Síijen Calgary, junpʼéel chan kaaj yaan tu luʼumil Alberta (Canadá). Tin chichnileʼ in papá yéetel in maamaeʼ tu divorciartubaʼob, le óolal teen yéetel in maamaeʼ binoʼon kajtal yiknal in abueloʼob. Jach kiʼimakchaj in wóol úuchik in bin kajtal yiknal in abueloʼob tumen letiʼobeʼ jach u yaabiltmoʼonoʼob.

 Le yaanten siete añosoʼ in maamaeʼ tsʼoʼok u beel tu kaʼatéen yéetel in papá, ka binoʼon kajtal San Luis Misuri (Estados Unidos). Le baʼax úuchoʼ tu kaʼa beetaj u kʼexpajal in kuxtal. Teʼ kʼiinoʼob jeʼeloʼ tin tsʼáaj cuenta jach séeb u pʼuʼujul in papá. Juntéeneʼ le ka suunajen tin wotoch le tsʼoʼok in xookoʼ in papáeʼ tu yojéeltaj jaʼajatsʼaʼaben tumen u jats paalaloʼob, como maʼ tin defendertinbaeʼ tu sen jaʼajatsʼen. Desde le kʼiin jeʼeloʼ tin naʼateʼ u kʼáat ka in kan in defendertinba.

 In maamaeʼ jach ku tsʼíikil kéen u yil u pʼuʼujul in papá, le óolal yaʼab u téeneleʼ ku xakachtʼaanoʼob yéetel ku sen baʼateloʼob. Once años yaanten ka káaj in sen káaltal yéetel in drogarkinba. Cada kʼiin ku máaneʼ ku maas kʼastal bix in pʼuʼujul yéetel mantatsʼ kin baʼateʼel. Le ka tin tsʼoʼoksaj in xook secundariaeʼ pʼáat jach séeb in pʼuʼujul.

 Le yáanten dieciocho añosoʼ tin beetaj in soldadoil tu luʼumil Estados Unidos. Deporsi séeb in pʼuʼujul pero le ka káaj in beetik in soldadoiloʼ káaj in kíimsik in wéet máakil. Le ka máan cinco años táan in beetik in soldadoileʼ tin pʼataj. Ka ooken xook utiaʼal in beetik in psicologoil tumen in kʼáat okol meyaj kaʼach FBI. Estados Unidos tin káajsaj in xook, ka máan kʼiineʼ tin seguertaj in xook Canadá.

 Le táan in xook universidadoʼ jach maʼ kiʼimak in wóoliʼ. Tin tsʼáaj cuenta xaneʼ wíinikeʼ maʼ tu páajtal u yutskíintik le baʼaloʼob kʼaastak ku yúuchul way yokʼol kaabeʼ, tumen chéen ku tuukuloʼob tu yoʼolaloʼob. Kʼuchen in tukult mix bikʼin kun utstal le baʼaxoʼob kʼaastak ku yúuchloʼ.

 Ka tin wilaj maʼ tu binten utsileʼ káaj in tuklik bix jeʼel u yantalten yaʼab taakʼin yéetel koʼoleloʼobeʼ. Jach utschaj tin wich in bin tiʼ fiestas yéetel in núupkʼebantal. Tsʼoʼoleʼ tumen jach in wojel baʼateleʼ kin wuʼuyik bey mix máak ku béeytal tin wéeteleʼ. Wa kin wilik yaan máax ku loobiltaʼaleʼ kin defendertik, u jaajileʼ pʼáat chéen baʼateʼel kin beetik.

 Juntéenjeak le táan k-drogartikba yéetel táan k-preparartik le droga ken k-konoʼ in amigoeʼ tu kʼáatajten wa kin creertik Dios. Tin núukaj tiʼ: «Wa tuláakal máak táan u sufrir tu culpa Dioseʼ maʼ taak in wojéeltik mix baʼal tu yoʼolaliʼ». Tuláakʼ kʼiin le ka binen tuʼux kin meyajoʼ juntúul in wéet meyaj Testigoeʼ tu kʼáatajten: «¿Dios wa beetik u sufrir máak?». Jaʼakʼ in wóol ka tin wuʼuyaj tumen junpʼéel kʼiin anteseʼ in amigoeʼ láayliʼ letiʼe baʼax tu kʼáatajtenoʼ. Le baʼax úuchaʼ tu beetaj u taaktal in wojéeltik u maasil. Ichil seis meseseʼ yaʼab u téenel tsikbalnajoʼon yoʼolal baʼax ku kaʼansik le Bibliaoʼ.

 Pero le koʼolel in wéet kajtal kaʼachoʼ maʼ uts tu tʼaan u yuʼubik le baʼaxoʼob kin kanikoʼ. Junpʼéel domingoeʼ tin waʼalajtiʼ tsʼoʼok in invitartik le Testigoʼob utiaʼal u tsʼáaikoʼobtoʼon xookoʼ. Tuláakʼ kʼiin ka kʼuchen tin najileʼ tin wileʼ tsʼoʼok u bin, tu pʼaten. Teen túuneʼ jóokʼen tin najileʼ ka tin sen oʼtaj. Yáax in orar tiʼ Jéeobaoʼ yéetel tin kʼáatajtiʼ ka u yáanten (Salmo 83:18).

