1, 2. ¿Máax tsʼaʼan tumen Jesús utiaʼal u kaʼansaj teʼ kʼiinoʼobaʼ, yéetel baʼaxten unaj k-ojéeltik máaxiʼ?

«SUKUʼUNEʼEX, tsʼoʼok u tuʼubulten jaytéen tsʼoʼok u kʼuchul tin kʼab xookoʼob ku yáantken jach teʼ súutuk kʼaʼabéettenoʼ.» Bey tu yaʼalil juntúul kiik tiʼ junpʼéel carta tu túuxtaj tiʼ u j-jaajkunajoʼob Jéeoba. ¿Tsʼoʼok wa u yúuchultech xan beyoʼ? Yaʼab tiʼ toʼoneʼ tsʼoʼoki. Baʼaleʼ maʼ unaj u jaʼakʼal k-óoliʼ.

² Leloʼ ku yeʼesikeʼ Jesús, u Poolil le múuchʼuliloʼ, táan u tséentikoʼon jeʼex u yaʼalmiloʼ. ¿Máax u tsʼaamaj utiaʼal u beetik le meyajaʼ? Ka tu yaʼalaj baʼax kun eʼesik way yaneʼ, tu yaʼaleʼ yaan u tsʼáaik le «palitsil chúukaʼan u yóol yéetel yaan u naʼat» utiaʼal u tsʼáaik le «janal [...] jach tu yorail» tiʼ le uláakʼ palitsiloʼoboʼ (xok Mateo 24:45-47). * Le palitsil chúukaʼan u yóoloʼ letiʼe máax tsʼaʼan tumen Jesús utiaʼal u kaʼansaj teʼ tu tsʼook kʼiinoʼobaʼ. Unaj k-ojéeltik máax le palitsilaʼ, tumen utiaʼal maʼ u xuʼulul k-bisikba yéetel Dioseʼ jach kʼaʼabéettoʼon le kaʼansaj ku tsʼáaikoʼ (Mat. 4:4; Juan 17:3).

3. ¿Baʼax k-aʼalmaj kaʼach yoʼolal u kettʼaanil le palitsil chúukaʼan u yóoloʼ?

³ ¿Bix unaj k-naʼatik u kettʼaanil le palitsil chúukaʼan u yóol yéetel yaan u naʼatoʼ? Kaʼacheʼ k-aʼalmeʼ teʼ Pentecostés tu jaʼabil 33, tsʼaʼab tumen Jesús le palitsil chúukaʼan u yóoloʼ. K-tukultmaj xaneʼ jeʼel baʼax tiempoileʼ le palitsil chúukaʼan u yóoloʼ ku tʼaan yoʼolal tuláakal le yéeyaʼanoʼob kuxaʼanoʼob way Luʼum desde teʼ kʼiin jeʼeloʼ. Tsʼoʼoleʼ t-tukleʼ cada juntúul tiʼ le yéeyaʼanoʼoboʼ letiʼe uláakʼ palitsiloʼoboʼ. K-tuklik xaneʼ tu jaʼabil 1919, Jesuseʼ tu tsʼáaj yáanal u páajtalil le palitsil chúukaʼan u yóol «le baʼaxoʼob yaantiʼoʼ», wa tuláakal baʼax ku meyaj utiaʼal u kʼaʼaytaʼal le Reinooʼ. Baʼaleʼ ka t-maas xakʼalxoktaj yéetel ka payalchiʼinajoʼon yoʼolaleʼ, t-tsʼáaj cuenta unaj k-kʼexik bix k-naʼatik le baʼax tu yaʼalaj Jesús yoʼolal le palitsil  chúukaʼan u yóoloʼ (Pro. 4:18). Koʼoneʼex xakʼaltik le kettʼaanaʼ yéetel koʼoneʼex ilik baʼax yaan yil t-éetel kex táan k-páaʼtik k-bin kaʼan wa k-pʼáatal way Luʼumeʼ.

