1, 2. 1) Le máaxoʼob meyajtik Jéeobaoʼ, ¿baʼaxten ku yilik u tsʼáaikubaʼob tu favor? (Ilawil le dibujo yaan tu káajbal le xookaʼ.) 2) ¿Baʼax u yaabiltmaj le máakoʼob teʼ kʼiinoʼobaʼ, yéetel baʼax ku yúuchul yoʼolal lelaʼ?

LE MÁAXOʼOB meyajtik Jéeobaoʼ maʼatech u táakpajloʼob tiʼ le baʼaloʼob beetik u pʼektikuba le máakoʼoboʼ, ichil le baʼaloʼobaʼ tiaʼan le u yaabiltik máak le luʼum tuʼux síijoʼ, u raza wa le baʼaloʼob suuk u beetaʼal teʼ tuʼux kajaʼanoʼ. ¿Baʼaxten? Tumen u yaabiltmoʼob Jéeoba, tiaʼanoʼob tu favoreʼ yéetel ku beetkoʼob baʼax ku kaʼansik (1 Juan 5:3). Kex jeʼel tuʼuxak kajaʼanoʼob wa kex jeʼel tuʼuxak u taaloʼobeʼ, ku beetkoʼob baʼax ku kaʼansik Dios. Letiʼobeʼ maas kʼaʼanaʼan u yilkoʼob u yantaloʼob tu favor Jéeoba yéetel u Reino (Mat. 6:33). Le oʼolaleʼ «maʼ yóokʼol kaabiloʼobiʼ» (xok Juan 17:11, 15, 16; Isa. 2:4).

² Bejlaʼeʼ le máakoʼoboʼ jach u yaabiltmaj u luʼumiloʼob, u kaajaloʼob, le baʼaxoʼob suuk u beetaʼal teʼ tuʼux kajaʼanoʼoboʼ wa junpʼéel equipo tiʼ wa baʼax deporteil. Tu yoʼolal le baʼaloʼobaʼ yaʼab máakoʼob ku competiroʼob utiaʼal u yilkoʼob máax maas maʼalob, ku pʼektikubaʼob yéetel yaan horaeʼ hasta ku kíimskoʼob le máaxoʼob ku tsʼáaikubaʼob tu contraʼoboʼ. Toʼoneʼ maʼatech k-táakpajal tiʼ baʼaloʼob beyaʼ, chéen baʼaleʼ jeʼel u afectarkoʼoneʼ, jeʼel u afectartik k-familiaeʼ  yéetel maʼ xaaneʼ jeʼel tak u beetaʼaltoʼon loobeʼ. Yaan horaeʼ séeb jeʼel k-tsʼáaikba tu contra wa tu favor junpʼéel baʼaleʼ, jeʼex ken u chʼaʼtukult u beetik junpʼéel baʼal maʼ maʼalob le gobiernooʼ. Lelaʼ beyoʼ tumen Jéeobaeʼ tu tsʼáajtoʼon u páajtalil k-tsʼáaik cuenta baʼax maʼalob yéetel baʼax maʼ maʼalobiʼ (Gén. 1:27; Deu. 32:4). ¿Bix a wuʼuyikaba ken a wil táan u beetaʼal baʼax maʼ maʼalob tumen le gobiernooʼ? ¿K-chʼaʼtuklik wa maʼ k-tsʼáaikba mix tu favor mix tu contra?

3, 4. 1) ¿Baʼaxten maʼatech k-tsʼáaikba tu favor le gobiernoʼoboʼ? 2) ¿Baʼax ken k-il teʼ xookaʼ?

³ Yaʼab máakoʼobeʼ ken yanak wa baʼax problemaileʼ ku tsʼáaikubaʼob tu favor le gobiernoʼoboʼ tumen ku yaʼalaʼaltiʼob letiʼe baʼax unaj u beetkoʼoboʼ. Chéen baʼaleʼ toʼoneʼ maas k-tsʼáaikba tu favor Jesús. Le oʼolaleʼ maʼatech k-oksikba tiʼ política mix tech k-táakpajal tiʼ guerra (Mat. 26:52). Toʼoneʼ maʼatech k-tuklik wa yaan u jaats u yóokʼol kaab Satanás maas maʼalob tiʼ uláakʼ (2 Cor. 2:11). Junpuliʼ maʼ k-kʼáat k-oksba tiʼ le baʼaxoʼob ku yúuchul teʼ yóokʼol kaabaʼ (xok Juan 15:18, 19).

