Nahúm 3:1-19
3 ¡Óotsil tiʼ le kaaj tuʼux jach yaʼab u kíimsaʼal máakoʼ!
Teʼeloʼ chéen tuus yéetel ookol ku beetaʼaliʼ.
¡Mantatsʼ táan u kaxtik tiʼ máax ken u luʼs baʼax yaantiʼ!
2 Teʼeloʼ ku yuʼubaʼal u juum u wáakʼal le chicoteoʼ bey xan u juum u kʼoʼokʼolkuba le ruedasoʼ,ku yuʼubaʼal u jóokʼol u yáalkab le tsíiminoʼoboʼ bey xan u juum le carroʼoboʼ.
3 Teʼeloʼ ku yilaʼal máakoʼob u natʼmoʼob tsíiminoʼobiʼ, ku yilaʼal u léetsʼbal le espadaʼob yéetel u léembal le lanzaʼoboʼ,jach yaʼab le máakoʼob tsʼoʼok u kíimsaʼaloʼoboʼ yéetel u wíinkliloʼobeʼ tiʼ nikkúuntaʼanoʼobiʼ,tuláakal tuʼux ku yilaʼal kimen máakoʼobiʼ.
Le máakoʼoboʼ ku bin u tʼóochpajloʼob yéetel le kimen wíinkliloʼoboʼ.
4 Lelaʼ ku yúuchul tu yoʼolal le baʼaloʼob kʼaastak tu beetaj le x-prostitutaoʼ,letiʼeʼ kiʼichpan yéetel jatsʼuts u yilaʼal, jach u yojel pulyaʼaj,ku tusik le kaajoʼob ikil u prostituirkuba tu yéeteloʼoboʼ, ku tusik xan le familiaʼob ikil u pulyaʼajoʼ.
5 Jéeoba, le máax gobernartik le ángeloʼoboʼ, ku yaʼalik:+ «¡Ilawile!, teneʼ tiaʼanen ta contraeʼ,*yaan in láaj síilik a nookʼ, a nookʼ túuneʼ yaan u pixik a wich.
Teneʼ yaan in beetik ka ilaʼak tumen le kaajoʼob de ke minaʼan a nookʼoʼ,yéetel yaan in beetik ka ilaʼak tumen le reinoʼob le baʼax suʼtsil tsʼoʼok u yúuchultechoʼ.
6 Teneʼ yaan in pulik baʼaloʼob suciotak ta wóokʼol,yaan in beetik ka jach pʼektaʼakech,yéetel yaan in beetik ka chaʼantaʼak le baʼax úuchtechoʼ.+
7 Tuláakal máax kun ilkecheʼ yaan u náachtal tiʼ teech+ yéetel yaan u yaʼalik:
‹¡Tsʼoʼok u xuʼulsaʼal tiʼ Nínive!
¿Máax kun chʼaʼik óotsilil tiʼ?›.
¿Tuʼux ken in kaxt máax jeʼel u líiʼsik a wóoleʼ?
8 Nínive, ¿maas wa maʼalobech tiʼ No-amón,*+ le yaan kaʼach tu tséel u jaʼiloʼob le Nilooʼ?+
No-amón kaʼacheʼ baʼpachtaʼan tumen jaʼ,u ayikʼalileʼ tiʼ le kʼáaʼnáab u taaloʼ, yéetel u pakʼiloʼobeʼ letiʼe kʼáaʼnáaboʼ.
9 No-amóneʼ jach yaan kaʼach u páajtalil tumen maʼ tu xuʼulul u yáantaʼal tumen Etiopía bey xan tumen Egipto.
Ku yáantaʼal* xan tumen Fut+ bey xan tumen le libioʼoboʼ.+
10 Kex beyoʼ, No-amóneʼ bisaʼab táanxel luʼumil,bisaʼab bey esclavoeʼ.+
U paalaleʼ xeʼexetʼaʼab u wíinkliloʼob tiʼ cada esquina.
Le xiiboʼob jach ku respetartaʼaloʼob ichiloʼoboʼ tʼoʼoxoʼob utiaʼal u bisaʼaloʼob bey esclavoʼobeʼ,yéetel le máaxoʼob jach kʼaj óolaʼanoʼoboʼ kʼaʼaxoʼob yéetel cadenaʼob.