4-6. ¿Baʼaxten k-aʼalikeʼ u kettʼaan Jesús yoʼolal le palitsil chúukaʼan u yóoloʼ káaj u béeytal ka tsʼoʼok 1914?

⁴ Uláakʼ versiculoʼobeʼ ku yeʼeskoʼobeʼ u kettʼaanil le palitsil chúukaʼan u yóoloʼ maʼ káaj u béeytal teʼ Pentecostés tu jaʼabil 33, baʼaxeʼ teʼ tu tsʼook kʼiinoʼobaʼ. Koʼoneʼex ilik bix u yáantkoʼon le Biblia k-naʼat lelaʼ.

⁵ Le kettʼaanaʼ táakaʼan ichil le profecía tu yaʼalaj Jesús yoʼolal «baʼax chíikulal ken u yeʼes way [yaneʼ] yéetel táan u taal u tsʼoʼokol tiʼ le yóokʼol kaabaʼ» (Mat. 24:3). U yáax jaats tiʼ le profecía ku chíikpajal tiʼ Mateo 24:4 tak 22, kaʼapʼéel bix u béeychajal. Le yáaxoʼ béeychaj chéen tu jaʼabil 33 tak tu jaʼabil 70. U kaʼapʼéeleʼ maas yaʼab tiempo táan u béeytal, táan u béeytal tak teʼ kʼiinoʼobaʼ. ¿U kʼáat wa túun u yaʼaleʼ u kettʼaanil le palitsiloʼ kaʼapʼéel bix kun béeytal? U jaajileʼ maʼ.

⁶ Desde Mateo 24:29 yéetel le versiculoʼob ku segueroʼ Jesuseʼ táan kaʼach u tʼaan tiʼ baʼaloʼob kun úuchul teʼ kʼiinoʼobaʼ (xok Mateo 24:30, 42, 44). Ka tʼaanaj tiʼ baʼaxoʼob kun úuchul tu kʼiinil le nojoch muʼyajiloʼ tu yaʼaleʼ le máaxoʼob kajaʼanoʼob way Luʼumeʼ «yaan u yilkoʼob u Paal máak táan u taal yóokʼol le múuyaloʼob[oʼ]». Tsʼoʼoleʼ utiaʼal maʼ u náayal u yóol máaxoʼob kun kuxtal tu tsʼook kʼiinoʼobeʼ, tu yaʼalaj: «Maʼ a wojleʼex baʼax kʼiin ken taalak a Yuumtsileʼexiʼ [...], tumen u Paal máakeʼ yaan u kʼuchul tiʼ junpʼéel hora maʼ táan a páaʼtkeʼexiʼ». * Ka tsʼoʼok u yaʼalik baʼaxoʼob kun úuchul tu tsʼook kʼiinoʼobeʼ Jesuseʼ tu tsikbaltaj u kettʼaanil le palitsil chúukaʼan u yóoloʼ. Le oʼolal k-aʼalikeʼ le baʼax tu yaʼalaj yoʼolal le palitsiloʼ káaj u béeytal ka tsʼoʼok 1914, le ka káaj u tsʼook kʼiinoʼoboʼ. ¿Baʼaxten k-aʼalik?