⁴ Tumen j-kʼeban máakoʼoneʼ maʼ xaaneʼ yaan tiʼ toʼoneʼ jeʼel u mixbaʼalkúuntik u maasileʼ (Jer. 17:9; Efe. 4:22-24). Teʼ xookaʼ yaan k-ilik bix u yáantkoʼon le Biblia utiaʼal k-luʼsik t-pool le tuukul beyaʼ tumen chéen ku beetik u pʼektikuba máak. Yaan xan k-ilkeʼ utiaʼal k-tsʼáaikba tu favor le Reinooʼ kʼaʼabéet k-tuukul jeʼex Jéeoba yéetel Jesuseʼ.

5, 6. 1) Ka taal Jesús way Luʼumeʼ, ¿yaan wa máakoʼob maas maʼalob úuchik u tratartik? 2) ¿Baʼaxten Jesuseʼ maʼ tu kaʼansaj wa yaan máakoʼob maas maʼaloboʼob tiʼ u maasiliʼ?

⁵ Ken k-uʼuy taak k-tsʼáaikba tu favor wa tu contra wa máaxeʼ, maʼalob ka k-tukult lelaʼ: «¿Baʼax jeʼel u beetik Jesús kaʼacheʼ?». Ka taal Jesús way luʼumeʼ u kajnáaliloʼob Judea, Galilea yéetel Samariaeʼ maʼatech u biskubaʼob. Le judíoʼob yéetel le samaritanoʼoboʼ maʼatech u tʼankubaʼob (Juan 4:9). Le fariseoʼob yéetel le saduceoʼoboʼ tiʼ yaʼab baʼaloʼob maʼ de acuerdoʼobiʼ (Bax. 23:6-9). Le judíoʼob jach u kanmoʼob tubeel baʼax ku yaʼalik le Ley tsʼaʼab tiʼ Moisesoʼ ku yaʼalikoʼobeʼ maas yaʼab baʼal u yojloʼob ke u maasil judíoʼoboʼ (Juan 7:49). Tsʼoʼoleʼ yanoʼobeʼ ku pʼektikoʼob le máaxoʼob kʼamik le impuestoʼoboʼ bey xan le romanoʼoboʼ (Mat. 9:11). Chéen baʼaleʼ Jesuseʼ maʼ tu tsʼáajuba tu favor mix máakiʼ. Letiʼeʼ mantatsʼ tu defendertaj baʼaxoʼob ku kaʼansik Jéeoba yéetel u yojel u kaajil Israeleʼ letiʼe kaaj yéeyaʼan tumen Diosoʼ, kex beyoʼ mix juntéen tu kaʼansaj tiʼ u disipuloʼob wa maas maʼaloboʼob tiʼ u maasil (Juan 4:22). Baʼaxeʼ tu kaʼansajtiʼob ka u yaabiltoʼob tuláakal máak (Luc. 10:27).

⁶ ¿Baʼaxten Jesuseʼ maʼ tu kaʼansaj wa yaan máakoʼob maas maʼaloboʼob tiʼ u maasiliʼ? Tumen letiʼ yéetel u Taataeʼ u yaabiltmoʼob tuláakal máak. Jéeobaeʼ tu beetaj wíinik utiaʼal u páajtal u chupik le Luʼum yéetel jejeláas razaʼoboʼ (Gén. 1:27, 28). Jeʼex k-ilkoʼ Jéeoba yéetel Jesuseʼ maʼatech u yilkoʼob wa yaan raza, idioma wa junpʼéel nación maas maʼalob tiʼ u maasil (Bax. 10:34, 35; Apo. 7:9, 13, 14). Toʼoneʼ unaj k-seguertik u ejemplo Jéeoba yéetel Jesús (Mat. 5:43-48).

7, 8. 1) ¿Máax favor yanoʼon, yéetel baʼaxten? 2) ¿Baʼax maʼ unaj k-tuʼubsikiʼ?

