XOOK 35

¿Bix jeʼel in amigotik Dioseʼ?

Gabrieleʼ ku yaʼalik: «Le yaanten 12 añosoʼ tu pʼatoʼon in papá. Kʼajaʼanteneʼ tiʼ junpʼéel áakʼabeʼ tin kʼalinba tin cuartoeʼ ka tin sen aʼalaj tiʼ Jéeoba ka u beet u suut». Le baʼax áant Gabrieloʼ letiʼe u biskuba yéetel Diosoʼ.

Teʼ súutukil jach lubaʼan u yóoloʼ Gabrieleʼ tu xokaj le Bibliaoʼ. Tu yilaj le teksto tuʼux ku yaʼalaʼal tiʼ Jéeoba: «Tiʼ teech ku kʼáatik áantaj le máax tsʼoʼok u beetaʼal loob tiʼoʼ. Teech áantik le paalaloʼob minaʼan u papáʼoboʼ» (Salmo 10:14). Gabrieleʼ tu yaʼaleʼ le tʼaanoʼobaʼ jach kʼuch tu puksiʼikʼal. Tu yaʼalaj: «Tin wuʼuyaj Jéeobaeʼ táan u yaʼalikten letiʼeʼ in Papá yéetel jeʼel u yáantkeneʼ. Minaʼan uláakʼ papá jeʼex letiʼeʼ».

¿TSʼOʼOK wa u yúuchultech le baʼax úuch tiʼ Gabrieloʼ? Maʼ xaaneʼ tsʼoʼoki. Pero kʼaʼajaktecheʼ Jéeobaeʼ u kʼáat ka a beetaba u amigo. Le Bibliaoʼ ku yaʼalik: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8). ¿Ta tsʼáaj cuenta? Kex maʼ tu páajtal k-ilik yéetel kex táaj yaan u podereʼ, Jéeobaeʼ u kʼáat u bisuba ta wéetel.

Chéen baʼaleʼ utiaʼal a biskaba yéetel Dioseʼ yaan baʼax kʼaʼabéet a beetik. Jeʼex wa yaantech junpʼéel chan paakʼaleʼ wa a kʼáat ka nojochchajkeʼ, ¿baʼax unaj a beetik? Kʼaʼabéet a jóoyabtik yéetel a tsʼáaik tiʼ junpʼéel lugar tuʼux ku paktaʼal tumen kʼiin. Wa maʼ ta atenderkeʼ yaan u kíimil. Utiaʼal xan a maas biskaba yéetel Dioseʼ yaan baʼax kʼaʼabéet a beetik.

Kʼaʼabéet a xokik le Bibliaoʼ

Utiaʼal u biskuba maʼalob kaʼatúul máakoʼobeʼ kʼaʼabéet u tsikbaloʼob. Utiaʼal k-bisikba yéetel Dioseʼ kʼaʼabéet xan k-tsikbal tu yéetel. ¿Bix túun jeʼel k-tsikbal yéetel Dioseʼ? ¿Bix jeʼel k-uʼuyik le baʼax ku yaʼalikoʼ? Letiʼe kéen k-xok le Bibliaoʼ (Salmo 1:2, 3).

Maʼ xaaneʼ techeʼ maʼ jach uts ta tʼaan a xookiʼ, baʼaxeʼ maas uts ta tʼaan a beetik uláakʼ baʼaloʼob jeʼex a chaʼantik televisión, a báaxtik videojuegos yéetel a jóokʼol xíimbal yéetel a amigoʼob. Pero wa taak a amigotik Dioseʼ kʼaʼabéet a xokik le Biblia utiaʼal a wuʼuyik baʼax ku yaʼaliktech.

Maʼ a tuklik wa jach nak óol u xoʼokol le Bibliaoʼ. Kex wa ka tuklik maʼ u yuumilech le xookoʼ, jeʼel u jatsʼutstal a wilkeʼ. Yáaxeʼ jóoʼs u tiempoil a xook. Maʼ xaaneʼ jeʼel u páajtal a beetik jeʼex le x-chʼúupalaloʼobaʼ. Laiseʼ ku yaʼalik: «In tsʼíibtmaj baʼax hora ken in xok le Bibliaoʼ. Le kéen aajkeneʼ kin xokik junpʼéel capítuloiʼ». María, yaan 15 años tiʼeʼ, ku yaʼalik: «Sáamsamal antes tiʼ in chital weenleʼ kin xokik le Bibliaoʼ».