7. Ka káaj u kʼiinil le joochoʼ, ¿baʼax taakchaj u yojéeltaʼal, yéetel baʼaxten?

⁷ Tuukulnen tiʼ le kʼáatchiʼ tu beetaj Jesusaʼ: ‹¿Máax jach tu jaajil le palitsil chúukaʼan u yóol yéetel yaan u naʼatoʼ?›. Teʼ yáax siglooʼ minaʼan baʼax oʼolal u beetaʼal le kʼáatchiʼaʼ. Jeʼex t-ilaj teʼ xook máanikoʼ le apostoloʼoboʼ ku beetkoʼob kaʼach milagroʼob yéetel ku tsʼáaikoʼob u páajtalil tiʼ u maasil u beetkoʼob xan, le oʼolal chíikaʼan u yilaʼal táan u yáantaʼaloʼob tumen Dios (Bax. 5:12). Mix máak kʼáatik kaʼach máax tsʼaʼan tumen Jesús utiaʼal u tsʼáaik le kaʼansaj tu yorailoʼ. Baʼaleʼ tu jaʼabil 1914 maʼ beyiʼ. Teʼ jaʼaboʼ káaj u kʼiinil le joochoʼ. Bey kʼuchik u yorail u junpáaykuntaʼal le kʼaakʼas xíiw tiʼ le trigooʼ (Mat. 13:36-43). Baʼaleʼ ka káaj le joochoʼ yaʼab máaxoʼob chéen ku yaʼalikoʼob táan u tsaypachtikoʼob Cristo. Le oʼolaleʼ, «¿bix jeʼel u kʼaj óoltaʼal máaxoʼob bey trigo, wa le yéeyaʼanoʼoboʼ?». Le kettʼaan tu yaʼalaj Jesusoʼ ku yeʼesik máaxoʼobiʼ. Le sukuʼunoʼob yéeyaʼanoʼoboʼ letiʼe máaxoʼob ku tséentkubaʼob maʼalob yéetel le kaʼansaj ku keʼetel yéetel janaloʼ.

8. ¿Baʼaxten chéen sukuʼunoʼob yéeyaʼanoʼob unaj u táakpajloʼob ichil le palitsiloʼ?

⁸ Chéen le yéeyaʼanoʼob kuxaʼanoʼob way Luʼum unaj u táakpajloʼob ichil le palitsiloʼ. Tiʼ letiʼob ku yaʼalaʼal: «Sacerdoteʼex yéetel reyeʼex». Ku yaʼalaʼaltiʼob xaneʼ «‹kʼaʼayteʼex tu táan u maasil u jatsʼuts modos› le máax tʼaneʼex utiaʼal ka jóokʼkeʼex tiʼ le éeʼjochʼeʼeniloʼ yéetel ka náatsʼkeʼex tiʼ u kiʼichkelem sáasil» (1 Ped. 2:9). Le máaxoʼob ku yaʼalaʼaltiʼob «sacerdoteʼex yéetel reyeʼex[oʼ]» maʼalob ka u kaʼansoʼob u jaajil tiʼ máaxoʼob meyajtik Dios (Mal. 2:7; Apo. 12:17).

9. ¿Tuláakal wa le yéeyaʼanoʼob táakaʼanoʼob ichil le palitsil chúukaʼan u yóoloʼ? Tsole.

⁹ ¿Tuláakal wa le yéeyaʼanoʼob kuxaʼanoʼob way Luʼum táakaʼanoʼob ichil le palitsil chúukaʼan u yóoloʼ? Maʼatech. U jaajileʼ  maʼ tuláakal le yéeyaʼanoʼob tsʼáaik le kaʼansaj tiʼ le máaxoʼob meyajtik Dios way Luʼumeʼ. Ichil le trigooʼ yaan sukuʼunoʼob yéeyaʼanoʼobeʼ táan u beetik u siervo ministerialiloʼob wa u ancianoiloʼob. Letiʼobeʼ ku kaʼansajoʼob joonaj joonajil yéetel tu múuchʼuliloʼob, tsʼoʼoleʼ ku beetkoʼob baʼax ku yaʼalik le máaxoʼob nuʼuktik le meyaj ku beetik u j-jaajkunajoʼob Jéeobaoʼ. Baʼaleʼ maʼatech u táakpajloʼob utiaʼal u tsʼaʼabal le kaʼansaj tu yorail tiʼ tuláakal le sukuʼunoʼob yaan way Luʼumeʼ. Tsʼoʼoleʼ ichil le yéeyaʼanoʼoboʼ yaan kiikoʼob junpuliʼ maʼ tu tsʼíiboltkoʼob u kaʼansajoʼob teʼ múuchʼuliloʼ (1 Cor. 11:3; 14:34).

10. ¿Máax le palitsil chúukaʼan u yóol yéetel yaan u naʼatoʼ?

