Le kʼasaʼaniloʼ káaj le ka tuʼus Eva tumen Satanás. Satanás kaʼacheʼ juntúul ángel uts, baʼaleʼ «maʼ pʼáat ichil le jaajoʼ» (Juan 8:44). Kex u yojel chéen Dios unaj u adorartaʼaleʼ káaj u tsʼíiboltik ka adorartaʼak letiʼ. Satanáseʼ tu tusaj Eva utiaʼal ka uʼuyaʼak u tʼaan letiʼ, maʼ u tʼaan Diosiʼ. Jeʼex Evaeʼ, Adáneʼ maʼ tu yuʼubaj xan u tʼaan Diosiʼ. Yoʼolal le baʼax tu beetoʼoboʼ k-sufrir yéetel k-kíimil. Xok Génesis 3:1-6, 19.

Satanáseʼ maʼ tu reconocertik wa chéen tiʼ Jéeoba yaan u derechoil u gobernar, le oʼolal tu tusaj Eva. Bey káajik u tsʼáaikuba máak tu contra Diosoʼ. U maas yaʼabil le máakoʼoboʼ táan u tsʼáaikubaʼob tu favor Satanás, le beetik ku yaʼalaʼaltiʼ «u gobernanteil le yóokʼol kaab[aʼ]». Xok Juan 14:30; 1 Juan 5:19.

Tuláakal baʼax u beetmaj Dioseʼ láaj maʼalob. Le ángeloʼob yéetel le yáax máakoʼoboʼ ku páajtal kaʼach u beetkoʼob tuláakal baʼax u kʼáat Dios (Deuteronomio 32:4, 5). Letiʼeʼ tu beetoʼon yéetel u páajtalil k-yéeyik baʼax k-kʼáat k-beete. Wa k-chʼaʼtuklik k-meyajtikeʼ kʼaʼabéet k-beetik tumen k-yaabiltmaj. Xok Santiago 1:13-15; 1 Juan 5:3.

¿Baʼaxten Dioseʼ ku chaʼik k-sufrir? Utiaʼal u yeʼesikeʼ wíinikeʼ maʼ tu páajtal u gobernarkuba tu juunal, kʼaʼabéet u yáantaj Dios tiʼ (Eclesiastés 7:29; 8:9). Tuláakal le tiempo tsʼoʼok u máanoʼ ku yeʼesikeʼ u gobierno wíinikeʼ maʼ tu páajtal u luʼsik le baʼaxoʼob beetik  k-sufriroʼ jeʼex le kʼasaʼaniloʼ, le guerraʼoboʼ yéetel le kʼojaʼaniloʼoboʼ. Xok Jeremías 10:23; Romanos 9:17.

Pero le máaxoʼob ku tsʼáaikubaʼob tu favor u gobierno Diosoʼ yaan u bin utsil tiʼob (Isaías 48:17, 18). Maʼ tun xáantaleʼ Dioseʼ yaan u xuʼulsik u gobierno wíinik. Chéen le máaxoʼob apoyartik u gobierno Dios kun kajtaloʼob way Luʼumeʼ (Isaías 11:9). Xok Daniel 2:44.

Chaʼant le video ¿Baʼaxten ku chaʼik Dios u yantal muʼyajil?

Satanáseʼ tu yaʼaleʼ wíinikeʼ ku meyajtik Dios chéen utiaʼal u bin utsil tiʼ, maʼ yoʼolal yaabilajiʼ. Junpʼéel tiʼ le utsiloʼob ku taasik u paciencia Diosoʼ letiʼe k-eʼesik yéetel baʼax k-beetik chéen táan u tuus Satanásoʼ, tsʼoʼoleʼ ku páajtal k-eʼesik xan chéen u gobierno Dios k-apoyartik, maʼ u gobierno wíinikiʼ. Xok Job 1:8-12; Proverbios 27:11.

Utiaʼal k-eʼesik tiaʼanoʼon tu favor u gobierno Dioseʼ kʼaʼabéet k-ojéeltik bix u kʼáat ka k-adorarte yéetel k-antal ichil le religión kaʼansik u jaajiloʼ (Juan 4:23). Uláakʼ bix jeʼel k-eʼesikeʼ letiʼe kéen k-beet jeʼex Jesúseʼ, letiʼeʼ maʼ táakpaj tiʼ políticaiʼ mix tiʼ guerraiʼ. Xok Juan 17:14.

Tiʼ Satanáseʼ ku meyaj yaʼab baʼaloʼob utiaʼal u beetaʼal baʼaloʼob kʼaastak tumen le máakoʼoboʼ. Maʼ xaaneʼ yaan u káajal a burlartaʼal tumen a amigoʼob yéetel a láakʼtsiloʼob tumen maʼ táan a beetik le baʼaxoʼob suuk u beetkoʼoboʼ (1 Pedro 4:3, 4). Kéen úuchuk leloʼ, ¿baʼax ken a beeteʼ? ¿Yaan wa u seguer a biskaba yéetel máaxoʼob meyajtik Dios? ¿Yaan wa a beetik baʼax u kʼáat Dios? Wa ka beetkeʼ yaan a weʼesik chéen táan u tuus Satanás tumen táan a wuʼuyik u tʼaan Dios kex táan a sufrir. Xok 1 Corintios 6:9, 10; 15:33.

Dioseʼ jach u yaabiltmoʼon, le beetik k-creertik yaan u xuʼulsik le baʼaxoʼob beetik k-sufriroʼ. Chéen le máaxoʼob eʼesik yaan u fejoʼob tiʼ Dios kun kuxtaloʼob mantatsʼ way Luʼumeʼ. Xok Juan 3:16.