«Pʼat tu kʼab Jéeoba tuláakal baʼax ka beetik, beyoʼ le baʼaxoʼob ka chʼaʼtuklik a beetkoʼ yaan u jóokʼol utsil» (Proverbios 16:3, Túumben Luʼum).

 «Tsʼáa tu kʼab Yuumtsil tuláakal baʼax ka beetik, beyoʼ ku béeychajal le baʼax ka tuklikoʼ» (Proverbios 16:3, Quiliʼich Biblia ich Maya).

 Le tekstoaʼ ku yeʼesikeʼ le máaxoʼob adorartik Diosoʼ ku bintiʼob utsil tumen ku confiaroʼob tiʼ letiʼ yéetel ku kaxtikoʼob u nuʼuktaj.

 «Pʼat tu kʼab tuláakal baʼax ka beetik». Le máaxoʼob meyajtik Jéeobaoʼ a antes tiʼ u beetkoʼob wa baʼaxeʼ ku kaxtikoʼob u nuʼuktaj (Santiago 1:5). ¿Baʼaxten? Tumen wíinikeʼ maʼ tu páajtal u controlartik tuláakal baʼax ku yúuchul ichil u kuxtal (Eclesiastés 9:11; Santiago 4:13-15). Tsʼoʼoleʼ wíinikeʼ u yojel yaan baʼaxoʼob minaʼantiʼ u naʼatil u beetik le oʼolal ku pʼatik tu kʼab Dios baʼax ku chʼaʼtuklik. Lelaʼ ku beetik le kéen orarnak tiʼ Dios yéetel le kéen u tsʼáa ichil u kuxtal le baʼax ku yaʼalik le Bibliaoʼ (Proverbios 3:5, 6; 2 Timoteo 3:16, 17).

 Le kéen u yaʼal le teksto «tsʼáa tu kʼab Yuumtsil b tuláakal baʼax ka beetik[oʼ]» ku tsʼáaik naʼatbil bey ka a máans a kuuch tiʼ Dioseʼ. Junpʼéel libroeʼ ku yaʼalikeʼ lelaʼ «bey jeʼex [ka] a máans a kuuch tu puʼuch wa máax maas yaan u muukʼeʼ». Le máaxoʼob jach ku confiaroʼob tiʼ Diosoʼ u yojloʼob yaan u yáantaʼaloʼob (Salmo 37:5; 55:22).

 Le tʼaan «tuláakal baʼax ka beetik[oʼ]» maʼ u kʼáat u yaʼal wa Dioseʼ yaan u bendecirtik tuláakal baʼax ku tuklik u beetik máak, utiaʼal ka u bendecirt baʼax ku beetaʼaleʼ kʼaʼabéet u respetartaʼal u leyoʼob yéetel u beetaʼal baʼax ku yaʼalik (Salmo 127:1; 1 Juan 5:14). Le Bibliaoʼ ku yaʼalikeʼ letiʼeʼ maʼatech u «chaʼik u jóokʼol le kʼasaʼan máakoʼob yéetel le baʼax ku tuklikoʼoboʼ» (Salmo 146:9). Letiʼeʼ uts tu tʼaan u bendecirtik le máaxoʼob beetik baʼax ku yaʼalik le Bibliaoʼ (Salmo 37:23).

 «Beyoʼ le baʼaxoʼob ka chʼaʼtuklik a beetkoʼ yaan u jóokʼol utsil». Le junxóotʼ tiʼ le tekstoaʼ ku traducirtaʼal xan beyaʼ: «Le baʼaxoʼob ka chʼaʼtuklik a beetkoʼ yaan u pʼáatal jejetsʼkil». Teʼ Antiguo Testamento wa teʼ Tsʼíiboʼob ich Hebreooʼ le tʼaan «jejetsʼkiloʼ» ku meyaj kéen aʼalaʼak yaan u tsʼaʼabal u cimientoil wa baʼax. Ku meyaj xan kéen chʼaʼchiʼitaʼak bix tsʼaʼanil u cimientoil le kaʼan yéetel le Luʼumoʼ (Proverbios 3:19; Jeremías 10:12). Le máaxoʼob uʼuyik u tʼaan Diosoʼ yaan u pʼáatal jejetsʼkil yaniloʼob tumen yaan u bin utsil tiʼob yéetel yaan u yantaltiʼob kiʼimak óolal (Salmo 20:4; Proverbios 12:3).

 Salomón tsʼíibt le capítulo 16 tiʼ Proverbiosoʼ, letiʼ tsʼíibt óoliʼ tuláakal u libroil Proverbios. Salomóneʼ páajchaj u yaʼalik máas tiʼ mil proverbios tu yoʼolal le naʼat tsʼaʼabtiʼ tumen Diosoʼ (1 Reyes 4:29, 32; 10:23, 24).

 Salomóneʼ tu káajsaj le capítulo 16 táan u tʼaan tiʼ le naʼat yaan tiʼ Jéeobaoʼ, tu yaʼalaj xaneʼ Jéeobaeʼ u pʼekmaj le máaxoʼob nojbaʼal u taaskubaʼoboʼ (Proverbios 16:1-5). Tu tsʼoʼokbal le capítulo 16 tiʼ Proverbiosoʼ ku yeʼesikeʼ utiaʼal ka yanak naʼat tiʼ máakeʼ kʼaʼabéet u chaʼik u nuʼuktaʼal tumen Dios, chéen baʼaleʼ utiaʼal leloʼ kʼaʼabéet kabal óolal tiʼ máak (Proverbios 16:3, 6-8, 18-23). Ichil le Bibliaoʼ yaʼab tuʼux ku kʼaʼajsaʼal tiʼ máak u kʼaʼanaʼanil u beetik le baʼaxoʼob tsʼoʼok k-aʼalikaʼ (Salmo 1:1-3; Isaías 26:3; Jeremías 17:7, 8; 1 Juan 3:22).

 Utiaʼal a wilik tiʼ uláakʼ baʼaxoʼob ku tʼaan u libroil Proverbioseʼ chaʼant le videoaʼ.