Kaanbalnakoʼon tiʼ u tʼaan Dios
¿Baʼax kun úuchul tu Kʼiinil le Juiciooʼ?
Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ jeʼel a wáantaʼal tumen u testigoʼob Jéeoba utiaʼal a wojéeltik u núukil le preguntaʼobaʼ.
1. ¿Baʼax u Kʼiinil le Juiciooʼ?
Yaʼab máakoʼob tuklikeʼ tu Kʼiinil le Juiciooʼ yaan u muʼuchʼul u millonesil máakoʼob tu táan u trono Dios utiaʼal u juzgartaʼaloʼob yoʼolal le baʼax u beetmoʼoboʼ. Yaneʼ ku tuklikeʼ yaan u kuxtaloʼob teʼ kaʼanoʼ yéetel uláakʼoʼobeʼ yaan u túuxtaʼaloʼob teʼ infiernooʼ. Chéen baʼaleʼ le Bibliaoʼ ku yaʼalikeʼ u Kʼiinil le Juiciooʼ u kʼiinil u beetaʼal justicia (Salmo 96:13). Jéeobaeʼ tsʼoʼok u yéeyik Jesús utiaʼal u juzgartik le máakoʼoboʼ (xok Isaías 11:1-5 yéetel Hechos 17:31).
2. ¿Bix kun juzgarbil máak tu Kʼiinil le Juiciooʼ?
Adáneʼ tu tsʼáajuba tu contra Dios úuchik maʼ u yuʼubik u tʼaan. Yoʼolal leloʼ tuláakal u paalaloʼobeʼ kʼebanoʼob, ku muʼyajoʼob yéetel ku kíimloʼob (Romanos 5:12). Utiaʼal u yutskíintik le baʼax tu beetaj Adánoʼ Jesúseʼ yaan u kaʼa kuxkíintik u millonesil máakoʼob tsʼoʼok u kíimloʼob. U libroil Apocalipsiseʼ ku yeʼesikeʼ leloʼ yaan u yúuchul tu yáamil le mil años kun reinar Jesúsoʼ (xok Apocalipsis 20:4, 11, 12).
Le máaxoʼob kun kaʼa kuxkíintbiloʼoboʼ yaan u juzgartaʼaloʼob, chéen baʼaleʼ maʼ tu yoʼolal le baʼax tu beetoʼob antes tiʼ u kíimloʼoboʼ. Yaan u juzgartaʼaloʼob yoʼolal le baʼax ken u beetoʼob kéen tsʼoʼokok u yojéeltikoʼob baʼax tsʼíibtaʼan teʼ «rolloʼob» ku yaʼalik u libroil Apocalipsis capítulo 20 (Romanos 6:7). Apóstol Pabloeʼ tu yaʼaleʼ ichil le máaxoʼob kun kaʼa kuxkíintbiloʼoboʼ táakaʼan «le utsoʼoboʼ bey xan le kʼasaʼanoʼoboʼ» (xok Hechos 24:15).
3. ¿Baʼax uláakʼ utsil ken u taas u Kʼiinil le Juiciooʼ?
Le máaxoʼob maʼ tu kʼaj óoltoʼob Jéeoba ka kíimoʼoboʼ yaan u tsʼaʼabaltiʼob u páajtalil u kʼaj óoltikoʼob yéetel u beetkoʼob baʼax maʼalob. Wa ku beetkoʼob baʼax maʼalobeʼ yaan u chaʼabal u kuxtaloʼob. Pero wa maʼ tu beetkoʼobeʼ yaan u juzgartaʼaloʼob utiaʼal u xuʼulsaʼaloʼob (xok Juan 5:28, 29 yéetel Isaías 26:10; 65:20).
U Kʼiinil le Juiciooʼ mil años kun xáantal. Tu yáamil le años jeʼeloʼ Jéeobaeʼ yaan u beetik u pʼáatal perfectoil wíinik jeʼex tu káajbaloʼ (1 Corintios 15:24-28). ¡Jach túun jatsʼuts le baʼax ken u beet Jéeoba yoʼolal le máaxoʼob ken u yuʼub u tʼaanoʼ! Chéen baʼaleʼ tu tsʼoʼokbal le Mil añosoʼ Jéeobaeʼ yaan u jáalkʼabtik Satanás utiaʼal le u tsʼook pruebaoʼ. Satanás túuneʼ yaan u kaʼa beetik tuláakal le ku páajtal utiaʼal u náachkuntik máak tiʼ Jéeoba. Chéen baʼaleʼ le máaxoʼob kun chúukpajal u yóoloʼob tiʼ Jéeobaoʼ yaan u tsʼaʼabaltiʼob kuxtal minaʼan u xuul (xok Isaías 25:8 yéetel Apocalipsis 20:7-9).
4. ¿Yaan wa uláakʼ u kʼiinil juicio?
Le Bibliaoʼ ku tʼaan tiʼ uláakʼ junpʼéel u kʼiinil juicio. Le jeʼelaʼ táan u tʼaan tiʼ le kʼiin kéen xuʼulsaʼak tiʼ tuláakal le kʼasaʼan máakoʼob teʼ kʼiinoʼobaʼ. Le kʼiinaʼ yaan u téek taal jeʼex taalik le Búulkabal tu kʼiiniloʼob Noé utiaʼal u xuʼulsik le kʼasaʼan máakoʼoboʼ. Le kéen láaj xuʼulsaʼak tiʼ «le kʼasaʼan máakoʼoboʼ [...] mantatsʼ yaan u yantal justiciaiʼ» (xok 2 Pedro 3:6, 7, 13).