Le baʼaxoʼob ku taal u kʼiinil u yúuchloʼ

LE APÓSTOL Pedrooʼ le ka tʼaanaj tiʼ baʼax ku taal u kʼiin u yúuchul tiʼ le Luʼumaʼ yéetel tiʼ le máakoʼoboʼ, tu yaʼalaj: «Táan k-páaʼtik le túumben kaʼanoʼoboʼ yéetel le túumben luʼum u tsʼaatʼantmaj Jajal Diosoʼ, tuʼux tuláakal baʼal toj» (2 Pedro 3:13). Le profeta Isaíasoʼ tsʼokaʼaniliʼ u tʼaan tiʼ «jumpʼéel túumben kaʼan yéetel jumpʼéel túumben luʼum[eʼ]» (Isaías 65:17; 66:22). Baʼaleʼ le ka tu chʼaʼachiʼitaj Pedro le baʼax tu yaʼalaj Isaíasoʼ tu yaʼalaj maʼ láaj béeychajkiʼ.

Óoliʼ xan dos mil jaʼaboʼob bejlaʼeʼ, tiʼ apóstol Juaneʼ tsʼaʼab u yileʼ «le túumben luʼum[oʼ]» yaan baʼax u yil yéetel le utsiloʼob ken u taas  u Reino Diosoʼ (Apocalipsis 21:1-4). Jeʼex tsʼoʼok k-ilkoʼ, tuláakal le baʼax tu yaʼalaj Jesús yéetel Pablo kun úuchloʼob táanil tiʼ u káajal u gobernar u Reino Dios way Luʼumeʼ, táan u béeytaloʼob. Le oʼolal k-aʼalikeʼ jach maʼ yaʼab u bin utiaʼal u káajal u gobernartaʼal le Luʼum tumen le Reinoaʼ. Baʼaleʼ ¿bix le kuxtal kun antaloʼ? Koʼox ilik baʼax ku yaʼaliktoʼon u libroi Isaías.

Le baʼaxoʼob kun ilbil teʼ túumben luʼumoʼ

Tuláakal máak kun kuxtal ich jeetsʼelil yéetel yaan u adorarkoʼob Dios. «Bíin u sutoʼob u kaʼamáat yej máaskaboʼobeʼ u nuʼukulil meyaj[,] u lóomteʼobeʼ [wa u lanzaʼobeʼ] bíin u sutoʼob lóobcheʼil. Mix jumpʼéel kaaj bíin u chʼaʼa u nuʼukul u baʼateʼel utiaʼal u bin u baʼatelt yaanal kaaj, mix bíin kʼaʼabéetchajak u yúuchul kaʼambesaj utiaʼal baʼateliʼ.» (Isaías 2:2-4.)

Yaan u yantal jeetsʼelil ichil le máakoʼoboʼ, yéetel le baʼalcheʼoboʼ maʼ ken u beetoʼob loob. «Bey túunoʼ, lobo yéetel tamaneʼ, bíin [u bisubaʼob], chak moʼol yéetel chan yuukeʼ, bíin múul jeʼelekoʼob, chan wakax yéetel leoneʼ, bíin nuukchajkoʼob paʼteʼ bíin u chaʼob u bisaʼaloʼob tumen juntúul chan xiʼipal. X-wakax yéetel x-osaeʼ, bíin u bisubaʼob, u mejeniloʼobeʼ, bíin múul jeʼelekoʼob. Leoneʼ, bíin u jaant xíiw jeʼel bix wakaxeʼ. [...] Mix máak bíin yanak utiaʼal u beet loob tin kiliʼich joʼol luʼum, tumen jeʼel bix u chuʼupul le kʼáaʼnáab yéetel le jaʼoʼ, bey bíin chuʼupuk le múuchʼ kaajoʼob yéetel u kʼaj óolal Yuumtsil» Jéeobaoʼ (Isaías 11:6-9).

Jach yaan u yantal baʼal jaantbil. «Tu puʼukil Sioneʼ, Yuumtsil u yuumil tuláakal páajtalileʼ táan u nuʼukbesik utiaʼal tuláakal múuchʼ kaajoʼob jumpʼéel kiʼikiʼ noj janal yéetel [...] kiʼikiʼ janaloʼob yéetel u [maas] maʼalobil vinoʼob.» (Isaías 25:6.)

Yaan u luʼsaʼal le kíimiloʼ. «Yuumtsileʼ, bíin u xuʼuls jumpuliʼ le kíimiloʼ, bíin u choʼo u jaʼil u yich tuláakal máak bíin xan u beet u saʼatal tiʼ tuláakal u yóokʼol kaab u paj subtalil u kaajal.» (Isaías 25:8.)

Yaan u kaʼa kuxkíintaʼal le kimenoʼoboʼ. «A kimenoʼobeʼ, bíin kaʼa kuxlakoʼob, u kimen wíinkliloʼobeʼ, bíin kaʼa kuxlakoʼob. Le máaxoʼob ku weneloʼob teʼ luʼumoʼ bíin ajakoʼob yéetel bíin awatnakoʼob yéetel kiʼimak óolal. [...] Le kimenoʼoboʼ bíin kaʼa síijikoʼob tiʼ le luʼumoʼ.» (Isaías 26:19.)

