WIRIKAPAI 40

Waigu Rengbe Ani Kadu Gigiri Bangiri Mbori?

SI TONA MANGASUNGE

Mo berẽnga pa gu nagude du na nyemuse nambakada wiiri tipa ko ndu ku sukuru yo. Gupai ri amangaha nga ri nazunda ko na ki bihe nga gako aroko ni wenehe na ni gigirihe. Gipai re nasa gupai nga ko du wenengai ti kpotoko na si kini yugu gupai nga avunguko nangera angera fuoko wenengai. Wakina gure a, gu Barani nga boro nyemuse nga Yekova naida ani du gigiri—ti kpotorani na rogo gaani mangaapai yo. Ho du ani ni gigiri, si naundo rani na si kini fu taarimo fu ko a.

1. Wai rengbe ani kadu gigiri ti kpotorani?

Yekova nagumba gupai furani nga: ‘Oni dú ziazia.’ (1 Petero 1:16) Du ziazia na ngbanya dagbaha na du gigiri ti kpotose na rogo mangaapai yo. Ani rengbe kadu gigiri ti kpotorani ni mbida ani ime dedede, na kini banda gaani aroko, kpurani, gbiati gaani aũnduge si du ni wenehe na ni gigirihe. Ani ima rengba a ka undo na giriso gaani Bambu Kindo. Ni banda ani kpotorani si du ni gigirihe, ani nafu taarimo fu Yekova.—2 AKorindo 6:3, 4.

2. Tipa kadu ni gigiri rani, gini ngbatunga mangaapai si aida ani ne he?

Baibiri nangarasa rani nga ‘ani gírisi tirani be gu meteka dunduko nga ga borose na toro.’ (2 AKorindo 7:1) Ngba gi gene re, ani namanga ome ka ne ai gupai rengbe ka gbarasa kpotorani watadu berãrani. Si naida agu apai ani aberãha sa ngbarago ti Yekova, si du ani namanga nyanyaki asadatise wa rengbe omerani na ni ka ne iraira aberã. (Atambuahe 104:34) Ani namanga asadatise a kaa peka agu afugo du ni wenehe.—Mo gedi AKorosaio 3:8.

Gini kurapai berewe rengbe ka sa kpotorani watadu gaani mangapai sidu ni bibirikoho? Gu kura ahe kinaho naima rengba ka gbarasa kpotorani. Si du tie, ani na ne gu ngbatunga ahe du wa gundö gbiati dia kere angua kutii kpotorani yo tipa ka zambuasi tirani. Ho ani ane agi apai re ni, ani nadu wenengai ti kpotorani na ani kini yugu irisa tipa gu gamahe nga unga. Ani namanga asadatise a kadu gigiri rogo gaani mangaapai yo ni so ani vura kuti bibiriko mangaapai wa gu nga zapada barangbase nisase nibee ka gbia ngbarago ti ni watadu biko kpia kundiri aboro. (Atambuahe 119:37; AEfeso 5:5) Si ima rengba kadu ni kpakarakpakaraha ka diabe gi sino mangaapai re, ono Yekova ima rengba ka undo rani ani dibehe.—Mo gedi Yesaya 41:13.

MO WIRIKI KURA DUNGU APAI

Mo bingo wai du gigiri ti kpotose narengbe ka taasarimo Yekova na ki bingo wai rengbe boro ka diabe bibiriko mangaapai.

3. Du gigiri ti kpotose nataasarimo Yekova

Ani rengbe ka ino ga Yekova bipai tipa du gigiri ni wisigo ani gu gako arugute ko afuhe fu agu aYisaraere nadu mbata. Mo gedi Gate 19:10 na 30:17-19, na tifuoho, mo ki sakipai tipa agi asanahe re:

Ginipai agi averesi re ayugoho nibipa ga Yekova bipai tipa du gigiri ti kpotose?
Gini ngbatunga wene mangaapai rengbe ka undo ro mo nye gigiri ti kpotoro?

Si nadia regbo adia gbiati asadatise tipa boro du gigiri ti kpotoni. Ono ani ima rengba kadu gigiri ti kpotorani ka si vura du vurũ nga ani naraka kina wari watadu ani nga airakumuko watadu airarungo. Mo bi gu VIDIO re, na tifuoho, mo ki sakipai tipa gu sanahe ngbefuoho.

VIDIO: Mbori Nakpinyemu Agu Aboro Du ni Gigiri Yo (4:10)

Waigu pa banda ani gaani ahe si du ni wenehe na ni gigirihe narengbe ka sa aboro i ni bi gaani sunge tungusapai na nyanyakipaha?

4. Mo dibe gbegberẽ mangaapai

Yekova ima rengba ka undo rani ani dibe ai gbegberẽ mangaapai

Ka sidu nga mo naavu gundö avu watadu mo naadia kere angua adia kutii kpotoroyo tipa zambuasitise, mo ima rengba ka ino wai duhe ni kpakarakpakaraha ka diabe gi sino re. Ginipai rengbe ka undo? Mo bingo wai du gu mangapai re namaapai kuriro. Mo gedi Matayo 22:37-39, na tifuoho, mo ki sakipai tipa wai rengbe gundö watadu dia kere angua kutii kpotoseyo narengbe kadu na maapai kurii . . .

ga boro pa bakure na Yekova.
ga boro aborokporo gbiati gu kura aboro du pati ni.

Mo mangi mbakadapai ka diabe gbegberẽ mangaapai. a Mo bi gu VIDIO re.

