«Tuláakal baʼal maʼalob yéetel utsil chúukaʼan ku siʼibiltoʼoneʼ kaʼan u taal; tiʼ ku lukʼloʼob yiknal u Taatail le sáasiloʼob yanoʼob teʼ kaʼanoʼ.» (Santiago 1:17.) Le tekstoaʼ ku yeʼesik bukaʼaj u yutsil Jéeoba Dios, k-Taata yaan teʼ kaʼanoʼ. Tiʼ le bukaʼaj baʼaloʼob u síimaj tiʼ wíinikoʼ yaan junpʼéel maas nojoch tiʼ tuláakaliʼ. ¿Máakalmáakiʼ? Letiʼe tu yaʼalaj Jesús teʼ Juan 3:16: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul».

U kuxtal Jesús tu tsʼáaj Diosoʼ letiʼe regalo maas nojoch tsʼaʼantoʼonoʼ. Yoʼolal lelaʼ jeʼel u páajtal k-jáalkʼabtaʼal tiʼ le kʼebanoʼ, le chʼíijiloʼ yéetel le kíimiloʼ (Salmo 51:5; Juan 8:34). Chéen t-juunaleʼ mix bikʼin kaʼach kun béeytal k-luʼsik le kʼeban yaantoʼonoʼ. Chéen baʼaleʼ Dioseʼ tumen jach u yaabiltmoʼoneʼ yaan baʼax tu beetaj utiaʼal u jáalkʼabtikoʼon. Úuchik u kʼubik u kuxtal Jesusoʼ anchaj u esperanzail u kuxtal minaʼan u xuul le máaxoʼob uʼuyik u tʼaanoʼ. ¿Bix úuchik u jáalkʼabtikoʼon u kuxtal Jesús tiʼ le kʼeban yéetel le kíimiloʼ? ¿Baʼaxten kʼaʼabéetchaji? ¿Baʼax utsil tu taasaj?

U kuxtal Jesuseʼ bey junpʼéel boʼol anchaj u tsʼaʼabal utiaʼal u suʼutul junpʼéel baʼal peʼerchaji wa utiaʼal u jáalkʼabtaʼal wa máax. Le Bibliaoʼ ku yaʼalikeʼ le ka beetaʼab Adán yéetel Evaeʼ minaʼan u kʼebanoʼob. Tsʼoʼoleʼ tu tsʼáaj u páajtalil u kuxtaloʼob minaʼan u xuul tiʼ junpʼéel jatsʼuts Luʼum junmúuchʼ yéetel u paalaloʼob (Génesis 1:26-28). Chéen baʼaleʼ maʼ tu yuʼuboʼob u tʼaan Diosiʼ le oʼolaleʼ kʼebanchajoʼob yéetel tu peʼertoʼob le jatsʼuts kuxtal yaantiʼob kaʼachoʼ. ¿Baʼax úuch ka tsʼoʼoki? Le Bibliaoʼ ku yaʼalik: «Jeʼel bix tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ tumen tuláakloʼob kaʼach tsʼoʼok u kʼebantaloʼob» (Romailoʼob 5:12). Jeʼex k-ilkoʼ Adaneʼ tu máansaj tiʼ u paalal le kʼeban yéetel le kíimiloʼ.

Le boʼol tsʼaʼaboʼ, jach letiʼe bukaʼaj kʼaʼabéet u tsʼaʼabal kaʼachoʼ. Adaneʼ tu juunal tu chʼaʼtuklaj maʼ u yuʼubik u tʼaan Dios, le oʼolal xuʼul u yantal u páajtalil u kuxtal minaʼan u xuul. Le Bibliaoʼ ku yaʼalikeʼ u paalaloʼobeʼ pʼáat palitsiltaʼanoʼob tumen le kʼeban yéetel le kíimiloʼ. Utiaʼal u lukʼloʼob yáanal u páajtalileʼ yanchaj u tsʼaʼabal u kuxtal juntúul máax minaʼan u kʼeban, u kuxtal Jesús (Romailoʼob 5:19; Efesoiloʼob 1:7). Dioseʼ tu tsʼáaj u kuxtal u Hijo tumen u yaabiltmoʼon, wa maʼ u beetik kaʼacheʼ bejlaʼa mix juntúul tiʼ toʼon jeʼel u béeytal u yantal tiʼ le baʼax tu peʼertaj Adán yéetel Evaoʼ, kuxtal minaʼan u xuul tiʼ junpʼéel paraíso (Apocalipsis 21:3-5).

Tuláakal le utsiloʼob ku taasik u kuxtal Jesús tu kʼuboʼ ku yeʼesik minaʼan uláakʼ regalo maas maʼalob yéetel maas nojoch. Jeʼex t-ilaj teʼ xook máanikoʼ yaan kanpʼéel baʼaxoʼob eʼesik jach maʼalob junpʼéel regalo. Le oʼolaleʼ koʼox ilik baʼaxten u kuxtal Jesusoʼ letiʼe regalo maas maʼalob tsʼaʼantoʼonoʼ.

