«Pʼáatak ta puksiʼikʼaleʼex baʼax kin waʼalik»

«Wa ku pʼáatal ta puksiʼikʼaleʼex baʼax kin waʼalikeʼ jach tu jaajil in discípuloʼex. Teʼexeʼ yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex» (JUAN 8:31, 32).

¿Baʼax tu yóotaj u yaʼal Jesús? Le ka tu yaʼalaj Jesús «baʼax kin waʼalikeʼ» táan kaʼach u tʼaan tiʼ le baʼaxoʼob ku kaʼansikoʼ. Chéen baʼaleʼ tu yaʼalaj xaneʼ le baʼaxoʼob tu kaʼansoʼ maʼ chéen tiʼ letiʼ u taaliʼ. Letiʼeʼ tu yaʼalaj: «Teneʼ maʼ tu juunal in wóol tʼaanajeniʼ, le Taata máax túuxtenoʼ letiʼ aʼalten jach baʼax ken in waʼale» (Juan 12:49). Juntéenjeak le ka orarnaj tiʼ Jéeobaeʼ tu yaʼalaj: «A tʼaaneʼ letiʼ u jaajil». Le oʼolal cada ken kaʼansajnak Jesúseʼ ku chʼaʼchiʼitik u Tʼaan Dios (Juan 17:17; Mateo 4:4, 7, 10). ¿Bix túun jeʼel u pʼáatal tu puksiʼikʼal le jaajil cristianoʼob le baʼaxoʼob tu kaʼansaj Jesúsoʼ? Kʼaʼabéet u xokikoʼob le Bibliaoʼ, u tsʼáaik ichil u kuxtaloʼob le baʼax ku yaʼalikoʼ yéetel tiʼ xan kʼaʼabéet u jóoʼskoʼob le baʼax ku creerkoʼoboʼ.

¿Baʼax tu beetaj le yáax cristianoʼoboʼ? Apóstol Pabloeʼ jach tu respetartaj u Tʼaan Dios jeʼex tu beetil Jesúsoʼ. Letiʼeʼ tu yaʼalaj: «Tuláakal Tsʼíibeʼ tiʼ Dios u taal» (2 Timoteo 3:16). Tsʼoʼoleʼ tiʼ le xiiboʼoboʼ aʼalaʼabtiʼobeʼ le kéen kaʼansajnakoʼobeʼ maʼ u kʼéechloʼob «tiʼ baʼax ku yaʼalik u tʼaan Dios» (Tito 1:7, 9). Aʼalaʼab xan tiʼ le cristianoʼoboʼ ka u kanáantubaʼob utiaʼal maʼ u táabsaʼaloʼob yéetel u kaʼansaj chéen máakoʼob. Tumen leloʼ «chéen kunel tʼaanoʼob suuk u beetaʼal tumen le úuchben láakʼtsiloʼoboʼ», tsʼoʼoleʼ «lelaʼ letiʼe bix u tuukul le yóokʼol kaabaʼ, maʼ u tuukul Cristoiʼ» (Colosenses 2:8).

Teʼ kʼiinoʼobaʼ, ¿máaxoʼob beetik beyoʼ? Tu añoil 1965, le Vaticanooʼ tu aprobartaj le baʼax ku yaʼalik le Constitución dogmática sobre la divina revelaciónoʼ, lelaʼ chʼaʼchiʼitaʼab xan teʼ Catecismo de la Iglesia Católicaoʼ, ku yaʼalik: «U kaʼansajoʼob le iglesia católicaoʼ maʼ chéen teʼ Biblia jóoʼsaʼanoʼ. Kex beyoʼ le kaʼansajoʼobaʼ kʼaʼabéet u yilaʼaloʼob bey tiʼ Dios u taaleʼ». Le revista Maclean’soʼ tu chʼaʼchiʼitaj le baʼax tu yaʼalaj juntúul koʼolel ku kaʼansaj tu religión tu kaajil Toronto (Canadá), letiʼeʼ tu yaʼalaj: «¿Baʼaxten kʼaʼabéet k-chaʼik u nuʼuktaʼal k-kuxtal tumen junpʼéel baʼal tsʼoʼok 2,000 años tsʼíibtaʼak? Si toʼoneʼ jeʼel xan u páajtal k-nuʼuktik k-kuxtal chéen t-juunaleʼ. Pero le kéen k-chʼaʼ en cuenta le baʼaxoʼob tu yaʼalaj Jesús yéetel le Bibliaoʼ ku pʼáatal maʼ tu páajtal k-beetik le baʼaxoʼob k-tuklikoʼ».

Junpʼéel enciclopedia católicaeʼ ku yaʼalik yoʼolal u testigoʼob Jéeoba: «Letiʼobeʼ teʼ Biblia ku jóoʼskoʼob tuláakal le baʼax ku creerkoʼoboʼ yéetel le bix u kuxtaloʼoboʼ» (New Catholic Encyclopedia). Maʼ sen úucheʼ juntúul máak kajaʼan Canadáeʼ le táan u káajal u tsikbal yéetel juntúul koʼolel u testigo Jéeobaeʼ, tu yaʼalajtiʼ: «Teneʼ in wojel máaxeʼexiʼ». Le máak túunoʼ tu tuchʼubtaj le Biblia u machmaj le koʼoleloʼ ka tu yaʼalaj: «Le libro a machmoʼ letiʼe baʼax eʼesik máaxechoʼ».