¹⁰ ¿Máax túun le palitsil chúukaʼan u yóol yéetel yaan u naʼatoʼ? Jeʼex tu beetil Jesús úuchjeakil ka tu tséentaj yaʼab máakoʼob yéetel u yáantaj junpʼíit máakoʼobeʼ, bejlaʼa xaneʼ le palitsiloʼ u chan múuchʼ sukuʼunoʼob yéeyaʼanoʼob ku tsʼáaikoʼob le kaʼansaj ku keʼetel yéetel janal teʼ kʼiinoʼob way yaan Cristoeʼ. Teʼ tu tsʼook kʼiinoʼobaʼ le yéeyaʼanoʼob táakaʼanoʼon ichil le palitsil chúukaʼan u yóoloʼ ku múuchʼ meyajoʼob teʼ tuʼux ku nuʼuktaʼal le meyaj ku beetik u j-jaajkunajoʼob Jéeobaoʼ. Bejlaʼeʼ le palitsil chúukaʼan u yóoloʼ letiʼe tuláakal le sukuʼunoʼob táakaʼanoʼob ichil le Cuerpo Gobernante tiʼ u j-Jaajkunajoʼob Jéeobaoʼ. U jaajileʼ maʼ chéen juntúul máak táakaʼan ichil le palitsiloʼ, baʼaleʼ Jesuseʼ maʼatech u yaʼalik «palitsil[oʼob]». Le Cuerpo Gobernanteoʼ ku muchʼkuba utiaʼal u chʼaʼtuklik wa baʼax.

11, 12. 1) ¿Máakalmáak le kaʼapʼéel baʼal ku tsʼaʼabal tiʼ le palitsil chúukaʼan u yóol yéetel yaan u naʼatoʼ? 2) ¿Baʼax kʼiin ka tu tsʼáaj Jesús le palitsil chúukaʼan u yóol yóokʼol le uláakʼ palitsiloʼoboʼ, yéetel máaxoʼob tu yéeyaj?

¹¹ Maʼ u tuʼubultoʼoneʼ teʼ kettʼaan tu yaʼalaj Jesusoʼ kaʼapʼéel baʼal ku tsʼaʼabal u beet le palitsil chúukaʼan u yóoloʼ. Yáaxeʼ ku tsʼaʼabal tu yóokʼol le uláakʼ palitsiloʼoboʼ. U kaʼapʼéeleʼ ku tsʼaʼabal u kanáant tuláakal baʼax yaan tiʼ le tsʼuuloʼ. Le kettʼaanaʼ ku béeytal teʼ tu tsʼook kʼiinoʼobaʼ, le oʼolal le kaʼapʼéel baʼax kun tsʼaabil tiʼ le palitsiloʼ unaj u béeytal ken tsʼoʼokok u jaʼabil 1914, ka káaj u beetik u Reyil Jesús.

¹² ¿Baʼax kʼiin ka tsʼaʼab le palitsil chúukaʼan u yóol tu yóokʼol le uláakʼ palitsiloʼoboʼ? Utiaʼal k-ojéeltikeʼ unaj k-kʼaʼajsik baʼax úuch tu jaʼabil 1914, le ka káaj le joochoʼ. Jeʼex tsʼoʼok k-ilkoʼ yaʼab máakoʼob ku yaʼalikoʼob  kaʼach cristianoʼob. ¿Máaxoʼob kaʼach ken u yéey Jesús utiaʼal u táakpajloʼob ichil le palitsil chúukaʼan u yóoloʼ? Ka taal Jesús yéetel u Taata u yiloʼob máaxoʼob beetik baʼax u yaʼalmeʼ, chíikpaj máaxoʼobiʼ. Lelaʼ úuch desde tu jaʼabil 1914 tak u káajbal 1919 (Mal. 3:1). * ¡Jach kiʼimakchaj u yóoloʼob ka tu yiloʼob yaan junmúuchʼ j-Xoknáaloʼob tiʼ le Biblia u yaabiltmoʼob Jéeoba bey xan u Tʼaan! U jaajileʼ yaan baʼax unaj u yutskíintikoʼob kaʼach, baʼaleʼ ka anchaj u máaytaʼaloʼob ichil junpʼíit kʼiinoʼobeʼ yéetel kabal óolal tu chaʼaj u nuʼuktaʼaloʼob (Mal. 3:2-4). Letiʼob u jaajil cristianoʼob ku keʼeteloʼob yéetel trigooʼ. Tu jaʼabil 1919, Jesuseʼ tu yéeyaj jujuntúul sukuʼunoʼob yéeyaʼanoʼob ichil le j-Xoknáaloʼob tiʼ le Biblia utiaʼal u beetkubaʼob le palitsil chúukaʼan u yóol yéetel yaan u naʼatoʼ, yéetel tu tsʼáaj yóokʼol le uláakʼ palitsiloʼoboʼ.

