pagbia?

18 Rengo ngaha nga, si naida ani moi bangirani sa gupai nyakipaha gbe ho ani agbia tirani ni na fudifudiapai rogo aʹuru na aʹuru. Jennifer amangi rame biata ku ba-tiyara yo kaa pido tiyara tipa ka ndu na ni ku rogo gari rago. Gu uru anida i ki ya fuyo tiyara andunga areme te. Mbiko gupai nga ri adu ni sari na ki ima mbu, ri aima rengba kadu rogo kere gberãrago. Ono kuba gure, ri amangi kparakpee tipa ka bi wai rengbe ri ka undo kura aboro rogo toro yo, nga aguyo naadu a rogo gberãrago wa kina ri. Sangbanaha angia gine? Ri amangi dezirepai fu dungu aboro na ki kparaka dungu awaraga. Ri ape gupai nga, “Wa mi avura du rogo fudifudipai, mi abi gupai nga Yekova aima fu maku fere na ki fu bakere ome fere mi tindi rimoko ngba wene gene.” Nirengo, ri aamaa bangiiri sa ga Yekova ringbisapai.

19. Gini bipai du ga Yekova aboro na ni tipa gako bakere pagbia?

19 Aboro ndikidi pambori nabi ga Yekova bakere pagbia na nyanyakipaha, na gipai re nakpara yo ti aboro zire pambori. Ga Mbori aboro aima digo ni songodi gako bakere pagbia. Wa du ani ni agu aboro nasongoda ndikidi pambori, si naida ani dunduko ni basasa du na kina gu bangisa bipai nga ga Ziazia Kekeapai re.

20. Wai du Yekova abi gu ome oni amangaha ka songoda gako bakere pagbia?

20 Si naida oni du na kido nga gu ome oni amangaha ka songoda ga Yekova bakere pagbia nimanga oni sunge fuko wenengai na nihi oni aʹasada, ko nabihe na nyanyakipaha. (Tam. 18:25) Gu kekepai naye fuo gere nika fura berewe gbe tipa ndu gupai si aida oni songodi ga Yekova bakere pagbia ti ni na kpotoroni yo dunduko gbiati wai rengbe oni ka songodaha.