¿KʼAJAʼAN wa tech a xokik tiʼ le óoxtúul xiʼipalaloʼobaʼ? Letiʼe u yéet máanoʼob Daniel le maʼ tu yóotoʼob u jaantoʼob u yoʼoch le reyeʼ. U kʼaabaʼob tsʼaʼab tumen le babilonioʼoboʼ Sadrac, Mesac yéetel Abed-nego. Baʼaleʼ ilawiloʼob. ¿Baʼaxten letiʼobeʼ maʼ chinlajoʼob tu táan le nojoch beetbil dios jeʼex uláakʼ máakoʼoboʼ? Koʼox ilik baʼaxten.

¿Kʼajaʼan wa tech le Diez mandamientos tu tsʼíibtaj Jéeobaeʼ? Le yáaxoʼ kiaʼalik: Maʼ unaj a adorartik uláakʼ diosoʼob wa maʼ teeniʼ. Kex maʼ chéen chʼaʼabileʼ, le xiʼipalaloʼobaʼ táan u beetkoʼob baʼax kiaʼalik le leyaʼ.

Nabucodonosor u reyil Babiloniaeʼ, u taasmaj máakoʼob jach kʼaj óolaʼanoʼob utiaʼal chintal tu táan le dios u beetmoʼ. Tsʼoʼok u yaʼalik tiʼ tuláakal le máakoʼobaʼ: Ken a wuʼuyeʼex u juun le baakoʼob, le arpaʼob yéetel uláakʼ u nuʼukuliloʼob paaxoʼ, chinleneʼex tu táan le dios beetaʼan yéetel orooʼ. Le máax maʼ kun chintaleʼ yaan u puʼulul ich upʼéel orno jach chokokíintaʼan.

Nabucodonosor túuneʼ ka tu yojéeltaj maʼ chinlajoʼob Sadrac, Mesac yéetel Abed-negoeʼ, jach kʼuuxilnaji. Ka tiaʼalaj ka taasaʼakoʼob tu yiknal. Letiʼ túuneʼ tu kaʼa aʼalajtiʼob ka chinlakoʼob. Baʼaleʼ, le xiʼipalaloʼobaʼ jach u kʼubmaj yóoloʼob tiʼ Jéeoba. Le oʼolal tiaʼaloʼob tiʼ Nabucodonosor: Le Dios k-meyajtkoʼ jeʼel u páajtal u kanáantkoʼoneʼ, baʼaleʼ kex tak maʼ u beetkeʼ, toʼoneʼ maʼ ken k-chintal tu táan a dios.

Ka tu yuʼubaj Nabucodonosoreʼ maas kʼuuxchaji. Ka tiaʼalaj: ¡Chokokíinteʼex le orno siete u téenel maas tiʼ jeʼex suukil a beetkeʼexoʼ! Ka tsʼoʼokeʼ, ka tiaʼalaj tiʼe soldadoʼob maas yaan u muukʼoʼob ka u kʼaxoʼob Sadrac, Mesac yéetel Abed-negooʼ yéetel ka u puloʼob ichil le ornooʼ. Le ornoaʼ jach chokoj, le oʼolal u kʼáakʼileʼ tu kíimsaj le máakoʼob pul le xiʼipalaloʼob ichiloʼ. Baʼaleʼ, ¿baʼax úuch tiʼe óoxtúul xiʼipalaloʼobaʼ?

Ka chʼeenebnaj le rey ich le ornooʼ jach jaʼakʼ u yóol. Ka tiaʼalaj: ¿Maʼ wa óoxtúul máakoʼob t-kʼaxaj k-pul ichiliʼ?

U palitsiloʼobeʼ tu núukoʼob: Jaaj, óoxtúul.

Le reyoʼ tiaʼalaj: Baʼaleʼ, teneʼ táan in wilik kantúul máakoʼob ku xíimbaloʼob ich le kʼáakʼoʼ. Tsʼoʼoleʼ maʼ kʼaxaʼanoʼobiʼ, mix xan táan u yeleloʼobiʼ. U kantúuloʼ bey utúul dioseʼ. Ka jach náatsʼ le rey tu jool le ornooʼ ka tu kʼaʼam aʼalaj: ¡Sadrac! ¡Mesac! ¡Abed-nego! ¡U palitsileʼex Dios, jóokʼeneʼex!

Le ka jóokʼoʼobeʼ, tuláakal le máakoʼoboʼ tu yiloʼob mix baʼal úuch tiʼe xiʼipalaloʼobaʼ. Le rey túunoʼ tiaʼalaj: ¡Kiʼikiʼtʼantaʼak u Dios Sadrac, Mesac yéetel Abed-nego! Tumen letiʼeʼ tu túuxtaj u ángel utiaʼal kanáantkoʼob, yéetel mix baʼal beet u chintaloʼob tu táan yaanal dios.

¿Máasaʼ lelaʼ ku yeʼesiktoʼon bix kʼaʼabéet u chúukpajal k-óol k-meyajt Jéeoba?