11 Nínive, teech xaneʼ yaan a káaltal,+yaan a máan a taʼakaba.
Techeʼ yaan a máan a kaxt tuʼux a taʼakikaba tiʼ le enemigooʼ.
12 Le pakʼoʼob yanoʼob ta baʼpachoʼ beyoʼob jeʼex u matailoʼob higo tsʼoʼok u kʼantal u yáax ichoʼoboʼ,wa ku tíitaʼal u matailoʼobeʼ u yichoʼobeʼ ku lúubloʼob tu chiʼ le máaxoʼob kun jaantikoʼ.
13 ¡Ilawile!, a soldadoʼobeʼ beyoʼob koʼoleloʼobeʼ.
U joonajiloʼob a luʼumeʼ yaan u pʼáatal jeʼekʼaboʼob utiaʼal u yokol a enemigoʼob.
Yaan u láaj elel le trancaʼob yaan teʼ ta joonajoʼoboʼ.
14 ¡Jóoʼs jaʼ, yéetel preparartaba utiaʼal le kʼiin ken baʼpachtaʼakechoʼ!+
Muʼukʼaʼankúunt le pakʼoʼoboʼ.
Xeen teʼ tuʼux ku xaʼakʼtaʼal le luukʼoʼ ka a tsʼatsʼaʼchaʼate,yéetel beet ladrillos.*
15 Kex ka a beet beyoʼ yaan a xuʼulsaʼal tumen le kʼáakʼoʼ.
Yaan a chʼaʼakal tumen junpʼéel espada.+
Le baʼaloʼobaʼ yaan u xuʼulskoʼobtech jeʼex u beetaʼal tiʼ le xíiw tumen le sáakʼoʼob* maʼ jóokʼok u xiikʼoʼoboʼ.+
¡Yaʼabkuntaba jeʼex le sáakʼoʼob maʼ jóokʼok u xiikʼoʼoboʼ!
¡Jach yaʼabchajkech jeʼex le sáakʼoʼoboʼ!
16 Nínive, techeʼ tsʼoʼok a yaʼabkuntik le máaxoʼob ku koonoloʼoboʼ, letiʼobeʼ maas yaʼaboʼob ke le estrellaʼob yanoʼob teʼ kaʼanoʼ.
Le sáakʼoʼob minaʼan u xiikʼoʼoboʼ le kéen tsʼoʼokok u jeléeboʼobeʼ ku bin u xikʼnaloʼob.
17 Le máaxoʼob kanáantkechoʼ beyoʼob jeʼex le sáakʼoʼoboʼ,yéetel u nuuktakil a soldadoʼobeʼ beyoʼob jeʼex yaʼabkach sáakʼoʼobeʼ.
Le kéen u beet keʼeleʼ letiʼobeʼ ku máanskoʼob áakʼab teʼ corraloʼob de tuunichoʼ.
Chéen baʼaleʼ le kéen jóokʼok le Kʼiinoʼ ku bin u xikʼnaloʼob,yéetel mix máak u yojel tuʼux ku binoʼob.
18 U reyil Asiria, a kanan tamanoʼobeʼ táan u weenloʼob,le tsʼuuloʼoboʼ pʼaatloʼob tu yotochoʼob.
A kaajaleʼ kʼiʼitpajaʼan teʼ montañaʼoboʼ,yéetel mix máak muchʼkíintikoʼob.+
19 Nínive, minaʼan utskíinajil tiʼ le baʼax ku yúuchultechoʼ,maʼ tu páajtal u tsʼaʼakal le herida yaantechoʼ.
Tuláakal le máaxoʼob kun ojéeltik le baʼax ku yúuchultechoʼ yaan u papaxkʼaboʼob.+
Tumen ¿máax maʼ muʼyajnak* ikil a sen beetik a kʼasaʼaniliʼ?».+
Notas
^ Wa «teneʼ Nínive tiaʼanen ta contraeʼ».
^ Uláakʼ bix kʼaj óolaʼanileʼ Tebas.
^ Ich hebreoeʼ ku yaʼalaʼal kaʼach «Ka wáantaʼal».
^ Le ladrillosaʼ bey mejen blokeʼ. Suuk kaʼach u beetaʼal yéetel suʼuk xaʼakʼtaