JEʼEX t-ilil teʼ xook máanikoʼ Jesuseʼ anchaj kiʼimak óolal ichil u kuxtal. Wa k-kʼáat ka yanaktoʼon kiʼimak óolaleʼ unaj k-kuxtal jeʼex letiʼeʼ yéetel unaj k-beetik le baʼax tu yaʼaloʼ.

Teʼ teksto yaan kaʼanaloʼ Jéeobaeʼ ku yaʼalik kʼaʼabéet k-xíimbal jeʼex Jesuseʼ. U kʼáat u yaʼaleʼ unaj k-kuxtal jeʼex tu kaʼansil yéetel tu beetil Jesusoʼ. Beyoʼ yaan k-lúubul utsil tiʼ Dios yéetel yaan u kiʼimaktal k-óol.

Jesuseʼ tu yaʼalaj baʼax unaj k-beetik utiaʼal «k-xíimbal» jeʼex letiʼeʼ. Teʼ tu Kaʼansajil le Puʼukoʼ jeʼel u páajtal k-xokik jujunpʼéel tiʼ le tsolnuʼukoʼobaʼ. Koʼox ilik bix jeʼel u páajtal k-tsʼáaikoʼob ichil k-kuxtaleʼ.

BIX U YÁANTKECH LE TSOLNUʼUKOʼ:

Jesuseʼ tu yaʼaleʼ deporsi kʼaʼabéet Dios tiʼ wíinik. Tuláakal máak ku taaktal u yojéeltik u núukil le kʼáatchiʼobaʼ: ¿Baʼax oʼolal kuxaʼanoʼon? ¿Baʼaxten k-muʼyaj? ¿U yaabiltmoʼon wa Dios? ¿Baʼax ku yúuchul ken kíimkoʼon? Utiaʼal ka kuxlakoʼon ich kiʼimak óolaleʼ kʼaʼabéet k-ojéeltik u jaajil yoʼolal le baʼaloʼoboʼ. ¿Tuʼuxiʼ? Jesuseʼ u yojel chéen junpʼéeliʼ tuʼux yaan u jaajil: ichil u Tʼaan Dios. Le ka orarnaj tiʼ u Taataeʼ tu yaʼalaj: «A tʼaaneʼ letiʼ u jaajil» (Juan 17:17). ¿Jach wa tu jaajil jeʼel u yáantkech le Biblia utiaʼal ka náatsʼkech tiʼ Dios yéetel ka yanaktech kiʼimak óolaleʼ?

MÁAX TSʼOʼOK U YÁANTIK:

Esa, juntúul máak ku kʼaay kaʼach ich junpʼéel banda de rock jach kʼaj óolaʼaneʼ, jach maʼalob u bin kaʼach tiʼ. Kex beyoʼ ku yuʼubik bey yaan baʼax ku bineltiktiʼeʼ. Letiʼeʼ ku yaʼalik: «Kex uts tin tʼaan tiaʼanen ichil le bandaoʼ, kin tsʼíiboltik kaʼach ka maas yanak u biilal in kuxtal». Ka máan kʼiineʼ tsikbalnaj yéetel juntúul u j-jaajkunaj Jéeoba. «Tin beetaj yaʼab kʼáatchiʼob tiʼ —ku yaʼalik Esa—. Le ka tin wilaj bix tu núukil yéetel le Bibliaoʼ taakchaj in maas kaanbal, ka káaj in xokik le Biblia tu yéeteloʼ. Le baʼax tu kanaj Esaoʼ kʼuch tu puksiʼikʼal, ka tu kʼubaj u kuxtal tiʼ Jéeoba. «Kaʼacheʼ maʼ tin jóokʼol tiʼ le talamiloʼoboʼ —ku yaʼalik—, baʼaleʼ bejlaʼeʼ tu jaajil kiʼimak in wóol.» *

BIX U YÁANTKECH LE TSOLNUʼUKOʼ:

U chʼaʼabal óotsilileʼ u kʼáat yaʼaleʼ u yeʼesik u yutsil máak tiʼ u maasil yéetel u yáantkoʼob. Jesuseʼ tu chʼaʼaj óotsilil tiʼ le máaxoʼob kʼaʼabéet áantaj tiʼoboʼ. Tumen náakʼ tu puksiʼikʼal le baʼax ku muʼyajtik le máakoʼoboʼ, tu yáantoʼob (Mateo 14:14; 20:30-34). Wa k-chʼaʼik óotsilil jeʼex tu beetil Jesuseʼ yaan u maas antaltoʼon kiʼimak óolal, tumen máax ku yeʼesik u yutsileʼ maas ku kiʼimaktal u yóol (Baʼaxoʼob 20:35). Le oʼolaleʼ maʼalob ka k-tʼaan yéetel utsil u maasil yéetel ka k-áantoʼob tiʼ baʼax kʼaʼabéettiʼob. Baʼaleʼ ¿jach wa tu jaajil jeʼel u maas kiʼimaktal k-óol wa k-eʼesik k-utsil tiʼ u maasileʼ?

