«¿Bix jeʼel u páajtal in kʼaʼaytajeʼ?»

Tiʼ tuláakal yóokʼol kaabeʼ yaʼab sukuʼunoʼob ku kʼaʼaytajoʼob kex táan u muʼyajtikoʼob junpʼéel talam kʼojaʼanil. Lelaʼ bey u beetik Dalia, kajaʼan Vilna, tu luʼumil Lituania.

Daliaeʼ yaan kex 35 jaʼaboʼob tiʼ. Desde ka síijeʼ tu muʼyajtaj junpʼéel kʼojaʼanil tu tsʼoʼomel u pool ka pʼáat maʼatech u páajtal u péeksik u wíinklil yéetel maʼatech u jach páajtal u tʼaan. Le oʼolal chéen u láakʼtsiloʼob, maases Galina, u maama, naʼatik baʼax ku yaʼalik, tumen letiʼ kanáantik yéetel yiknal kajaʼan. Kex jach yaʼab baʼaxoʼob ku muʼyajtikeʼ maʼatech u chaʼik u lúubul u yóol. ¿Bix u beetik?

U maamaeʼ ku yaʼalik: «Tu jaʼabil 1999, taal u xíimbaltoʼon Apolonija, in prima, letiʼeʼ x-jaajkunaj tiʼ Jéeoba. T-ileʼ jach yaʼab baʼax u yojel tiʼ le Bibliaoʼ. Daliaeʼ tu beetaj yaʼab kʼáatchiʼob tiʼ yéetel séebaʼan úuchik u yóotik ka tsʼaʼabak xook tiʼ. Yaan kʼiineʼ kin kutal tu yiknaloʼob utiaʼal in waʼaliktiʼ baʼax taak u yaʼalik in hija. Ka tin wilaj jach ku yáantaʼal tumen le baʼax ku kanikoʼ, tin kʼáataj xan ka tsʼaʼabakten xook».

Jeʼex u bin u naʼatik Dalia le baʼax ku kaʼansik le Bibliaoʼ, joʼopʼ u chiʼichnaktal yoʼolal junpʼéel baʼal, ka tu kʼáataj tiʼ Apolonija: «Tumen maʼ tu páajtal in péekeʼ, «¿bix jeʼel u páajtal in kʼaʼaytajeʼ?» (Mat. 28:19, 20). Letiʼeʼ tu yaʼalajtiʼ: «Maʼ a tuklik; Jéeoba kun áantkech». Lelaʼ jach bey tsʼoʼok u yúuchloʼ.

¿Bix u kʼaʼaytaj? Yéetel cartaʼob. Utiaʼal lelaʼ ku yáantaʼal tumen jejeláas kiikoʼob utiaʼal u tsʼíibtikoʼob le baʼax ku tuklikoʼ. Tsʼoʼoleʼ ku túuxtik xan mensajeʼob tu celular utiaʼal u kʼaʼaytaj. Yéetel wa maʼalob yanil le tiempooʼ, ku bisaʼal tumen jujuntúul sukuʼunoʼob kʼaʼaytaj teʼ parqueʼoboʼ wa teʼ bejoʼoboʼ.

Dalia yéetel u maamaeʼ seguernaj u tsʼáaik u yóol u meyajtoʼob Dios tak ka okjaʼanajoʼob tu mesil noviembre tiʼ 2004. Tu mesil septiembre tiʼ 2008 máanoʼob tiʼ junpʼéel múuchʼulil Polaco tu kaajil Vilna, tumen kʼaʼabéet áantajiʼ. Le kiikoʼ ku yaʼalik: «Yaan kʼiineʼ kin chiʼichnaktal tumen taʼaytak u jóokʼol junpʼéel mes maʼ jóokʼken kʼaʼaytajiʼ. Baʼaleʼ jach kin kʼáatik tiʼ Jéeoba ka u yáanten, tsʼoʼoleʼ ku yantal wa máax invitarken jóokʼol tu yéetel». Tu tsʼookeʼ ku yaʼalik: «Le kʼojaʼaniloʼ ku beetik u pʼáatal maʼ tu páajtal in péeksik in wíinklil, baʼaleʼ in tuukuleʼ maʼalob u meyaj. Jach kiʼimak in wóol tumen ku páajtal in tsikbaltik tiʼ u maasil yoʼolal Jéeobaoʼ».