 Ka máan kaʼapʼéel kʼiineʼ juntúul Testigo yéetel u yataneʼ káaj u tsʼáaikoʼobten xook. Le ka binoʼoboʼ teneʼ seguernaj in xokik le libro Usted puede vivir para siempre en el paraíso en la Tierra. Ichil junpʼéel áakʼab ka tin láaj xokaj. a Jach kʼuch tin puksiʼikʼal le baʼax tin kanaj yoʼolal Jéeoba yéetel yoʼolal Jesúsoʼ. Tin kaneʼ Jéeobaeʼ jach ku chʼaʼik óotsilil yéetel ku yaatal u yóol u yilik bix u sufrir máak (Isaías 63:9). Péeknaj in wóol úuchik in kanik bukaʼaj u yaabiltmen Jéeoba, tin kanaj xaneʼ Jesúseʼ tu kʼubaj u kuxtal tin woʼolal (1 Juan 4:10). Tin wileʼ Jéeobaeʼ jach chúukaʼan u yóol tiʼ teen yéetel letiʼeʼ u kʼáat ka u kʼex u kuxtal tuláakal máak utiaʼal u salvarkuba (2 Pedro 3:9). Tin wuʼuyaj jach tu jaajil Jéeobaeʼ u kʼáat ka náatsʼken tu yiknal (Juan 6:44).

 Teʼ semana xanoʼ káaj in bin teʼ reuniónoʼoboʼ. Chowak kaʼach u tsoʼotsel in pool, yaan in tuup yéetel le bix in wilaʼaloʼ ku sajakkúuntik máak. Pero le Testigoʼoboʼ tu tratartenoʼob jeʼex juntúul u láakʼtsiloʼob tsʼoʼok u xáantal u yiloʼobeʼ. Jach tu yeʼesoʼobten yaabilaj. Tin wuʼuyinba jeʼex le kʼiin ka binen kajtal yiknal in abueloʼobeʼ.

 Maʼ úuch káajak in xokik le Biblia ka tin kʼexaj in kuxtaloʼ, tin kʼosaj u tsoʼotsel in pool, xuʼul in núupkʼebantal, in káaltal, in drogarkinba yéetel tin pʼataj tuláakal le baʼaxoʼob kʼaastak kin beetik kaʼachoʼ (1 Corintios 6:9, 10; 11:14). Utiaʼal in kuxtal jeʼex uts tu tʼaan Jéeobaeʼ tu séeblakil ku xuʼulul in beetik baʼax u pʼekmaj. Jach ku yaatal in wóol kéen in wil maʼ tin kuxtal jeʼex u kʼáateʼ, le oʼolal yaan horaeʼ kin waʼalik maʼ ken in kaʼa beet baʼax kʼaas. Tin wileʼ jach yaʼab utsiloʼob ku taasikten in kuxtal jeʼex u kʼáat Jéeobaeʼ. Le óolal chéen seis meses káajak in xookeʼ okjaʼanajen, lelaʼ tin beetaj tu kʼiinil 29 tiʼ julio tiʼ 1989.

 Le Bibliaoʼ tu yáanten in kʼex in kʼaakʼas modos. Kaʼacheʼ jach séeb in pʼuʼujul yoʼolal jeʼel baʼalakeʼ pero bejlaʼeʼ kin wilik in tratartik maʼalobil u maasil (Romanos 12:18). Tsʼoʼoleʼ béeychaj in kʼexik in modos chéen yéetel u yáantaj le Bibliaoʼ bey xan u espíritu santo Jéeoba (Gálatas 5:22, 23; Hebreos 4:12).

 Kaʼacheʼ yaʼab kʼaakʼas vicioʼob yaanten, kin káaltal, kin drogarkinba yéetel kin núupkʼebantal. Chéen baʼaleʼ bejlaʼeʼ maas yaʼab baʼaloʼob kin beetik utiaʼal in maas meyajtik Jéeoba, jeʼex in kaʼansik tiʼ uláakʼ máakoʼob baʼax ku kaʼansik le Bibliaoʼ. Ka máan wa jaypʼéel años okjaʼanakeneʼ binen áantaj tiʼ uláakʼ luʼumil utiaʼal in tsikbaltik u Tʼaan Dios tiʼ le máakoʼoboʼ. Tsʼoʼok in wáantik yaʼab máakoʼob u kʼex u kuxtaloʼob yéetel u yáantaj le Bibliaoʼ. Jach ku kiʼimaktal in wóol kéen in wil bix u kʼexik u kuxtaloʼob yoʼolal le baʼax ku kankoʼoboʼ. Uláakʼ baʼax kiʼimakkúuntik in wóoleʼ letiʼe u meyajtik Jéeoba in maamaoʼ. Le ka tu yilaj bix tin kʼexil in kuxtaleʼ taakchaj xan u beetkuba u testigo Jéeoba.

 Tu añoil 1999 binen tiʼ junpʼéel curso tu luʼumil El Salvador. Le cursoaʼ ku tsʼaʼabal utiaʼal u kaʼansaʼal tiʼ máak u kanáant le máaxoʼob meyajtik Jéeobaoʼ bey xan utiaʼal k-kaʼansik tubeel le máakoʼoboʼ. Bejlaʼeʼ le cursoaʼ kʼaj óolaʼan bey Escuela utiaʼal Máaxoʼob Kʼaʼaytik le Reinooʼ. Teʼ año xan jeʼeloʼ tsʼoʼok in beel yéetel Eugenia. Bejlaʼeʼ kajaʼanoʼon Guatemala yéetel láayliʼ táan k-kaʼansik tiʼ uláakʼ máakoʼob u Tʼaan Dioseʼ.

 Bejlaʼeʼ jach kiʼimak in wóol tumen maʼalob u binten ichil in kuxtal. Desde ka káaj in xokik le Bibliaoʼ tin wuʼuyaj libreen. Yaʼab kʼaakʼas modosoʼob tin pʼataj yéetel bejlaʼeʼ maʼ séeb in pʼuʼujuliʼ, tsʼoʼoleʼ xuʼul in núupkʼebantal. Bejlaʼeʼ jach kiʼimak in wóol tumen yaʼab máaxoʼob yaabiltmilen.