Cristoeʼ yaan u beetik justicia. «Maʼ bíin [juzgarnak] chéen tu yoʼolal baʼax ku tsikbaltaʼaliʼ, maʼ bíin xotʼkʼiinak chéen tu yoʼolal mukul tʼaanoʼobiʼ. Bíin toj [juzgarnak] utiaʼal le j-maʼ óoloʼoboʼ, bíin u kanáant ka tsʼaʼabak baʼaxoʼob ku náajmatikoʼob u yóotsililoʼob le múuchʼ kaajoʼoboʼ.» (Isaías 11:3, 4.)

 Yaan u tsʼakaʼal le chʼóopoʼob yéetel le kóokoʼoboʼ. «Le chʼóopoʼob túunoʼ bíin paakatnakoʼob, le kóokoʼoboʼ bíin uʼuyajnakoʼob.» (Isaías 35:5.)

Le desiertooʼ yaan u loolankil. «Kiʼimakchajak u yóol le [desiertooʼ], luʼum tikin; sen kiʼimakchajak u yóol, ka loolnak, loolnak jeʼel bix u lool tsʼulaʼeʼ, sen yanak kiʼimak óolal tiʼ.» (Isaías 35:1, 2.)

Yaan u yantal «jumpʼéel túumben luʼum». «Teneʼ bíin in kaʼaj in beet jumpʼéel túumben kaʼan [wa upʼéel túumben gobierno teʼ kaʼanoʼ] yéetel jumpʼéel túumben luʼum [wa utsul wíinikoʼob ku kuxtaloʼob way Luʼumeʼ]. Le baʼax tsʼoʼok u yúuchuloʼ bíin tuʼubsaʼak, maʼ bíin kʼaʼajak tiʼ mix máakiʼ. Kiʼimakchajak [a] wóoleʼex jumpuliʼ tu yoʼolal baʼax kin in beete. [...] [Teʼ paraísooʼ] máaxoʼob ku beetikoʼob u yotochoʼobeʼ bin kajlakoʼob ichiloʼob, máaxoʼob pakʼik uvaʼobeʼ bíin u jaantoʼob u yich. Maʼ bíin kajlak yaanal máak tiʼ le naj ku beetaʼal tumen uláakʼ máakiʼ, wa ka jaantaʼak u yich u pakʼal uva tumen [...] yaanal. In kaajaleʼ bíin chowakchajak u kuxtal jeʼel bix u kuxtal junkúul cheʼeʼ; le máaxoʼob in yéeymajoʼobeʼ bíin u jaantoʼob u yich u meyajoʼob. Maʼ bíin meyajnakech chéen kuneliʼ mix bíin yanak u séeb kíimil a paalaloʼobiʼ, tumen letiʼobeʼ u chʼiʼibaloʼob máaxoʼob kiʼtʼantaʼanoʼob tumen Yuumtsil, bey xan u chʼiʼibaloʼob letiʼob. Maʼiliʼ u tʼanenoʼobeʼ teen bíin in núuktiʼob; maʼiliʼ tsʼoʼokok u tʼaanoʼobeʼ teen bíin in wuʼuyoʼob.» «Yuumtsileʼ ku yaʼalik xan: [Jeʼex] bíin in kaʼaj in beet jumpʼéel túumben kaʼan yéetel jumpʼéel túumben luʼum utiaʼal minaʼan u xuuleʼ, bey xan bíin xáanak a chʼiʼibaloʼob bey xan a kʼaabaʼ.» (Isaías 65:17-25; 66:22.)

Le baʼax ku taal u kʼiinoʼ

Maʼ chéen tu libroi Isaías ku yaʼalaʼal baʼax ku taal u kʼiin u yúuchliʼ. Ichil tuláakal le Biblia ku yaʼalaʼal baʼax ken u beet u Reino Dios ken káajak u gobernar Cristo way Luʼumeʼ. * ¿A kʼáat wa kuxtal teʼ paraíso kun antaloʼ? Le Bibliaoʼ ku yaʼalik baʼax u tukulmaj u beetik Dios ichil upʼíit kʼiin yéetel baʼax kʼaʼabéet a beetik. Wa a kʼáateʼ u j-jaajkunajoʼob Jéeobaeʼ (testigos de Jehová) jeʼel u yáantkechoʼob a wojéelt baʼax kʼaʼabéet a beetkeʼ.

[Tsolajiloʼob]

[U tsolajil le oochel teʼ táan juʼun 8]

Yaan u yantal jeetsʼelil ichil le máakoʼoboʼ, yéetel le baʼalcheʼoboʼ maʼ ken u beetoʼob loob

[U tsolajil le oochel teʼ táan juʼun 9]

Yaan u kaʼa kuxkíintaʼal le kimenoʼoboʼ

[U tsolajil le oochel teʼ táan juʼun 10]

Yaan u suʼutul paraísoi le Luʼumaʼ