Kʼáatchiʼob ku beetaʼal

¿Jeʼel wa u jóoʼsaʼal teʼ múuchʼulil juntúul sukuʼun tsʼoʼok u suuktal u chaʼantik pornografíaoʼ?

▪ Jeʼeleʼ. Lelaʼ ku yeʼesikeʼ jach unaj u kanáantik máak maʼ u yilik mix junpʼéel clase pornografía, kex xokbil ka u beete, chaʼantbil tiʼ revistaʼob, tiʼ peliculaʼob, videoʼob wa tiʼ Internet.

Bejlaʼeʼ le pornografíaoʼ jach tuláakal tuʼux yaan. Yoʼolal le Internetoʼ, tuláakal tuʼux jeʼel u páajtal u yilaʼaleʼ, bey túunoʼ yaʼab máak tsʼoʼok u suuktal u chaʼantik kex jeʼel jaypʼéel u jaʼabileʼ. Yaan táankelem paalal yéetel nukuch máakoʼobeʼ tsʼoʼok u yilkoʼob pornografía ich Internet kex maʼ le ku kaxtikoʼobiʼ. Baʼaleʼ yanoʼobeʼ taaliʼ tiʼob u yookloʼob utiaʼal u chaʼantikoʼob, maʼ xaaneʼ tu yotochoʼob wa tuʼux ku meyajoʼob, le tuʼux maas ku páajtal u chaʼantikoʼob wa u xokikoʼob chéen tu juunaloʼobeʼ. Lelaʼ junpʼéel baʼax jach unaj u yilik maʼ u beetik le máaxoʼob meyajtik Diosoʼ. ¿Baʼaxten?

Jesuseʼ tu yaʼalaj junpʼéel baʼax oʼolal: «Jeʼel máaxak ku paktik juntúul koʼolel utiaʼal u tsʼíibolteʼ tsʼoʼok u núupkʼebantal tu puksiʼikʼal tu yéetel» (Mat. 5:28). Baʼaleʼ lelaʼ maʼ u kʼáat u yaʼal wa maʼ maʼalob u núupchital juntúul íichamtsil yéetel u yataniʼ (Pro. 5:15-19; 1 Cor. 7:2-5). Baʼaxeʼ le pornografíaoʼ ku yajsik le kʼaakʼas tsʼíibolaloʼob tu yaʼalaj Jesús maʼ unaj u yantal tiʼ máakoʼ. Le oʼolal le máax ku xokik wa ku chaʼantik pornografíaeʼ maʼ táan u beetik le baʼax ku yaʼalik le tekstoaʼ: «Beeteʼex u kíimil tuláakal le luʼumkabil baʼaloʼob yaan tiʼ teʼexoʼ: Mix máak ka núupkʼebanchajak, mix ka u beet baʼaloʼob kʼaastak, mix ka xiʼik tu paach kʼaakʼas tuukuloʼob yéetel u kʼaakʼas tsʼíibolaloʼob, mix ka u tsʼíibolt taakʼin, tumen lelaʼ keet yéetel u adorartaʼal beetbil [diosoʼob]» (Col. 3:5).

 ¿Kux túun wa juntúul sukuʼun tsʼoʼok u chaʼantik juntéen wa kaʼatéen le pornografíaoʼ? Wa beyoʼ jeʼel u páajtal u yaʼalaʼaleʼ, talam yanil jeʼex pʼáatik Asaf kaʼacheʼ, letiʼeʼ tu yaʼalaj: «[Uláakʼ junpʼíiteʼ] tsʼoʼok kaʼach in lúubuleʼ, in wookoʼobeʼ óoliʼ jakchajoʼob». Wa tsʼoʼok u chaʼantik pornografía tuʼux ku chíikpajal xiiboʼob yéetel koʼoleloʼob chaknuuloʼob wa juntúul xiib yéetel juntúul koʼolel táan u núupchitaloʼobeʼ, yaan u chiʼichnaktal u conciencia yéetel maʼ tu páajtal u yantal jeetsʼelil tiʼ yéetel Dios. Baʼaxeʼ yaan u yuʼubikuba jeʼex Asafeʼ, letiʼeʼ tu yaʼalaj: «Tuláakal súutukeʼ kin kʼamik jaatsʼoʼob, yéetel kin jaʼatsʼal xan tiʼ sáamsamal jaʼatskab kʼiin» (Sal. 73:2, 14).

Wa juntúul sukuʼun tsʼoʼok u lúubul tiʼ le kʼebanaʼ, kʼaʼabéet u naʼatik unaj u kʼáatik áantaj. Le Bibliaoʼ ku yaʼalikeʼ teʼ múuchʼulil jeʼel u páajtal u tsʼaʼabaltiʼoʼ: «Wa ka wilkeʼex yaan máax lubaʼan tiʼ kʼebaneʼ, [«teʼex le yaanteʼex le jatsʼuts modos ku taal tiʼ Diosoʼ, ilawil a tojkíintkeʼex u beel», NM]. Baʼaleʼ unaj a beetkeʼex yéetel kabal óolal, yéetel cada juntúuleʼ unaj u jach kanáantkuba» (Gal. 6:1). Bey túunoʼ, kʼaʼabéet u yáantaʼal tumen juntúul wa kaʼatúul anciano, unaj u payalchiʼob tu yéetel, tsʼoʼoleʼ unaj u creertikoʼobeʼ Jéeobaeʼ yaan u yáantik utiaʼal «u tojtal u yóol» le máax kʼebanchajaʼanoʼ yéetel «yaan u saʼatal tiʼ» wa u perdonartaʼal (Sant. 5:13-15). Le máaxoʼob tsʼoʼok u kʼáatkoʼob áantaj utiaʼal u pʼatik u chaʼantikoʼob pornografíaeʼ, ku yuʼubikubaʼob jeʼex Asafeʼ, letiʼeʼ tu yaʼalaj: «Yaan in natsʼkinba tiʼ Yuum [Dios], tumen in tiaʼal teneʼ letiʼ u maʼalobil» (Sal. 73:28).

