Le Bibliaoʼ ku yaʼalikeʼ Dioseʼ u kʼáat ka k-náachkuntba «tiʼ le núupkʼebanoʼ» (1 Tesalonicenses 4:3). Ku yaʼalik xaneʼ ichil «le núupkʼebanoʼ» táakaʼan u tusik máak u núup, le homosexualidadoʼ yéetel u yantal relaciones sexuales tiʼ máak sin ke u tsʼoʼokol u beel.

•  ¿Baʼaxten Dioseʼ u kʼáat ka tsʼoʼokok u beel máak, maʼ chéen ka múul kajlakiʼ?

•  ¿Maʼalob wa ka múul kajlak máak chéen utiaʼal u yilik wa jeʼel u páajtal u tsʼoʼokol u beeleʼ?

•  ¿Bix jeʼel u bin utsil tiʼ le máaxoʼob tsʼokaʼan u beeloʼoboʼ?

•   Dios beet u yantal le tsʼoʼokol beeloʼ. Lelaʼ tu beetaj úuchik u tsʼoʼoksik u beel le yáax xiib yéetel le yáax koʼoleloʼ (Génesis 2:22-24). Letiʼeʼ maʼ tu tsʼáajoʼob chéen utiaʼal u múul kajtaloʼobiʼ, baʼaxeʼ utiaʼal u yantaltiʼob junpʼéel compromiso wa u tsʼoʼokol u beeloʼob.

•   Dioseʼ u kʼáat ka xiʼiktoʼon maʼalobil. Letiʼeʼ u kʼáateʼ kéen tsʼoʼokok u beel juntúul xiib yéetel juntúul koʼoleleʼ utiaʼal mantatsʼ maʼ chéen utiaʼal wa jaypʼéel kʼiiniʼ. Beyoʼ ku páajtal u kanáantaʼal le máaxoʼob yanoʼob ichil le familiaoʼ. Tuukulnen tiʼ lelaʼ: utiaʼal a armartik junpʼéel mueble jach tubeeleʼ kʼaʼabéet a beetik le baʼax ku yaʼalik u instructivoiloʼ. Bey túun xanoʼ wa k-kʼáat ka yanak kiʼimak óolal ichil k-familiaeʼ kʼaʼabéet k-beetik baʼax ku yaʼaliktoʼon Dios. Beyoʼ yaan u bintoʼon maʼalobil (Isaías 48:17, 18).

•   Le máaxoʼob maʼ tsʼokaʼan u beeloʼob ku yantaltiʼob relaciones sexualeseʼ jeʼel u yantaltiʼob problemaseʼ. Por ejemploeʼ jeʼel u yantal u paalal kex maʼ u kʼáatoʼobeʼ, jeʼel u tsaʼayal kʼojaʼanil tiʼobeʼ yéetel jach jeʼel u sen chiʼichnaktaloʼobeʼ.

•   Dioseʼ tu tsʼáaj junpʼéel jatsʼuts regalo tiʼ wíinik: u yantal u paalal le kéen yanaktiʼ relaciones sexuales. Jach jatsʼuts le baʼax u tsʼaamaj Diosoʼ, kʼaʼajaktoʼoneʼ tu táan letiʼeʼ le kuxtaloʼ jach koʼoj u tojol. Le oʼolaleʼ u kʼáat ka yanak k-paalal chéen yéetel le máax tsʼokaʼan k-beeloʼ, beyoʼ yaan k-eʼesik k-respetartik le tsʼoʼokol beeloʼ (Hebreos 13:4).

 Utiaʼal u bin maʼalobil tiʼ le máaxoʼob tsʼokaʼan u beeloʼoboʼ maʼ tsaaj u múul kajtaloʼob antes tiʼ u tsʼoʼokol u beeloʼobiʼ. Baʼax kʼaʼabéeteʼ letiʼe u comprometerkuba tu jaajil u yóol tu kaʼatúulaloʼob yéetel u múul meyajoʼob utiaʼal u aktáantkoʼob jeʼel baʼaxak problemaileʼ. a Leloʼ chéen ku béeytal kéen tsʼoʼokok u beel máak tumen beyoʼ ku comprometerkuba yéetel u núup (Mateo 19:6).

 Kex maʼ perfecto le máaxoʼob tsʼokaʼan u beeloʼoboʼ jeʼel u páajtal u bin maʼalobil tiʼobeʼ. Chéen baʼaleʼ kʼaʼabéet u tsʼáaikoʼob ichil u kuxtaloʼob le baʼax ku yaʼalik le Bibliaoʼ. Koʼox ilik jujunpʼéel tiʼ le baʼaxoʼob ku yaʼalikoʼ.

•   Kaxt u yutsil a núup (1 Corintios 7:3-5; Filipenses 2:3, 4).

•   Ilawil a yaabiltikabaʼex yéetel a respetarkabaʼex sáamsamal (Efesios 5:25, 33).

•   Antes tiʼ a tʼaaneʼexeʼ tukleʼex baʼax ken a waʼaleʼex (Proverbios 12:18).

•   Yanakteʼex paciencia yéetel ilawil a perdonarkabaʼex tu séebaʼanil (Colosenses 3:13, 14).