VIDIO: Mo Du na Zatise (2:47)

Mo gedi AFiripoio 4:13, na tifuoho, mo ki sakipai tipa gi sanahe re:

Waigu rengbe kparakpee dedede, wisigo Baibiri, gbiati nduge tipa adunguratise narengbe ka fu ome fu boro nidibe gbegberẽ mangaapai?

5. Mo sovura kuti bibiriko aberã gbiati mangaapai

Mo gedi AKorosaio 3:5, na tifuoho, mo ki sakipai tipa agi asanahe re:

Wai ani aino gupai nga biko kpia kundiri aboro, keka apai watadu kekeda avidio nga ga kodaba rogo terefuni, gbiati zapada barangbase nisase nibee ka gbia ngbarago ti ni nga bibirikopai bangiri Yekova?
Ya mo mo nabihe nga si rẽarẽ Yekova idi gupai berani nga ani du gigiri rogo mangaapai yo? Tipagine mo abihe ti ni wo?

Mo bingo wai rengbe mo ka sovura kuti bibiriko aberã. Mo bi gu VIDIO re.

VIDIO: Mo Diberã Ka Nye Gigiri (1:51)

Yesu amangisunge na kpiapai nga gu nayugo wai si aida ani diberã ka nye gigiri rogo mangaapai yo. Mo gedi Matayo 5:29, 30, na tifuoho, mo ki sakipai tipa gi sanahe re:

Yesu aape nga gupai ane nga si naida ani imisi kpotorani aimisa te, gupai ko aaida ka pehe ane nga si naida ani mangi diandue amanga. Gini diandue boro narengbe ka mangaha tipa ka ne bibiriko aberã? b

Ka mo aamanga nyanyaki asadatise ka diabe bibiriko aberã, Yekova nabi gu ome mo amangaha na nyanyakipaha. Mo gedi Atambuahe 103:13, 14, na tifuoho, mo ki sakipai tipa gi sanahe re:

Ka mo asota tipa ka diabe bibiriko aberã, wai rengbe gi veresi re ka ngarasaro mo naamanga ome kindi?

Mo naamanga ome kindi!

Si ima rengba kadu taata boro berẽ gupai nga, ‘Si ima gasa re, si naida mi mbu manga ome.’ Ono mo berẽnga kurii gipai re ka gu boro naora oto abaangirã koto ki ti, si ayugongo gupai nga ni adunga na diabese rogo gu oto abaa- ngirã re te te, watadu si naida ni tonaha berewe sayo te. Wakina gure a pa karaga boro tini ka manga gupai ni asovura kuti ni ayugongo gupai nga ka ni dinga behe te te. Watadu si adianga ba gu asadatise dunduko ni atona mangaha kusayo te. Ka mo bi tiro nga mo karagatiro kaa manga kina gu bangisa mo asovura kutini, ka rago gberẽnga tiro ya! Na ga Yekova undo mo nika dia adia be gu gbegberẽ sino re.

GU KURA ABORO NAPE GUPAI NGA: “Si ima zio baha tire. Ka mi mbunga ha te.”

Gini veresi rengbe mo ka mangasunge na ni ka yugo gupai fu boro nga, na ga Yekova undo, ni ima rengba ka diabe gbegberẽ mangaapai?

GINIPAI MO NAWIRIKIHE?

Ani nasa ngbarago ti Yekova ni banda ani kpotorani, gaani aberã gbiati gaani mangaapai ni gigirihe.

Fugöpai

Tipagine du padu gigiri ti ni ni nyanyakipa pai?
Wai boro narengbe kadu gigiri ti kpotoni?
Wai rengbe mo ka banda gamo aberã gbiati gamo mangaapai si du gigiri?

Gu rame diwi wirikapai nanyasi ti ni:

Sásá

Mo sana Yekova ko undo ro mo bi gene sa rogo gamo raka yo nga gu rengbe mo ka manga ariapai rogoho tipa kadu gigiri.

Gu kura sásá:

Your other goal

MO WETEKE GU KURA APAI

Gini taata apai rengbe mo ka mangaha kadu ti kpotoro gigiri si ki vura du vurũ nga mo nga irarungo?

Bandatise Gigiri—Zundabee (3:01)

Mo bi agu adiandue rengbe mo ka mangaha tipa ka mbu vugundö.

“Wai Ka Mbu Vugundö” (Awake!, Merekoko 2010)

Mo wisigi gu sangbanapai du ti bi kpia kundiri aboro.

“Bi Kpia Kundiri Aboro—Kerepai Ti Ni Te Watadu Kerepai Kina Ti Ni?” (Ngbaõbambu Sinziri, Buza 1, 2013)

Mo bingo wai kumba sa adibe gupai naima ziobaha tiko nga bi kpia kundiri aboro.

“Mi Amangi Asadatise Bara Dunguhe Mi Kini Ru Kadu na Diabese” (Ngbaõbambu Sinziri Na. 4 2016)

a “Wai ka Mbu Vugundö,” du rogo gu paparaha nga Mo Weteke Gu Kura Apai du rogo gi wirikapai re nasakapai tipa agu adiandue boro narengbe ka mangaha ka diabe agu apai naima ziobaha tini.

b Tipa ka gbia undo ka ne gu sino nga ga zapada barangbase nisase nibee tipa ka gbia ngbarago, mo bi gu riipai nga “Waigu Rengbe Mi Ka Diabe Gu Sino Nga Zapada Barangbase Nisase Nibee Ka Gbia Ngbarago Ti Ni?” rogo gu nga Questions Young People Ask—Answers That Work, Volume 1, kapita 25.

MO RAKI NYEANYE KINDI NA NGBARAGO!—MO WIRIKI BAIBIRI NGBA GU GENE RENGBE KA FU UNDO