Wene wirina:

A wa ini mo ho, Ziazia Kekeapai nga gu buku nafura gbe tipa aboro. Dungu agu aboro re angia ruru akumba na adee, nga aguyo nagbiatiyo na akpakarapai wakina gu ani agbia tirani na ni areme. I angia agu ‘aboro nahi dungu apai wa kina rani.’ (Yakoba 5:17) Ome aguyo abati be bakere bakabangirise. Aguyo kinaho kina gayo aborokporo watadu akurayo aidipase aaimisa yo. Na aguyo kinaho sangbakpotoyo yo aafuda yo mbiko gayo aingahe.

Ya mo agi aboro re ambu Yekova? Oó. Dungu yo naadu wakina gu bake Atambuahe naya: “Mi amerẽ ku bani wa ingiingi kandoro; mo gbáta ga moyambu, bambiko bangire ago nga ti sangbaro te.” (Atambuahe 119:176) Ya mo mo nabitiro wa gure?

Bangiri Yekova agonga ti agu airisiko kparatiyo kusayo ti kura akandoro te. Kuba gure, ko namangasunge na akurayo aidipase ka gbata yo. Ni kpiapai, mo bingo wai Yekova aundo gu gako moyambu nangia Eyobo. Eyobo agbiatiko na dungu arungo; pa gako aũkumuko agberẽ, ko azanga awiriko, na kere kaza ki ziko. Eyobo aima hi gbegberẽ afugo a be agu aboro si aidi i songodi ko. Ono wa si avura du vurũ nga ko aima inga rogo gako berã tipa bete regbo, ko aasanga giiko na Yekova te. (Eyobo 1:22; 2:10) Wai du Yekova aundo Eyobo ko du berewe wai ko adu mbata?

Gene sa Yekova aundo Eyobo ngbaha nga, ko amangisunge na kura irisiko nangia Eriu. Ho Eyobo aapeka agu apai ni naafuda ko, Eriu adegetuko fuko na ki fura. Ginipai ko agumbaha? Ya mo Eriu abisirapa Eyobo watadu ka asada ka sako ko bihe nga ko ima manga ingapai? Ya mo Eriu abi tiko nga ko kiipako ti Eyobo? Wagusa te! Ga Mbori ziazia toro asa Eriu ko ya: “Mi koyo du Mbori ni wa du mo koyo du Mbori ni a; i amangi re a kina rogo pere.” Fuoho, ko akido Eyobo ki ya: “Gunde re amanga nga ro mo gunde ti re te; gi sosodapai adu nga ri ro rõrõi a te.” (Eyobo 33:6, 7) Eriu aamaanga kura tindiro kurii Eyobo te, ono ko afu rugute fu Eyobo rogo nyemuse yo na ki fu gu wasa fuko ko aaidaha ti gu regbo re.

Si naida mo ini gupai nga, kina gu bangisa toro Eriu adu na ni re, si du sarani ani ke gi burosua re. Bambatapai nga ani adegeturani fu agu aboro naima bitikpa ti rengo, na ki bi agu apai du tipa yo wenengai. (Asanza 18:13) Fuo gure, ani ki ndu ku rogo Ziazia Kekeapai ka wisigo agu apangbanga du tipa wai Yekova aundo gu gako amoyambu naadu mbata kusayo ho i agbiatiyo ni na kpakaraapai wa gure. Ni yangaraha, ani kodi agu apangbanga du rogo Ziazia kekeapai kuti gu du ti gi gaani regbo re kini ka kusa gi burosua re. Ani nayamba ro esuesu mo wisigingo gi burosua re wenengai. Mo ini gupai nga ani ima kpinyemuro gbe.

Riigbu Bipasunge Nga ga ADezire Yekova