Profecía 2. Wiʼijil
Profecía 2. Wiʼijil
«Yaan u pʼáatal minaʼan baʼal jaantbil» (MARCOS 13:8).
● Juntúul máakeʼ bin yéetel u primoʼob, u sukuʼunoʼob yéetel u kiikoʼob tu kaajil Quaratadji (Níger). Lukʼoʼob teʼ tuʼux kajaʼanoʼob kaʼachoʼ tumen pʼáat minaʼan baʼal jaantbiliʼ. Chéen pʼelak kʼuchkeʼ ka peklaj luʼum. Sidi, u jefeil le chan kaajoʼ ku yaʼalik: «Le máakoʼ peklaj luʼum tumen maʼ tu páajtal u tsʼáaik baʼax kʼaʼabéet tiʼ u familia, le oʼolal suʼlak u pakt u yichoʼob».
BAʼAX KU YÚUCHUL. Tiʼ cada siete máakoʼob yaan way yóokʼol kaabeʼ juntúuleʼ minaʼan baʼal u jaante. Chéen baʼaleʼ tu luʼumil África, tu noojolil u desiertoil le Saharaoʼ, maas peor tumen tiʼ cada óoxtúul máakeʼ juntúuleʼ maʼ chúukaʼan u janaliʼ. Utiaʼal a maas naʼatikeʼ tuukulnen tiʼ junpʼéel familia tuʼux yaan le taatatsiloʼ, le maamatsiloʼ yéetel le hijotsiloʼ. Koʼox aʼalikeʼ le janal yaantiʼoboʼ chéen utiaʼal kaʼatúul máak, ¿máax kun pʼáatal maʼ tun janal? Lelaʼ letiʼe baʼax ku aktáantik sáamsamal yaʼab familiaʼoboʼ.
BAʼAX KU YAʼALAʼAL. Yaan janal utiaʼal tuláakal máak, chéen kʼaʼabéet u tʼoʼoxol tubeel.
¿JAAJ WA BAʼAX KU YAʼALAʼAL? U jaajileʼ tiʼ tuláakal yóokʼol kaabeʼ yaan yaʼab baʼal utiaʼal jaantbil. Le oʼolaleʼ wa ka u yil le gobiernoʼob u tʼoʼoxol le janal tiʼ tuláakal máakoʼ jeʼel u xuʼulul u muʼyajtaʼal wiʼijileʼ. Chéen baʼaleʼ kex tsʼoʼok u maan yaʼab años táan u yilik u beetkoʼobeʼ tak bejlaʼa maʼ tsaʼaykoʼobiʼ.
¿BAʼAX KA TUKLIK? ¿Jaaj wa le baʼax ku yaʼalik Marcos 13:8? ¿Láayliʼ wa táan u muʼyajtaʼal wiʼijil kex táan u beetaʼal yaʼab baʼaloʼob utiaʼal u yáantaʼal le máakoʼoboʼ?
Ichil le baʼaxoʼob kun eʼesik kuxaʼanoʼon tu tsʼook kʼiinoʼoboʼ táakaʼan le u tíitkuba le luʼum yéetel le u muʼyajtaʼal wiʼijiloʼ.
[Uláakʼ baʼax ku tsoʼolol]
«Yaʼab paalaloʼob tsʼoʼok u kíimloʼob yoʼolal neumonía, waachʼil, wa yoʼolal uláakʼ kʼojaʼaniloʼob chéen tumen maʼ chúukaʼan kaʼach u janaloʼobiʼ» (ANN M. VENEMAN, EX DIRECTORA EJECUTIVA TIʼ UNICEF).
[U yuumil le oochel]
© Paul Lowe/Panos Pictures