13. ¿Máaxoʼob xan táakaʼanoʼob ichil le uláakʼ palitsiloʼoboʼ, yéetel baʼaxten?

¹³ ¿Máaxoʼob le uláakʼ palitsiloʼoboʼ? Jáan aʼalbileʼ letiʼe máaxoʼob ku tséentaʼaloʼoboʼ. Tu káajbal u tsʼook kʼiinoʼobeʼ tuláakal le uláakʼ palitsiloʼoboʼ láaj yéeyaʼanoʼob. Baʼaleʼ ka máan kʼiineʼ ichil le uláakʼ palitsiloʼoboʼ táakpaj xan le uláakʼ tamanoʼoboʼ. Bejlaʼeʼ letiʼob u maas yaʼabil le u múuchʼ tamanoʼob tsaypachtik Cristooʼ (Juan 10:16). Le kaʼansaj «jach tu yorail» ku tsʼáaik le palitsil chúukaʼan u yóol tiʼ le yéeyaʼanoʼoboʼ letiʼe xan ku kʼamik le uláakʼ tamanoʼoboʼ. ¿Kux túun le máaxoʼob táakaʼanoʼob ichil le Cuerpo Gobernante ku kʼuchul u beetubaʼob bejlaʼa le palitsil chúukaʼan u yóoloʼ? Tiʼ letiʼob xaneʼ kʼaʼabéet le kaʼansaj ku tsʼáaik le palitsiloʼ. Yéetel kabal óolal ku kʼamkoʼob wa maʼ múuchʼ yaniloʼobeʼ táakaʼanoʼob ichil le uláakʼ palitsiloʼob jeʼex u maasil u jaajil cristianoʼoboʼ.

14. 1) ¿Baʼax nojoch meyajil kʼubéentaʼan tiʼ le palitsil chúukaʼan u yóoloʼ, yéetel baʼaxoʼob unaj u beetik? 2) ¿Baʼax tu yaʼalaj Jesús tiʼ le palitsil chúukaʼan u yóol yéetel yaan u naʼatoʼ? (Ilawil le cuadro ku kʼaabaʼtik: «Wa kʼasaʼan le palitsil...».)

¹⁴ Jesuseʼ u kʼubéentmaj junpʼéel nojoch meyaj tiʼ le palitsil chúukaʼan u yóoloʼ. Úuchjeakileʼ juntúul palitsil wa kanan ayikʼalileʼ ku kʼubéentaʼaltiʼ tuláakal baʼax u tiaʼal u tsʼuulil (Luc. 12:42). Le palitsil chúukaʼan u yóol yéetel yaan u naʼatoʼ kʼubéentaʼantiʼ xan tuláakal baʼax u tiaʼal Cristo way Luʼumeʼ. Ku yilik bix u meyaj le taakʼinoʼ, ku nuʼuktik le kʼaʼaytajoʼ yéetel le asambleaʼoboʼ. Ku yilik xan u beetaʼal jóoʼsaʼaniloʼob ku meyaj utiaʼal u yúuchul kʼaʼaytaj, u xook máak tu juunal yéetel utiaʼal u xoʼokol  teʼ muchʼtáambaloʼoboʼ. Le uláakʼ palitsiloʼoboʼ jach kʼaʼabéettiʼob tuláakal le baʼax ku tsʼáaik le palitsil chúukaʼan u yóoloʼ.