Kux túun teech, ¿baʼax hora ken a xok le Bibliaoʼ? Yáaxeʼ jáan il  le cuadro yaan teʼ página 292. Le kéen tsʼoʼokkeʼ ka tsʼíibtik baʼax hora ken a jóoʼs u tiempoil utiaʼal a xokik kex media hora le Bibliaoʼ.

․․․․․

Pero maʼ tiʼ ku náakliʼ. Le kéen joʼopʼok a xokik le Bibliaoʼ yaan a tsʼáaik cuentaeʼ yaan jaatsoʼobeʼ maʼ fácil u naʼataʼaliʼ. Bey u yúuchul tiʼ Jezreel, tiʼ letiʼeʼ yaan 11 años, ku yaʼalik: «Yaan jaatsoʼob difíciltakoʼob». Wa bey u yúuchultechoʼ maʼ u lúubul a wóol. Kʼaʼajaktecheʼ le kéen a xok le Bibliaoʼ táan a xokik le baʼax ku yaʼalik le maas maʼalob amigo yaantechoʼ, Jéeoba. Chéen le kéen a wileʼ tsʼoʼok u jatsʼutstal a wilik a xook. Wa ku seguer a tsʼáaik a wóoleʼ yaan a disfrutartik yéetel yaan a jóoʼsik u yutsil a xook.

Maʼ u xuʼulul a orar

Le oraciónoʼ junpʼéel jatsʼuts regalo u siimajtoʼon Dios tumen ku páajtal k-tʼaan tu yéetel. Jeʼel baʼalak horaeʼ jeʼel u páajtal k-orar tiʼ Jéeobaeʼ, letiʼeʼ ku yuʼubikoʼon. Kex de día wa de nocheeʼ u kʼáat u yuʼub baʼax ken k-aʼaltiʼ. Le beetik teʼ Bibliaoʼ ku yaʼalik ka a waʼal tiʼ ich oración tuláakal baʼax a kʼáat. Ka kʼáat óolnakech tiʼ yéetel ka a tsʼáa gracias (Filipenses 4:6).

Jeʼex k-ilkoʼ jeʼel u páajtal a waʼalik tiʼ Dios a problemas yéetel tuláakal baʼax ku yúuchultecheʼ. ¿Máasaʼ suuk a tsʼáaik u graciasil tiʼ a amigo yoʼolal baʼax ku beetik ta woʼolal? Bix a wilik, ¿maʼ wa maas kʼaʼabéet a tsʼáaik u graciasil tiʼ Jéeoba yoʼolal tuláakal le baʼax ku beetik ta woʼolaloʼ? (Salmo 106:1).

Tsʼíibt baʼax oʼolal jeʼel a tsʼáaik gracias tiʼ Jéeobaeʼ.

․․․․․

Maʼ xaaneʼ yaan baʼaloʼob jeʼel u beetik a chiʼichnaktaleʼ. ¿Baʼax jeʼel u yáantkecheʼ? Le Bibliaoʼ ku yaʼalik: «Pʼat a kuuch tiʼ Jéeoba, letiʼ túuneʼ yaan u yáantkech. Letiʼeʼ mix bikʼin ken u chaʼa u lúubul le máax utsoʼ» (Salmo 55:22).

Tsʼíibt junpʼéel baʼal chiʼichnakkúuntikech yéetel taak a waʼalik ich oración.

․․․․․

Kʼaʼajs bix tsʼoʼok u yáantkech Jéeoba

Yaan uláakʼ utsil ku taasik u biskuba máak yéetel Dios. Davideʼ tu tsʼíibtaj junpʼéel kʼaay tuʼux ku yaʼalik: «Túunteʼex utiaʼal ka a wileʼex bukaʼaj utsil Jéeoba» (Salmo 34:8). Antes tiʼ u tsʼíibtik le kʼaayaʼ Davideʼ jach sufrirnaji. Jach óolak kíimik tu kʼab rey Saúleʼ. Anchaj tak u bin u taʼakuba tuʼux yaan u enemigoʼob, chéen baʼaleʼ séeb kʼaj óoltaʼabik le beetik tu tuklaj yaan u kíimsaʼaliʼ. Utiaʼal túun maʼ u kíimsaʼaleʼ tu beetaj bey chokochajaʼan u pooleʼ (1 Samuel 21:10-15).

