XOOK 59
Jeʼel u chúukpajal a wóol kex ka chʼaʼpachtaʼakecheʼ
Tuláakal le máaxoʼob meyajtik Jéeobaoʼ yaan u kʼuchul u kʼiinil u chʼaʼpachtaʼaloʼob. Chéen baʼaleʼ, ¿unaj wa k-sajaktal yoʼolal leloʼ?
1. ¿Baʼaxten maʼ jelaʼan k-ilik k-chʼaʼpachtaʼaliʼ?
Le Bibliaoʼ ku yaʼalikeʼ «tuláakal le máaxoʼob u kʼáatoʼob u tsʼáaʼob ichil u kuxtaloʼob baʼax tu kaʼansaj Cristo yéetel u adorartoʼob Dioseʼ yaan xan u chʼaʼpachtaʼaloʼob» (2 Timoteo 3:12). Jeʼex Jesúseʼ toʼon xaneʼ k-chʼaʼpachtaʼal tumen le gobiernoʼob yéetel le religiónoʼoboʼ tumen maʼ t-táakpajal tiʼ le baʼaxoʼob ku beetaʼal way yóokʼol kaabeʼ (Juan 15:18, 19).
2. ¿Bix jeʼel k-preparartikba utiaʼal le chʼaʼpachtajiloʼ?
Kʼaʼabéet k-maas confiar tiʼ Jéeoba. ¿Bix jeʼel k-beetkeʼ? Sáamsamal kʼaʼabéet k-orar, k-xokik le Bibliaoʼ yéetel unaj k-bin tiʼ tuláakal le reuniónoʼoboʼ. Wa k-beetik le baʼaloʼobaʼ maʼ ken k-chʼaʼ saajkil tak wa láakʼtsiloʼob chʼaʼpachtikoʼon. Apóstol Pablo, juntúul máax jach chʼaʼpachtaʼabeʼ, tu tsʼíibtaj: «Maʼ kin sajaktal, Jéeoba áantken» (Hebreos 13:6).
Uláakʼ baʼax jeʼel u yáantkoʼoneʼ letiʼe k-tsikbaltik tiʼ u maasil le baʼaxoʼob ku yaʼalik le Bibliaoʼ. Wa k-beetkeʼ yaan k-maas confiar tiʼ Jéeoba yéetel maʼ ken k-sajaktal tiʼ wíinik (Proverbios 29:25). Wa desde beora ka wilik maʼ a sajaktaleʼ yaan u seguer a tsikbaltik baʼax ku yaʼalik u Tʼaan Dios kex ka aʼalaʼak tumen le gobiernoʼob maʼ k-beetkoʼ (1 Tesalonicenses 2:2).
3. ¿Ku taasik wa utsil u chʼaʼpachtaʼal máak?
U jaajileʼ mix máak uts tu tʼaan u chʼaʼpachtaʼal. Pero wa ku chúukpajal k-óoleʼ yaan u maas muʼukʼaʼantal k-fe. Tsʼoʼoleʼ kéen k-il bix u yáantkoʼon Jéeobaeʼ yaan k-uʼuyik maas naatsʼ yaniloʼon tiʼ letiʼ (xok Santiago 1:2-4). Jéeobaeʼ jach ku yaatal u yóol kéen u yil táan k-sufrir, pero ku kiʼimaktal u yóol kéen chúukpajal k-óol. Le Bibliaoʼ ku yaʼalik: «Wa ku chúukpajal a wóoleʼex muʼyaj ikil a beetkeʼex baʼax maʼalobeʼ leloʼ jach ku beetik u kiʼimaktal u yóol Dios» (1 Pedro 2:20). Jéeobaeʼ yaan u bendecirtik le máaxoʼob ku chúukpajal u yóoloʼoboʼ. Yaan u tsʼáaiktiʼob kuxtal minaʼan u xuul yéetel yaan u kajtaloʼob tiʼ junpʼéel jatsʼuts paraíso (Mateo 24:13).
UTIAʼAL A MAAS NAʼATIK
Yaan k-ilik baʼax jeʼel u yáantkoʼon utiaʼal u chúukpajal k-óol tiʼ Jéeoba kex táan k-chʼaʼpachtaʼaleʼ. Yaan xan k-ilik bix ken u bendecirtoʼon wa ku chúukpajal k-óol.
4. Chúukpajak a wóol kex tiaʼan a láakʼtsiloʼob ta contraeʼ
Jesúseʼ tu yaʼaleʼ yaan k-láakʼtsiloʼobeʼ yaan u tsʼáaikubaʼob t-contra ikil k-adorartik Jéeoba. Xokeʼex Mateo 10:34-36, kéen tsʼoʼokkeʼ ka tsikbaltikeʼex lelaʼ:
-
¿Baʼax jeʼel u beetik k-láakʼtsiloʼob le kéen u yojéeltoʼob táan k-meyajtik Jéeobaeʼ?
Koʼox ilik baʼax úuch tiʼ juntúul sukuʼun yéetel juntúul kiik. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax jeʼel a beetik wa yaan máax ku yaʼaliktech ka xuʼuluk a meyajtik Jéeobaeʼ?