Ku tsʼáaik baʼax jatsʼuts k-ilik. Wíinikeʼ jach ku tsʼíiboltik kuxtal minaʼan u xuul (Eclesiastés 3:11). Chéen baʼaleʼ mix juntúul wíinik ku páajtal u tsʼáaik lelaʼ, chéen u kuxtal Jesús. Le Bibliaoʼ ku yaʼalik: «Le boʼol ku tsʼáaik le kʼebanoʼ letiʼe kíimiloʼ, baʼaleʼ le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús» (Romailoʼob 6:23).

Ku tsʼáaik baʼax kʼaʼabéettoʼon. Mix máak kaʼach jeʼel u páajtal u tsʼáaik le boʼol kʼaʼabéetoʼ. Le Bibliaoʼ ku yaʼalik: «Mix máak jeʼel u páajtal u [salvartikuba]  tu juunal u yóoleʼ mix tu páajtal u boʼotik tiʼ Yuum [Dios] utiaʼal ka toʼokok u kuxtal. ¡Minaʼan taakʼin utiaʼal ka páatak u maʼanal u kuxtal juntúul máak[!]» (Salmo 49:7, 8). U jaajileʼ chéen Dios jeʼel u páajtal kaʼach u tokikoʼon tiʼ le kʼeban yéetel le kíimiloʼ. Le oʼolal ‹tu jáalkʼabtoʼon tiʼ le kʼeban yoʼolal le boʼol tu beetaj Cristo Jesusoʼ›, bey úuchik u tsʼáaiktoʼon le baʼax kʼaʼabéettoʼonoʼ (Romailoʼob 3:23, 24).

Teʼ súutukil unajoʼ. Le Bibliaoʼ ku yaʼalik: «Dioseʼ tu yeʼesajtoʼon u yaabilaj, tumen kex j-kʼeban máakoʼon kaʼacheʼ, Cristoeʼ kíim t-oʼolal» (Romailoʼob 5:8). Jéeobaeʼ jach u yaabiltmoʼon tumen kex tu yilaj kʼebanoʼoneʼ tu tsʼáaj u kuxtal u Hijo t-oʼolal. Kex láayliʼ táan k-muʼyaj yoʼolal le kʼebanoʼ ku kiʼimaktal k-óol ken tuukulnakoʼon tiʼ le baʼaxoʼob ku taal u kʼiiniloʼ.

Baʼax péeks Dios u yeʼes u yutsil. ¿Baʼax péeks Dios u kʼub u kuxtal u Hijo bey junpʼéel boʼoleʼ? Le Bibliaoʼ ku yaʼalik: «Tu yoʼolal lelaʼ eʼesaʼabtoʼon u yaabilaj Dios, tumen Dioseʼ tu túuxtaj u juntúuliliʼ Paal teʼ yóokʼol kaabaʼ, utiaʼal beyoʼ ka yanaktoʼon kuxtal tu yoʼolal letiʼ. Lelaʼ letiʼe baʼax u kʼáat u yaʼal le yaabilajoʼ, maʼ tumen wa toʼon yaabilt Diosiʼ, baʼaxeʼ letiʼ yaabiltoʼon úuchik u túuxtik u Paal kíimil t-oʼolal» (1 Juan 4:9, 10).

¿Bix jeʼel a weʼesik jach nojoch baʼal a wilik le regalo tu tsʼáajtoʼon Diosoʼ? Maʼ unaj u tuʼubultoʼon baʼax tu yaʼalaj Jesús tu tsʼíibil Juan 3:16, tu yaʼaleʼ le máax ‹ken u tsʼáa u fe tiʼ letiʼeʼ› yaan u salvarkuba. Le Bibliaoʼ ku yaʼalikeʼ le fejoʼ letiʼe «u kʼubik u yóol máak u páaʼt junpʼéel baʼal jach u yojel yaan u yúuchul[oʼ]» (Hebreoʼob 11:1). Chéen baʼaleʼ utiaʼal u yantal u fe máakeʼ kʼaʼabéet u xokik u Tʼaan Dios. Le oʼolaleʼ jóoʼs u súutukil a maas kʼaj óoltik Dios, le Máax tsʼáa le regalo maas nojoch tiʼ tuláakal máakoʼ. Ilawil xan a beetik le baʼax ku páaʼtaʼal utiaʼal a kʼamik le kuxtal minaʼan u xuul ku béeytal yoʼolal u kuxtal Jesusoʼ.

Utiaʼal a maas kaanbal tiʼ Dioseʼ jeʼel u páajtal a wokol teʼ www.jw.org. U j-jaajkunajoʼob Jéeobaeʼ jeʼel u yáantkechoʼobeʼ. Jeʼex kun seguer u bin a maas kaanbal yoʼolal le nojoch siibal tu tsʼáajtoʼon Diosoʼ bey kun bin a wilik u yutsiloʼob, lelaʼ yaan u péeksikech a tsʼáa u graciasil tiʼ Dios «yoʼolal k-Yuumtsil Jesucristo» (Romailoʼob 7:25).