15, 16. ¿Baʼax kʼiin u kʼubéentik Jesús tiʼ le palitsil chúukaʼan u yóol tuláakal baʼax yaantiʼoʼ?

¹⁵ Jesuseʼ, ¿baʼax kʼiin u kʼubéentik tiʼ le palitsil «tuláakal le baʼaxoʼob yaantiʼoʼ»? Letiʼeʼ tu yaʼalaj: «¡Kiʼimak u yóol le palitsilaʼ, wa ken kʼuchuk u Tsʼuulileʼ ku yilik táan u beetik le baʼax tu kʼubéentajtiʼoʼ! Tu jaajil kin waʼalikteʼex: U Tsʼuulileʼ yaan u tsʼáaik u kanáant tuláakal le baʼaxoʼob yaantiʼoʼ» (Mat. 24:46, 47). Jesuseʼ kʼucheʼ ka tu yilaj «táan» u tsʼáaik le palitsil le kaʼansaj jeʼex u kʼubéentmiloʼ. Le oʼolal tu tsʼáaj u kanáant tuláakal baʼax yaantiʼ. Jeʼex k-ilkoʼ yaan u máan tsʼeʼetsʼek kʼiin u tsʼáa tu yóokʼol le uláakʼ palitsiloʼoboʼ, tsʼoʼoleʼ ku kʼubéentiktiʼ tuláakal baʼax yaantiʼ. ¿Baʼax kʼiin ken u tsʼáa Jesús tiʼ le palitsil chúukaʼan u yóol ka u kanáant tuláakal baʼax yaantiʼoʼ, yéetel bix ken u beetil? Utiaʼal k-núukikeʼ unaj k-ojéeltik baʼax kʼiin u kʼuchul yéetel baʼaxoʼob yaan tiʼ Jesús.

¹⁶ ¿Baʼax kʼiin u kʼuchul Jesús? Uláakʼ baʼax ku yaʼalik Mateo 24, ku núukik. Kʼaʼajaktoʼoneʼ ken u yaʼal u taal wa u kʼuchul Jesuseʼ táan u tʼaan tiʼ le kʼiin ken taalak u juzgart yéetel u xuʼuls tiʼ le kʼasaʼan máakoʼob tu tsʼook kʼiinoʼoboʼ (Mat. 24:30, 42, 44). * Le oʼolaleʼ u kʼuchul Jesús jeʼex u yaʼalik u kettʼaanil le palitsil chúukaʼan u yóoloʼ yaan u béeytal tu kʼiinil le nojoch muʼyajiloʼ.

17. ¿Baʼaxoʼob u tiaʼal Jesús?

¹⁷ ¿Máakalmáak «tuláakal le baʼaxoʼob yaan» tiʼ Jesusoʼ? Letiʼeʼ maʼ tu yaʼalaj wa chéen letiʼe baʼaxoʼob yaantiʼ way Luʼumeʼ. U jaajileʼ yaʼab páajtalil yaan tiʼ Jesús teʼ kaʼanoʼ. Letiʼeʼ tu yaʼalaj: «Tsʼoʼok u tsʼaʼabalten tuláakal páajtalil teʼ kaʼanoʼ bey xan way Luʼumeʼ» (Mat. 28:18; Efe. 1:20-23).  Bejlaʼeʼ ichil le baʼaxoʼob yaantiʼoʼ táakaʼan le u Reino Dios yaan tu kʼaboʼ. Lelaʼ tsʼaʼabtiʼ desde tu jaʼabil 1914 yéetel yaan u múul nuʼuktik yéetel le sukuʼunoʼob yéeyaʼanoʼoboʼ (Apo. 11:15).

18. ¿Baʼaxten Jesuseʼ yaan u kʼubéentik tiʼ le palitsil chúukaʼan u yóol tuláakal baʼax yaantiʼoʼ?