⁷ ¿Baʼaxten maʼatech k-apoyartik u gobierno wíinik? Tumen tu favor Jéeoba yanoʼon, chéen letiʼ gobernartikoʼon. Tu jardinil Edeneʼ, Satanaseʼ tu yaʼaleʼ yaan uláakʼ máax jeʼel u páajtal u gobernartik wíinik maas maʼalobeʼ. Letiʼeʼ u kʼáat ka k-creerteʼ le bix u gobernaroʼ maas maʼalob tiʼ bix u gobernar Dios. Jéeobaeʼ ku chaʼik k-chʼaʼtuklik t-juunal máax favor k-kʼáat antal. Le oʼolaleʼ maʼalob ka k-tukult baʼax táan k-beetik. Tukle: «¿Kin beetik wa baʼax ku yaʼalik Jéeoba tumen in wojel letiʼe baʼax maas maʼaloboʼ, wa kin beetik chéen  le baʼax kin tuklik maas maʼaloboʼ? ¿Kin creertik wa chéen u Reino Dios kun utskíintik le problemaʼoboʼ? ¿Kin tuklik wa maas jeʼel u bin utsil tiʼ máak wa ka u nuʼuktuba tu juunal sin ke u yáantaʼal tumen Dioseʼ?» (Gén. 3:4, 5).

⁸ Wa ka kʼáataʼaktech baʼax ka tuklik yoʼolal junpʼéel partido político wa yoʼolal uláakʼ organización ku baʼateltik wa baʼax derechoileʼ, ¿baʼax jeʼel a waʼalikeʼ? Yaan horaeʼ le máakoʼob yanoʼob ichil le organizacionoʼobaʼ taak u yáantkoʼob máak. Chéen baʼaleʼ unaj k-kʼaʼajsikeʼ chéen u Reino Jéeoba jeʼel u páajtal u xuʼulsik tuláakal le baʼaxoʼob beetik u muʼyaj máakoʼ yéetel u xuʼulsik le injusticiaoʼ. Teʼ múuchʼuliloʼ k-chaʼik u nuʼuktikoʼon Jéeoba tu lugar k-beetik chéen le baʼax k-tuklik maʼaloboʼ. Le oʼolal junmúuchʼ yaniloʼon.

9. ¿Baʼax problemail yaan kaʼach ichil le sukuʼunoʼob teʼ yáax siglooʼ, yéetel baʼax aʼalaʼabtiʼob ka u beetoʼob?

⁹ Teʼ yáax siglooʼ le sukuʼunoʼob yanoʼob Corintooʼ táan kaʼach u baʼateloʼob tumen jujuntúuloʼobeʼ ku yaʼalikoʼob: «Teneʼ u disipuloen Pablo», «teneʼ u disipuloen Apolos», «teneʼ u disipuloen Cefas» yéetel «teneʼ u disipuloen Cristo». Ka tu yojéeltaj Pablo lelaʼ jach jaʼakʼ u yóol, tumen le baʼax ku tuklikoʼob kaʼachaʼ jeʼel u beetik u jatskuba le múuchʼuliloʼ. Yoʼolal le baʼax ku yúuchlaʼ Pabloeʼ tu yaʼaleʼ bey ‹jaʼajatspajaʼan Cristo ichiloʼobeʼ›. Tsʼoʼoleʼ tu yaʼalaj xan tiʼob: «Beora túunaʼ, sukuʼuneʼex, tu kʼaabaʼ k-Yuumtsil Jesucristoeʼ kin jach aʼalikteʼex ka tʼaanakeʼex yéetel junpʼéeliliʼ tuukul yéetel maʼ u yantal jatslantáambail ichileʼex, baʼaxeʼ ka yanakteʼex junpʼéeliliʼ tuukul yéetel ka junpʼéeliliʼchajak bix a tuukuleʼex». Teʼ kʼiinoʼobaʼ láayliʼ maʼ unaj u yantal jatslantáambail ichil le múuchʼuliloʼ (1 Cor. 1:10-13; xok Romailoʼob 16:17, 18).

10. ¿Baʼax tu yaʼalaj Pablo tiʼ le yéeyaʼanoʼoboʼ, yéetel baʼax ku kaʼansik toʼon lelaʼ?