Xokeʼex Salmo 27:10 yéetel Marcos 10:29, 30. Kéen tsʼoʼokok a xokikeʼex cada tekstoeʼ ka tsikbaltikeʼex lelaʼ:
-
Le tekstoaʼ, ¿bix jeʼel u yáantkech le kéen chʼaʼpachtaʼakech tumen a láakʼtsiloʼob wa tumen a amigoʼobeʼ?
5. Maʼ u xuʼulul a meyajtik Jéeoba kex ka chʼaʼpachtaʼakech
Maʼ unaj k-sajaktal k-meyajt Jéeoba kex ka aʼalaʼaktoʼon tumen le máakoʼob maʼ k-beetkoʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax ta wilaj teʼ video jeʼel u yáantkech utiaʼal maʼ a chʼaʼik saajkiloʼ?
Xokeʼex Hechos 5:27-29 yéetel Hebreos 10:24, 25. Kéen tsʼoʼokok a xokikeʼex cada tekstoeʼ ka tsikbaltikeʼex lelaʼ:
-
¿Baʼaxten maʼ unaj u xuʼulul k-tsikbaltik u Tʼaan Dios yéetel k-bin reunión kex ka prohibirtaʼak tumen le autoridadoʼoboʼ?
6. Jéeoba kun áantkech
Kex jeʼel tuʼuxak u taaloʼob yéetel kex jeʼel bukaʼaj años yaantiʼobeʼ yaʼab tiʼ u testigoʼob Jéeobaeʼ tsʼoʼok u chúukpajal u yóoloʼob. Utiaʼal a wojéeltik bix tsʼoʼok u beetkoʼobeʼ, chaʼanteʼex le VIDEOOʼ. Kéen tsʼoʼokkeʼ ka tsikbaltikeʼex lelaʼ:
-
¿Baʼax áant le sukuʼunoʼob utiaʼal u chúukpajal u yóoloʼob kex táan u chʼaʼpachtaʼaloʼoboʼ?
Xokeʼex Romanos 8:35 yéetel 37-39 bey xan Filipenses 4:13. Kéen tsʼoʼokok a xokikeʼex cada tekstoeʼ ka tsikbaltikeʼex lelaʼ:
-
Le tekstoaʼ, ¿bix u yeʼesik jeʼel u chúukpajal a wóol le kéen a aktáant jeʼel baʼaxak problemaeʼ?
Xokeʼex Mateo 5:10-12, kéen tsʼoʼokkeʼ ka tsikbaltikeʼex lelaʼ:
-
¿Baʼaxten jeʼel u kiʼimaktal a wóol kex ka chʼaʼpachtaʼakecheʼ?
Yaʼab tiʼ u testigoʼob Jéeobaeʼ tsʼoʼok u chúukpajal u yóoloʼob kex táan u chʼaʼpachtaʼaloʼob. ¡Techeʼ, jeʼel u páajtal xan a beetkeʼ!
BAʼAX SUUK U YAʼALAʼAL: «Teneʼ kin wuʼuyik maʼ kun páajtal u chúukpajal in wóol kéen chʼaʼpachtaʼaken».
-
¿Baʼax tekstoil jeʼel a weʼesik tiʼ juntúul máax bey u yuʼubikubaoʼ?
BAʼAX TSOʼOLI
Jéeobaeʼ ku kiʼimaktal u yóol le kéen u yil u chúukpajal k-óol kéen chʼaʼpachtaʼakoʼon. Letiʼeʼ yaan u yáantkoʼon utiaʼal u seguer u chúukpajal k-óol.
Baʼax ta kanaj
-
¿Baʼaxten maʼ jelaʼan k-ilik k-chʼaʼpachtaʼaliʼ?
-
¿Bix jeʼel a prepararkaba desde beora utiaʼal le chʼaʼpachtajiloʼ?
-
¿Baʼax eʼesiktech jeʼel u páajtal a meyajtik Jéeoba kex jeʼel baʼaxak ka úuchkeʼ?
KAN U MAASIL
Ilawil bix áantaʼabik juntúul xiʼipal tumen Jéeoba le ka kʼaʼal cárceloʼ.
Ojéelt baʼax áant juntúul sukuʼun yéetel juntúul kiik utiaʼal u chúukpajal u yóoloʼob tiʼ Jéeoba le ka chʼaʼpachtaʼaboʼoboʼ.
T-meyajtaj Jéeoba tu kʼiiniloʼob táan u beetaʼal kʼeexoʼob (7:11)
Kan bix jeʼel a prepararkaba desde beora utiaʼal maʼ a sajaktal le kéen chʼaʼpachtaʼakecheʼ.
«Unaj k-líiʼsikba táanil tiʼ u káajal le chʼaʼpachtajiloʼ» (U Pʼíich Tulumil Kanan, julio tiʼ 2019)
¿Bix jeʼel u chúukpajal k-óol k-meyajt Jéeoba kex k-láakʼtsiloʼob tiaʼanoʼob t-contraeʼ? ¿Baʼax kʼaʼabéet k-beetik utiaʼal u yantal jeetsʼelil?
«Le u jaajiloʼ ku taasik ‹jatslantáambail›» (U Pʼíich Tulumil Kanan, octubre tiʼ 2017)
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
