¿Baʼaxten ku séeb pʼatkubaʼob?

«Jujuntúul fariseoʼob u tukultmoʼob u túuntkoʼob u yóol [Jesuseʼ], náatsʼoʼob tu yiknaleʼ ka tu yaʼaloʼobtiʼ: “¿Maʼalob wa ka u divorciartuba juntúul máak tiʼ u yatan tu yoʼolal jeʼel baʼalakeʼ?”» (Mateo 19:3, NM)

¿JEʼEL wa u béeytal u múul máansik tuláakal u kuxtal kaʼatúul máaxoʼob ku tsʼoʼokol u beeloʼobeʼ? Le ka kʼáataʼab tiʼ Jesús wa jeʼel u páajtal u divorciarkuba máak chéen yoʼolal jeʼel baʼalakeʼ, letiʼeʼ tu yaʼaleʼ le ken tsʼoʼokok u beel máakeʼ utiaʼal tuláakal u kuxtal: «¿Maʼ wa a xokmajeʼex tiʼ le Kiliʼich Tsʼíiboʼ, le máax beet wíinikoʼob tu yáax chuuneʼ tu beetaj xiib yéetel koʼolel? Tu yaʼalaj xan: Tu yoʼolal lelaʼ juntúul xiibeʼ yaan u pʼatik u taata yéetel u maamaeʼ utiaʼal u nupikuba yéetel u yatan, tu kaʼatúuliloʼob bíin junpʼéelchajkoʼob. Beyoʼ maʼ kaʼatúuloʼobiʼ, baʼaleʼ juntúuliloʼob. Le oʼolaleʼ mix máak unaj u jatsik le baʼax nupaʼan tumen Jajal Dioseʼ» (Mateo 19:4-6). * K-ilik túuneʼ Dioseʼ maʼ u kʼáat ka u pʼatuba le máaxoʼob tsʼokaʼan u beeloʼoboʼ.

Baʼaleʼ yaʼab tuʼuxeʼ maas tiʼ cuarenta por ciento tiʼ le máaxoʼob ku tsʼoʼokol u beeloʼoboʼ ku divorciarkubaʼob. ¿U kʼáat wa túun u yaʼal tsʼoʼok u pʼáatal maʼatech u yáantik máak le tsolnuʼukoʼob ku tsʼáaik le Bibliaoʼ? ¿U kʼáat wa túun u yaʼal xan chéen kunel u tsʼoʼokol u beel máak?

Utiaʼal k-ketikeʼ, koʼox aʼalikeʼ juntúul íichamtsil yéetel u yataneʼ ku manikoʼob junpʼéel coche yéetel jach ku kanáantkoʼob le oʼolal jach maʼalob u meyaj. Uláakʼ juntúul íichamtsil yéetel u yataneʼ ku manikoʼob xan junpʼéel coche jach igual, baʼaleʼ letiʼobeʼ maʼatech u kanáantkoʼob le oʼolal ku kʼastal yéetel ku xúumpʼatkoʼob. ¿Baʼaxten séeb kʼaschaj u coche le uláakʼ íichamtsil yéetel u yatnoʼ? ¿Maʼ patal wa le coche tu manoʼoboʼ? U jaajileʼ maʼalob, baʼaleʼ maʼ tu kanáantoʼobiʼ.

Láayliʼ xan bey u yúuchul yéetel le máaxoʼob ku pʼatkubaʼoboʼ, yéetel maʼ u kʼáat u yaʼal wa letiʼe tsʼoʼokol beel beetik u bin kʼaasiltiʼoboʼ. Tumen u millonesil máaxoʼob tsʼokaʼan u beeloʼobeʼ, kiʼimak u yóoloʼob. Le tsʼoʼokol beeloʼ bey jeʼex junpʼéel cocheeʼ, utiaʼal maʼ u kʼastaleʼ, kʼaʼabéet u kanáantaʼal jeʼex unajeʼ.

Le Bibliaoʼ ku tsʼáaik tsolnuʼukoʼob jeʼel u yáantik le máaxoʼob tsʼokaʼan u beeloʼob utiaʼal ka u maas yaabiltubaʼob kex úuch tsʼoʼokok u beeloʼoboʼ. ¿A kʼáat wa a wojéelt jujunpʼéel tiʼ le tsolnuʼukoʼobaʼ? Wa beyoʼ, k-invitarkech a xok le uláakʼ jaatsoʼ.

[Tsolajil]