¹⁸ ¿Baʼax ku yeʼesiktoʼon le baʼaxoʼob tsʼoʼok k-ilkoʼ? Ku yeʼesiktoʼoneʼ ken taalak Jesús u beet u Juezil tu kʼiinil le nojoch muʼyajiloʼ yaan u yilkeʼ le palitsil chúukaʼan u yóoloʼ táan u tsʼáaik le kaʼansaj jach tu yorail tiʼ le uláakʼ palitsiloʼoboʼ. Le oʼolal yaan u kʼubéentiktiʼ tuláakal le baʼaxoʼob yaantiʼoʼ. Ken xiʼikoʼob kaʼan yéetel ken u beet u reyiloʼob yéetel Cristo le máaxoʼob táakaʼanoʼob ichil le palitsil chúukaʼan u yóoloʼ letiʼe ken kʼubéentaʼaktiʼob tuláakal baʼal yaan tiʼ Jesusoʼ.

19. ¿Maas wa nojoch le páajtalil ku kʼamik le palitsil chúukaʼan u yóol tiʼ u maasil yéeyaʼanoʼoboʼ?

¹⁹ ¿Maas wa nojoch páajtalil ku kʼamik le palitsil chúukaʼan u yóol tiʼ u maasil yéeyaʼanoʼoboʼ? Maʼatech. Yaan kʼiineʼ ken aʼalaʼak u tsʼaʼabal wa baʼax tiʼ u chan múuchʼ máakoʼobeʼ, ku tsʼaʼabal xan tiʼ u maasil. Jeʼex le baʼax tu yaʼalaj Jesús tiʼ u 11 apostoloʼob teʼ áakʼab táanil tiʼ u kíimiloʼ (xok Lucas 22:28-30). Letiʼeʼ tu yaʼalaj u tsʼáaik junpʼéel nojoch baʼal tiʼ le u chan múuchʼ máakoʼobaʼ tumen chúukaʼan u yóoloʼob. Yaan u múul reinar tu yéeteloʼob teʼ kaʼanoʼ. Baʼaleʼ ka máan kʼiineʼ tu yaʼaleʼ tuláakal le 144,000 kun kutaloʼob tiʼ tronoʼob yéetel yaan u múul gobernaroʼob tu yéetel (Apo. 1:1; 3:21). Tiʼ u tsʼíib Mateo 24:47, tu yaʼalaj xan u tsʼáaik tiʼ u chan múuchʼ máakoʼob wa le máaxoʼob táakaʼanoʼob ichil le palitsil chúukaʼan u yóoloʼ, u kanáantoʼob tuláakal le baʼaxoʼob yaantiʼoʼ. Baʼaleʼ u jaajileʼ tuláakal le 144,000 ken u kʼamoʼob le nojoch páajtalil teʼ kaʼanoʼ (Apo. 20:4, 6).

20. ¿Baʼax oʼolal tu tsʼáaj Jesús le palitsil chúukaʼan u yóoloʼ, yéetel baʼax k-chʼaʼtukultmaj k-beetik?

²⁰ Yéetel u yáantaj le palitsil chúukaʼan u yóoloʼ Jesuseʼ táan u tséentik yaʼab máakoʼob yéetel u yáantaj junpʼíit máakoʼob jeʼex tu beetil teʼ yáax siglooʼ. Tu tsʼáaj le palitsil chúukaʼan u yóol utiaʼal u tsʼáaik tiʼ u jaajil cristianoʼob, le yéeyaʼanoʼob bey xan le uláakʼ tamanoʼoboʼ, le kaʼansaj «jach tu yorail» teʼ tu tsʼook kʼiinoʼobaʼ. ¿Máasaʼ jach kiʼimak k-óol úuchik u beetik? Le oʼolaleʼ koʼoneʼex k-beetik baʼax ku yaʼalik le palitsil chúukaʼan u yóol yéetel yaan u naʼatoʼ (Heb. 13:7, 17).