Baʼaleʼ apóstol Pabloeʼ tu yaʼaleʼ yanoʼobeʼ maʼ arrepentirnajoʼobiʼ, tumen maʼ tu pʼatoʼob «le kʼóokʼol kuxtal, le núupkʼebanil, yéetel le x-maʼ suʼtalil tu beetoʼob[oʼ]» (2 Cor. 12:21, Le Tumben Nuptʼan, LTN). * Marvin R. Vincent, juntúul lexicografoeʼ ku yaʼalikeʼ le tʼaan «kʼóokʼol kuxtal» ku yaʼalik le tekstoaʼ «táan u tʼaan tiʼ tuláakal le baʼaxoʼob jach kʼaastakoʼ». Le jejeláas pornografía yaan bejlaʼaʼ maʼ chéen ku chíikbesik máakoʼob chaknuuloʼob wa juntúul xiib yéetel juntúul koʼolel táan u núupkʼebantaloʼobiʼ. Yaan tiʼ letiʼobeʼ ku yeʼeskoʼob baʼaloʼob jach kʼaastak, jeʼex u núupchital kaʼatúul xiiboʼob, u núupkʼebantal junmúuchʼ máakoʼob, u núupkʼebantal juntúul máak yéetel baʼalcheʼob, u núupchitaloʼob yéetel mejen paalaloʼob, u violartaʼal máak tumen junmúuchʼ máakoʼob, u beetaʼal kʼaas tiʼ koʼoleloʼob yéetel u kiʼimaktal u yóol máak ikil u beetaʼal loob tiʼ wa u beetik loob tiʼ u maasil ken núupkʼebanchajkoʼob. Pabloeʼ ku yaʼalikeʼ yaan máakoʼobeʼ «tsʼoʼok u éeʼjochʼeʼental u naʼatoʼob» yéetel «tsʼoʼok u minaʼantal u suʼlakiloʼob yéetel tsʼoʼok u kʼubikubaʼob tiʼ kʼaas utiaʼal u beetkoʼob yéetel kiʼimak óolal tuláakal u jejeláasil kʼaakʼas baʼaloʼob» (Efe. 4:18, 19).

Pabloeʼ tu chʼaʼchiʼitaj xan le «kʼóokʼol kuxtal» tiʼ Gálatas 5:19, (LTN). Juntúul teólogo britanicoeʼ, ku yaʼalik: «Le tʼaan meyajnaj teʼ tekstoaʼ táan u tʼaan tiʼ tuláakal le baʼaxoʼob jach kʼaastak ku tsʼíiboltik máakoʼ». Mix máak jeʼel u yaʼalik wa maʼ kʼaastak le baʼaxoʼob tsʼoʼok k-aʼalikoʼ. Tiʼ Galaciailoʼob 5:19 tak 21, apóstol Pabloeʼ ku yaʼalikeʼ «le máaxoʼob ku beetkoʼob» le baʼaloʼob kʼaastakaʼ «maʼ tu táakpajloʼob tu [reino] Jajal Dios». Le oʼolaleʼ, ¿baʼax unaj u beetaʼal wa juntúul sukuʼuneʼ tsʼoʼok u xáantal joʼopʼok u chaʼantik kʼaakʼas pornografía? Wa maʼ tu arrepentir yéetel maʼ tu xulik u chaʼantikeʼ, yaan u jóoʼsaʼal ichil le múuchʼulil utiaʼal u pʼáatal limpioil yéetel u yantal jeetsʼelil ichiloʼ (1 Cor. 5:5, 11, NM).

Yaan tiʼ le máaxoʼob chaʼantik kaʼach pornografíaoʼ tsʼoʼok u kʼáatkoʼob áantaj tiʼ le ancianoʼoboʼ yéetel tsʼoʼok u xulik u beetkoʼob. Jesuseʼ tu yaʼalaj tiʼ le cristianoʼob yanoʼob kaʼach teʼ múuchʼulil yaan tu kaajil Sardisoʼ: «Muʼukʼaʼankúunt le baʼaloʼob pʼaatal taʼaytak u kíimloʼoboʼ [...]. Kʼaʼajaktech le kaʼansaj ta kʼamoʼ; tsʼoʼokbese yéetel kʼex a tuukul. Wa maʼ ta wajsikabaeʼ bíin taalaken tiʼ teech [...] maʼ bíin a wojéelt baʼax kʼiiniʼ» (Apo. 3:2, 3). Jeʼex túun k-ilkoʼ, jeʼel u páajtal u arrepentir máak utiaʼal ka púutsʼuk tiʼ u kʼáakʼil le pornografíaoʼ (Jud. 22, 23).

Baʼaleʼ maas maʼalob wa cada juntúul tiʼ toʼon ka u chʼaʼtukult maʼ u lúubul tiʼ le pornografíaoʼ. Bey túunoʼ, unaj k-ilik k-náachtal tiʼ tuláakal baʼax yaan yil yéetel le pornografíaoʼ.

[Tsolajil]

[Uláakʼ baʼax ku tsoʼolol teʼ táan juʼun 30]

Wa juntúul sukuʼun tsʼoʼok u lúubul tiʼ le kʼebanaʼ, kʼaʼabéet u naʼatik unaj u kʼáatik áantaj