Davideʼ mix juntéen tu tuklaj wa tu salvartuba chéen yoʼolal le naʼat yaan tiʼoʼ. Lelaʼ k-ojel yoʼolal u káajbal le kʼaay tu tsʼíibtoʼ, ku yaʼalik: «Ka orarnajen tiʼ Jéeobaeʼ, tu núukaj in oración. Tu salvarten tiʼ tuláakal baʼax beetik in sajaktal» (Salmo 34:4). Como jach u yilmaj ichil u kuxtal bix u salvartaʼal tumen Jéeobaeʼ, páajchaj u yaʼalik le tʼaanoʼobaʼ: «Túunteʼex utiaʼal ka a wileʼex bukaʼaj utsil Jéeoba». *

Tuukulnen tiʼ le kʼiin ka ta wuʼuyaj jach táan u kanáantkech Jéeobaoʼ. Tsʼíibt le baʼax úuchoʼ. Maʼ xaaneʼ jeʼel a tuklik maʼ noj baʼaleʼ, pero maʼalob ka a kʼaʼajs bix tu yáantilech Jéeoba teʼ súutukoʼ.

․․․․․

Kex a papáʼob tu kaʼansoʼobtech baʼax ku yaʼalik le Biblia desde ta chichniloʼ, chéen teech jeʼel a chʼaʼtuklik wa yaan a amigotik Dioseʼ. ¿Tsʼoʼok wa u káajal a wilik Jéeoba bey a amigoeʼ? Wa todavía maʼeʼ, le xookaʼ yaan u yáantkech utiaʼal a wilik baʼax jeʼel a beetkeʼ. Le kéen u yil Jéeoba bix a tsʼáaik a wóoleʼ yaan u yáantkech. Le Bibliaoʼ ku yaʼalik: «Maʼ u xuʼulul a kʼáatkeʼex baʼax kʼaʼabéetteʼex, tumen yaan u tsʼaʼabalteʼex; maʼ u xuʼulul a kaaxaneʼex, tumen yaan a kaxtikeʼex» (Mateo 7:7).

UTIAʼAL A WOJÉELTIK U MAASILEʼ, ILAWIL LE XOOK 38 YÉTEL 39 TIʼ LE LIBRO LO QUE LOS JOVENES PREGUNTAN. RESPUESTAS PRÁCTICAS (YÁAX LIBRO).

TEʼ XOOK KU SEGUEROʼ

¿Istikyaj wa a wilik a tsikbaltik tiʼ u maasil baʼax ken u beet Dios? ¿Bix jeʼel a defendertik le baʼax ka creerkoʼ?

[Nota]

TEKSTO JEʼEL U YÁANTAJE

«Kiʼimak u yóol le máaxoʼob ku tsʼáaikoʼob cuenta kʼaʼabéet u nuʼuktaʼaloʼob tumen Diosoʼ» (Mateo 5:3).

BEET LELAʼ

Wa ka xokik sáamsamal siete páginas tiʼ le Biblia ich mayaoʼ, yaan u tsʼoʼokol a xokik ichil junpʼéel año.

¿A WOJEL WA?

Techeʼ táan a xokik le libroaʼ yéetel táan a kaanbal tiʼ le Bibliaoʼ tumen Jéeoba natsʼkech tu yiknal (Juan 6:​44).

¡LETIʼE BAʼAXOʼOB KEN IN BEETAʼ!

Utiaʼal in maas jóoʼsik u yutsil u xookil le Bibliaoʼ yaan in beetik lelaʼ: ․․․․․

Utiaʼal in orar mantatsʼeʼ yaan in beetik lelaʼ: ․․․․․

In kʼáat in waʼal tiʼ in papá yéetel tiʼ in maama ka u tsoltenoʼob lelaʼ: ․․․․․

KUX TEECH, ¿BAʼAX KEN A BEETE?

● ¿Baʼax jeʼel a beetik utiaʼal maʼ u náakal a wóol le kéen a xok le Bibliaoʼ?

● ¿Baʼaxten kex kʼeban máakoʼoneʼ Jéeobaeʼ u kʼáat ka orarnakoʼon tiʼ?

● ¿Bix jeʼel a maas jatsʼutskíintik a oraciónoʼobeʼ?