MÁAX TSʼOʼOK U YÁANTIK:

Maria yéetel Carlos u yíichameʼ, jach ku yeʼeskoʼob utsil tiʼ u maasil. Mariaeʼ kimen u maama, yéetel u taataeʼ diabético. Ka pʼáat maʼ tu páajtal u líikʼil u taataeʼ, Maria yéetel Carloseʼ tu bisoʼob tu yotochoʼob utiaʼal u kanáantkoʼob. Yaʼab áakʼaboʼob maʼ tu weenloʼob yéetel yaʼab u téeneleʼ ku kʼaʼabéettal u biskoʼob teʼ hospitaloʼ. Yaan kʼiineʼ jach ku kaʼanaloʼob. Baʼaleʼ jeʼex tu yaʼalil Jesusoʼ jach kiʼimak u yóoloʼob,  tumen u yojloʼob táan u tsʼáaikoʼob tiʼ u taata Maria le baʼax kʼaʼabéettiʼoʼ.

BIX U YÁANTKECH LE TSOLNUʼUKOʼ:

Wa k-meyaj utiaʼal ka yanak jeetsʼelil tiʼ k-éet máakileʼ yaan k-bisikba maʼalob yéetel u maasil. Maʼalob ka k-beet le baʼax ku yaʼalik le Bibliaaʼ: «Wa ku béeytaleʼ, tak tuʼux ku páajtal a beetkeʼexeʼ, beeteʼex baʼax kʼaʼabéet utiaʼal ka yanakteʼex jeetsʼelil yéetel tuláakal máak» (Romailoʼob 12:18). Jeʼex k-ilkoʼ yéetel «tuláakal máak» unaj u yantaltoʼon jeetsʼelil, yéetel k-láakʼtsiloʼob bey xan yéetel máaxoʼob maʼ k-éet religioniloʼobiʼ. ¿Tu jaajil wa jeʼel u kiʼimaktal k-óol wa k-ilik u yantaltoʼon jeetsʼelil yéetel tuláakal máakeʼ?

MÁAX TSʼOʼOK U YÁANTIK:

Koʼox ilik baʼax úuch tiʼ juntúul koʼolel ku kʼaabaʼtik Nair. Desde úucheʼ yaʼab baʼax talamkúuntik u biskuba maʼalob yéetel u maasil, maases yéetel u láakʼtsiloʼob. Desde ka pʼaʼat tumen u yíicham walajki 15 jaʼaboʼobaʼ tu juunal ku líiʼsik u paalal. Juntúul u hijoeʼ ku drogarkuba yéetel yaan horaeʼ ku jach pʼuʼujul yéetel ku sajakkúuntik u maama yéetel u yíitsʼin. Le baʼax tu kanaj Nair teʼ Bibliaoʼ le áantik utiaʼal ka yanak jeetsʼelil tiʼ yéetel u maasil kex ka yanak talamiloʼob tiʼ. Ku kanáantik maʼ u baʼateʼel, ku yeʼesik u yutsil tiʼ u maasil yéetel ku yilik u naʼatkoʼob (Efesoiloʼob 4:31, 32). U kaxtik jeetsʼelil yéetel u maasileʼ ku yáantik utiaʼal u biskuba u maas maʼalobil ku páajtal yéetel u láakʼtsiloʼob bey xan yéetel uláakʼ máakoʼob.

Wa k-beetik le baʼax tu yaʼalaj Jesusoʼ tu jaajil yaan u yantaltoʼon kiʼimak óolal. Uláakʼ baʼax áantkoʼoneʼ letiʼe k-ojéeltik baʼax ku taal u kʼiinoʼ. Baʼaleʼ wa k-ojel chéen chʼíijil, kʼojaʼanil yéetel kíimil k-páaʼtikeʼ, ¿bix jeʼel k-uʼuyik kiʼimak óolaleʼ? Bejlaʼeʼ yaʼab máak bey u tuukuloʼ.

Baʼaleʼ ¡yaan baʼax jatsʼuts ku taal u kʼiin! Jéeobaeʼ yaan u kiʼikiʼtʼantkech wa ka «xíimbal xan jeʼex úuchik u xíimbal Jesuseʼ». Jéeobaeʼ u yaʼalmeʼ yaan u séeb taasik junpʼéel túumben yóokʼol kaab tuʼux minaʼan kʼasaʼanil yéetel tuʼux kun kuxtal máak jach jeʼex u tukultmil kaʼachoʼ: ich toj óolal utiaʼal mantatsʼ. Le Bibliaoʼ ku yaʼalik: «¡Ile! U pasel Dioseʼ tiʼ yaan yiknal le máakoʼoboʼ. Dioseʼ yaan u kajtal tu yéeteloʼob, letiʼob xaneʼ yaan u kʼuchul u beetubaʼob u kaajal. Jach beyoʼ, Dios kun yantal tu yéeteloʼob. Letiʼeʼ yaan xan u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil. Le baʼaxoʼob yanoʼob kaʼachoʼ tsʼoʼok u máanoʼob» (Apocalipsis 21:3, 4).

Maria, le koʼolel t-aʼalaj teʼ yáax xook yaan 84 jaʼaboʼob tiʼoʼ, kiʼimak yóol tumen u yojel yaan u béeytal le tʼaanoʼoboʼ. ¿Kux túun teech? ¿A kʼáat wa a wojéelt u maasil yoʼolal le «kuxtal jach tu jaajil kuxtal» kun antal yáanal u Reino Diosoʼ? (1 Timoteo 6:19). Wa beyoʼ aʼal tiʼ u j-jaajkunajoʼob Jéeoba yaan ta kaajal, wa túuxt junpʼéel carta tiʼ le máaxoʼob jóoʼsik le revistaaʼ. *