¹⁰ Pabloeʼ tu yaʼalaj tiʼ le sukuʼunoʼob yéeyaʼanoʼoboʼ u kaajaloʼobeʼ letiʼe kaʼanoʼ, le oʼolal maʼ unaj u yoksikubaʼob tiʼ «u baʼalubaʼob le Luʼumaʼ» (Fili. 3:17-20). * Le yéeyaʼanoʼoboʼ ku tʼaanoʼob tu kʼaabaʼ Dios yéetel Cristo. Ken túuxtaʼak juntúul embajador wa representante tiʼ uláakʼ luʼumileʼ maʼatech u yoksikuba tiʼ u problemaʼob wa u politicail le luʼumil tuʼux ku binoʼ. Le máaxoʼob yéeyaʼanoʼob xanoʼ maʼatech u yoksikubaʼob tiʼ política wa tiʼ le problemaʼob yaan teʼ yóokʼol kaabaʼ (2 Cor. 5:20). Le máaxoʼob xan kun pʼáatloʼob kuxtal way Luʼumoʼ ku tsʼáaikubaʼob tu favor u Reino Dios yéetel maʼatech u yoksikubaʼob tiʼ le baʼaxoʼob ku beetaʼal teʼ yóokʼol kaabaʼ.

11, 12. 1) ¿Tiʼ baʼax unaj k-kanáantikba utiaʼal k-antal tu favor u Reino Dios? 2) ¿Bix u tuukul kaʼach juntúul kiik yoʼolal u maasil máakoʼob, yéetel baʼax áant u kʼex bix u tuukul?

¹¹ Yaʼab tuʼuxoʼobeʼ le máakoʼoboʼ maas uts tu tʼaan u biskubaʼob yéetel u yéet luʼumiloʼob, tumen u yojloʼob baʼax suukaʼan u beetaʼal tuʼux kajaʼanoʼob yéetel yaan horaeʼ junpʼéeliliʼ idioma u yojloʼobeʼ. Le oʼolal yaan horaeʼ jach ku creertikubaʼob yoʼolal tuʼux u taaloʼob. Pero toʼoneʼ unaj k-kanáantikba utiaʼal maʼ k-tuukul beyaʼ. Utiaʼal lelaʼ unaj k-kʼexik bix k-tuukul yéetel k-kaʼansik k-conciencia, beyoʼ kex jeʼel baʼaxak ka úuchkeʼ yaan k-tsʼáaikba tu favor Jéeoba. ¿Bix jeʼel k-kaʼansik k-concienciaeʼ?

¹² Koʼoneʼex ilik baʼax úuch tiʼ Mirjeta. * Letiʼeʼ síij teʼ kaaj kʼaj óolaʼan kaʼach bey Yugoslaviaoʼ. Teʼ tuʼux líikʼoʼ le máakoʼoboʼ jach u pʼekmoʼob le serbioʼoboʼ. Ka joʼopʼ u xokik le Bibliaoʼ tu kaneʼ Jéeobaeʼ u yaabiltmaj tuláakal máak kex yaanal u raza yéetel tu kanaj xaneʼ Satanaseʼ u kʼáat ka u pʼekt máak u yéet máakil. Le oʼolaleʼ tu tsʼáaj u yóol utiaʼal u kʼexik  bix u tuukul. Chéen baʼaleʼ ka káaj junpʼéel guerra ichil le máakoʼob teʼ tuʼux kajaʼanoʼ, Mirjetaeʼ káaj u pʼektik tu kaʼatéen le serbioʼoboʼ. Pʼáat maʼ taak u kʼaʼaytik le maʼalob péektsil tiʼoboʼ. Letiʼeʼ u yojel maʼ maʼalob bix u tuukuliʼ, le oʼolal tu sen kʼáataj tiʼ Jéeoba ka áantaʼak utiaʼal ka xuʼuluk u yuʼubikuba beyoʼ. Tu kʼáataj xan tiʼ Jéeoba ka áantaʼak utiaʼal ka u beet u precursorail. Mirjetaeʼ ku yaʼalik: «Jach tu yáanten in maas tsʼáa in wóol teʼ kʼaʼaytajoʼ. Ken jóokʼken kʼaʼaytajeʼ kin wilik in weʼesik yaabilaj jeʼex Jéeobaeʼ yéetel bejlaʼeʼ tsʼoʼok u xuʼulul in pʼektik in wéet máakil».

13. 1) ¿Baʼax úuch tiʼ Zoila, yéetel baʼax tu beetaj? 2) ¿Baʼax ku kaʼansiktoʼon le baʼax úuch tiʼ Zoilaoʼ?