[Uláakʼ baʼax ku tsoʼolol]

«Tin chichnileʼ junpʼéeliliʼ baʼax kin waʼalik kéen orarnaken. Pero beoraaʼ maʼ beyiʼ tumen kin waʼalik tiʼ Jéeoba tuláakal le baʼax ku yúuchulten sáamsamaloʼ» (Eva).

[Cuadro/​Oochel]

 Kʼaj óolt le Bibliaoʼ

1. Yéey junpʼéel tsikbalil yaan teʼ Biblia uts ta wichoʼ. Kʼáat tiʼ Jéeoba ka u yáantech a naʼate.

2. Maʼ a jáajan xokik. Utiaʼal a disfrutartik a xookeʼ: máans ta tuukul tiaʼanechiʼ, ta wuʼuyik u tʼaan le máakoʼoboʼ, ta wuʼuyik u book le baʼax yaan ta baʼpachoʼ yéetel ta wuʼuyik u sabor le janaloʼoboʼ.

3. Beet preguntaʼob. Kéen tsʼoʼokok a xokik le Bibliaoʼ, tukle:

● ¿Baʼaxten tu beetaj Jéeoba u tsʼíibtaʼal teʼ Biblia le tsikbalilaʼ?

● ¿U ejemplo máaxoʼob jeʼel u yáantkeneʼ yéetel máakalmáak maʼiʼ?

● ¿Bix jeʼel u yáantken ichil in kuxtal le baʼax tin xokaʼ?

● ¿Baʼax ku kaʼansikten yoʼolal Jéeoba?

4. Orarnen. Aʼal tiʼ Jéeoba baʼax ta kanaj yéetel bix ken a tsʼáa ichil a kuxtal. Maʼ u tuʼubultech xan a tsʼáaik u graciasil yoʼolal le Bibliaoʼ.

[Oochel]

«A tʼaaneʼ junpʼéel lámpara utiaʼal in wook, bey junpʼéel sáasil ku julik le bej tuʼux kin máanoʼ» (Salmo 119:105).

[Cuadro/​Oochel]

Tsʼáa táanil le baʼax maas kʼaʼanaʼanoʼ

¿Ka wuʼuyik wa minaʼantech tiempo utiaʼal a orar yéetel utiaʼal a xokik le Bibliaoʼ? Le baʼax jeʼel u yáantkechoʼ letiʼe a wilik máakalmáak le baʼaxoʼob maas kʼaʼanaʼantakoʼ.

Koʼox beetik junpʼéel experimento: Kaxt junpʼéel chʼóoyeʼ ka a tsʼáa tuunichoʼob ichil. Le kéen tsʼoʼokkeʼ ka láalik arena ichil hasta u chuʼupul. ¿Ta wilaj baʼax úuchi? Chuʼup le chʼóoy yéetel tuunichoʼob bey xan yéetel arenaoʼ.

Beoraaʼ yaan a kaʼa beetik pero al revés, teʼ vezaʼ letiʼe arena ken a láal táanil ichil le chʼóoyoʼ, kéen tsʼoʼokkeʼ ka tsʼáaik le tuunichoʼoboʼ. ¿Béeychaj wa? ¿Máasaʼ maʼ páajchaj u láaj okol le tuunichoʼoboʼ? Tumen teʼ vezaʼ letiʼe arena ta yáax tsʼáajoʼ.

Le experimentoaʼ ku kaʼansikeʼ wa ka tsʼáaik táanil ichil a kuxtal le baʼaxoʼob maʼ jach importanteʼob, jeʼex a divertirkabaoʼ, maʼ tun antaltech tiempo utiaʼal le baʼaxoʼob maas kʼaʼanaʼantak jeʼex a xokik le Bibliaoʼ. Le oʼolal le Bibliaoʼ ku yaʼalik ‹ka k-jach il máakalmáak le baʼaloʼob maas kʼaʼanaʼantakoʼ› (Filipenses 1:10). Kʼaʼajaktecheʼ wa ka tsʼáaik táanil le baʼaxoʼob maas kʼaʼanaʼantakoʼ yaan u yantaltech tiempo utiaʼal a xokik le Bibliaoʼ bey xan utiaʼal a divertirkaba.

[Oochel]

A biskaba yéetel Dioseʼ bey junpʼéel chan paakʼaleʼ utiaʼal u nojochtaleʼ kʼaʼabéet a jóoyabtik