Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

 BIATA PAPARAHA

Ka Boro Imisiro—Ho Du ‘Pai ni Bangirani Kuti Kuarani’

Ka Boro Imisiro—Ho Du ‘Pai ni Bangirani Kuti Kuarani’

Wirina du rimori nga Linda aya: “Kura wirina rogo dungurati akitingbanga re nga mi adĩ gari marã. Ho kura awirina rogo dungurati ainihe ni, i aima ida kuti ni. Ni yangaraha, gu wirina re ape gupai fere nga ri ima giapai tipa gu marã re, mi nadĩ ru te. Wa vura duhe nga ri aima hõ mbupai bere, mi abihe nga mi arengbanga ka mbupai fu ri te mbiko gu pazee nagbia re.”

YA MO gupai namangi Linda nga idipase imisiri re mangingo ro? Si nafu kina gberãrago nga, gu mangapai nga ga kura awirina ima fuda kura aboro si ki gberesipa yo rogo toro yo. Ya mo ngbatunga pai wa gure tipa ro?

Ya Mo Boro ho Rengbe ka ‘Kpara Rani ti ga Mbori Nyemuse’?

Nirengo, si ima rengba ka kpakara furani ani mbupai ho kuarani idipase aimisa rani ni. Nirengo, si naida aKristano du na nyemuse dagbatiyo. (Yoane 13:34, 35) Ho kuarani idipase aingapai ni kuti rani ni, si naimisa rani ni kerehe.Atambuahe 55:12.

Ziazia Kekeapai ima pe gupai nga aregbo kinaho ga aKristano mangaapai asa gupai nga akurayo du na pai ‘bangiriyo kutiyo.’ (AKorosaio 3:13) Wa vura duhe wo, ho kuarani idipase aimisa rani ni, si taata ka hihe te. Ya mo pai ho rengbe ka undo rani? Ani bingo apai biata nga gu Ziazia Kekeapai agumbaha:

Gu Barani du ngbangbaturũ yo ima ino agu apai dunduko namanga rani. Yekova nabi agu apai dunduko namanga rani, kodihe na gu iraira mangaapai ani agbiatirani na ni na gu imisiri si aye na ni. (AEbere 4:13) Kurigure, rago angbanga ti Yekova ho ani arungo ni te. (Yesaya 63:9) Ko ambunga “rungosi,” “gberãngbi,” watadu kura gako moyambu ní ‘kpara rani ti ga Mbori nyemuse’ te. (ARomo 8:35, 38, 39) Si naida gupai a nga ka ani mbunga apai watadu boro ni kpara rani ti Yekova ya.

Anga mbupai nga ida na gbegberẽpai te. Ho ani ambupai ni fu agu aboro mangi rani na gbegberẽpai, anga gure nga ani ima ida na gupai mangi yo ho re te. Mo tingidi gupai nga, Yekova aidanga na ingapai te, ono ko nambupai ka si du nga wene ndupai kinaho tipa ko mangihe wo. (Atambuahe 103:12, 13; Abakuka 1:13) Ho Yekova aya ni furani ani mbupai fu akuarani, gure nga ko naida ani wiriki ko. “Ko aká nga kuti gako zinga kindi a te.” Atambuahe 103:9; Matayo 6:14.

Ho ani akpingo pai ni ya, ani nagbia undo agbia. Ngba gini gene? Mo bingo gi kpiapai re. Mo tumba mbia nga gu arõanga ya, mo ki zadihe kuari. Si arengbanga ka du ni kpakarapai foro ka si du nga mo nazada gu mbia re tipa wiri guru regbo te. Ono na ka si du nga mo asadi ka zadaha tipa gbanga regbo? Bero igirã aigirã gbe ka mo zadihe ki da ti dungu aminiti, ti saa sa, watadu susi gure. Barõa gu mbia re aˈarianga tihe te. Ono ka si du nga mo nazadaha tipa gbanga regbo, bero ima rengba ka taya kina ku mbatayo. Kina gu bangisapai re du tipa kpipai. Ho ani akpipai ni ni gbangaha, ka si vura du ni kina toonihe, si rengbe kaa imisa rani kina ku mbatayo. Si du nga ndu gupai Yekova angarãsa  rani ti ni ka ani kanga kuti kpipai ya. Nirengo, ho ani ambupai ni, ani nagbia undo agbia.Asanza 11:17.

Ho ani akpingo pai ni ya, ani nagbia undo agbia

“Mi Abi Tire Nga Yekova du Nafura Fere”

Ginipai naundo Linda ka ri kpingo pai kuti gu wirina namangi ri gbegberẽ re ya? Pai sa dagba agu apai naundo ri nga, ri aberẽkurii gu nduapai Ziazia Kekeapai angarãsa rani ti ni ani mbupai. (Atambuahe 130:3, 4) Pa ino Linda gupai nga ho ani ambupai ni fu akuarani Yekova nambupai a furani aima fõ ri gbe. (AEfeso 4:32–5:2) Nibipa wai gi bipai re adu na ome kurii ri, ri aya: “Mi abi tire nga Yekova du nafura fere.”

Fuo bete regbo, Linda aima ye ki mbu gu kpipai ri adu na ni. Ri aima mbupai fu gu wirina re, na i awere nga wene anakure. Linda nandu ku mbatayo kindi na mangasunge fu Yekova. Si naida mo du na gu kido nga Yekova nika undo ro aundo mo mangi kina gu bangisapai re a.