¹³ Zoilaeʼ, juntúul kiik síij México pero kajaʼan Europa bejlaʼeʼ. Teʼ múuchʼulil tuʼux ku binoʼ yaan sukuʼunoʼob yéetel kiikoʼob Latinoamérica u taaloʼob. Zoilaeʼ ku yaʼalikeʼ jujuntúul tiʼ le sukuʼunoʼobaʼ ku burlarkoʼob ken tʼaanakoʼob tiʼ le luʼumil tuʼux u taaloʼ, tiʼ le baʼax suuk u beetaʼaloʼ bey xan le paax suuk u yuʼubaʼaloʼ. Ken u yuʼub lelaʼ jach ku yaatal u yóol, le oʼolal tu sen kʼáataj u yáantaj Jéeoba utiaʼal maʼ u yuʼubikuba beyaʼ. Wa tiʼ toʼon ka úuchuk lelaʼ, ¿baʼax jeʼel k-beetkeʼ? Yaan jujuntúul sukuʼunoʼob yéetel kiikoʼobeʼ táan u tsʼáaik u yóoloʼob utiaʼal maʼ u kʼuuxiloʼob ken aʼalaʼak wa baʼax tu yoʼolal le luʼumil tuʼux u taaloʼoboʼ. Toʼon xaneʼ unaj k-kanáantik baʼax k-aʼalik yéetel k-beetik utiaʼal maʼ k-tsʼáaik naʼatbil wa yaan máaxoʼob maas maʼaloboʼob tiʼ u maasil. Maʼ k-kʼáat k-beet u jatskuba le sukuʼunoʼob teʼ múuchʼuliloʼ mix uláakʼ máakoʼob (Rom. 14:19; 2 Cor. 6:3).

14. ¿Baʼax jeʼel u yáantkoʼon utiaʼal k-kʼexik k-tuukuleʼ?

¹⁴ Tuláakal le máaxoʼob meyajtik Jéeobaoʼ junmúuchʼ yaniloʼob, tsʼoʼoleʼ mix juntéen ku tuklikoʼob wa yaan junpʼéel kaaj wa luʼumil maas maʼalob tiʼ uláakʼ. Chéen baʼaleʼ k-láakʼtsiloʼob wa le máaxoʼob yanoʼob teʼ tuʼux líikʼoʼonoʼ jeʼel u beetkoʼob k-creertikba yoʼolal k-kaajal wa le luʼumil tuʼux k-taaloʼ. Le oʼolal yaan horaeʼ jeʼel u kaajal k-mixbaʼalkúuntik le máaxoʼob yaanal u luʼumiloʼob, u idiomaʼob, u razaʼob wa le baʼaxoʼob suuk u beetkoʼoboʼ. ¿Baʼax jeʼel u yáantkoʼon utiaʼal maʼ k-tuukul beyaʼ? Letiʼe k-tuukul tiʼ bix u yilik Jéeoba le máaxoʼob ku creertikoʼob maas maʼalob u razaʼob wa le luʼumil tuʼux u taaloʼoboʼ. Jeʼel u yáantkoʼon xan k-maas xakʼaltik teʼ Adoración ich Familia baʼax jeʼel u yáantkoʼon utiaʼal k-kʼexik k-tuukuleʼ. Unaj k-kʼáatik xan tiʼ Jéeoba ka u yáantoʼon k-il u maasil jeʼex u yilik letiʼoʼ (xok Romailoʼob 12:2).

15, 16. 1) Tumen táan k-meyajtik Jéeoba yéetel junpʼéel maʼalob concienciaeʼ, ¿bix k-ilaʼal tumen u maasil? 2) Le taatatsiloʼoboʼ, ¿bix jeʼel u yáantik u paalaloʼob utiaʼal u tsʼáaikubaʼob tu favor Jéeobaeʼ?

¹⁵ Toʼoneʼ táan k-meyajtik Jéeoba yéetel junpʼéel maʼalob conciencia, le oʼolal jelaʼanoʼon tiʼ k-éet meyajoʼob, k-éet xookoʼob, k-vecinoʼob wa k-láakʼtsiloʼob (1 Ped. 2:19). Jesuseʼ tu yaʼaleʼ yaan k-pʼektaʼal tumen jelaʼanoʼon tiʼ u maasil. Chéen baʼaleʼ maʼ unaj u tuʼubultoʼoneʼ le máaxoʼob pʼektikoʼonoʼ maʼ u yojloʼob wa kʼaʼabéet u tsʼáaikubaʼob tu favor u Reino Diosiʼ. Le oʼolaleʼ maʼ tu naʼatkoʼob baʼaxten maʼatech k-tsʼáaikba tu favor u gobierno wíinik.

¹⁶ Utiaʼal k-tsʼáaikba tu favor Jéeobaeʼ, kʼaʼabéet k-beetik baʼax ku yaʼalik kex jeʼel baʼaxak ka beetaʼak wa ka aʼalaʼaktoʼoneʼ (Dan. 3:16-18). Le táankelem paalaloʼob meyajtik Diosoʼ yaan horaeʼ maʼ chéen chʼaʼabil u yilkoʼob u beetkoʼob baʼax ku yaʼalikiʼ tumen u maasil paalaloʼoboʼ jelaʼanoʼob tiʼ letiʼob. Le oʼolaleʼ, taatatsileʼex, áant a paalaleʼex utiaʼal u tsʼáaikubaʼob tu favor Jéeoba teʼ escuelaoʼ. Maʼ xaaneʼ a paalaleʼexeʼ ku sajaktaloʼob ken aʼalaʼaktiʼob ka u saludartoʼob le bandera wa ka táakpajkoʼob tiʼ uláakʼ baʼaloʼob ku bin tu contra baʼax ku yaʼalik Diosoʼ. Ken yanakteʼex le Adoración ich Familiaoʼ xokeʼex le  baʼaxoʼob ku tuklik Jéeoba tu yoʼolal le baʼaloʼobaʼ. Kaʼanseʼextiʼob u tsoloʼob tubeel baʼax ku creertikoʼob yéetel tsiikil (Rom. 1:16). Tsʼoʼoleʼ wa ka wilkeʼex kʼaʼabéeteʼ, tʼaaneneʼex yéetel u maestroʼob utiaʼal a tsolkeʼextiʼob baʼaxoʼob k-creertik.

17. ¿Baʼax maʼ maʼalob ka k-tukultiʼ, yéetel baʼaxten?

¹⁷ Maʼ kʼaas u kiʼimaktal k-óol tu yoʼolal le baʼaxoʼob yaan teʼ tuʼux líikʼoʼon jeʼex le jaanloʼ, le idiomaoʼ, le baʼaxoʼob suuk u beetaʼaloʼ wa uláakʼ baʼaloʼob. Chéen baʼaleʼ, ¿máasaʼ maʼ maʼalob ka u tukult máak minaʼan uláakʼ baʼaxoʼob maas maʼalobtak ke le yaan teʼ luʼum tuʼux k-taaloʼ? Jéeobaeʼ u kʼáat ka k-disfrutart tuláakal le baʼaxoʼob u beetmoʼ (Sal. 104:24; Apo. 4:11). Le oʼolaleʼ, ¿máasaʼ junpuliʼ maʼ maʼalob ka k-tukult maas maʼalob bix k-beetik wa baʼaxiʼ?

18. ¿Baʼaxten maʼalob ka tuukulnakoʼon jeʼex Jéeobaeʼ?

¹⁸ Jéeobaeʼ u kʼáat ka kʼaj óoltaʼak, ka adorartaʼak yéetel ka yanak kuxtal minaʼan u xuul tiʼ tuláakal máak (Juan 3:16; 1 Tim. 2:3, 4). Toʼoneʼ kex yaanal bix k-tuukuleʼ wa maʼ tu bin tu contra Jéeoba baʼax ku tukultik le sukuʼunoʼoboʼ k-kʼamik. Lelaʼ ku beetik u yantaltoʼon kiʼimak óolal tsʼoʼoleʼ ku beetik k-bisikba maʼalob yéetel le sukuʼunoʼoboʼ. Jeʼex tsʼoʼok k-ilik teʼ xookaʼ, tumen k-kʼáat antal tu favor Jéeobaeʼ maʼatech k-oksikba tiʼ le problemaʼob yaan teʼ yóokʼol kaabaʼ. Toʼoneʼ maʼatech k-nojbaʼalkúuntikba mix tech competir jeʼex u beetaʼal teʼ tu yóokʼol kaab Satanasoʼ. ¿Máasaʼ jach kiʼimak k-óol ikil u kaʼansiktoʼon Jéeoba k-eʼes yaabilaj yéetel kabal óolal? Tuláakloʼon k-tuukul jeʼex le salmista ka tu yaʼalaj le tʼaanoʼobaʼ: «Ilawileʼex bukaʼaj maʼalobil yéetel jatsʼutsil ka múuchʼ kajlak sukuʼuntsiloʼob bey juntúuliliʼobeʼ» (Sal. 133:1).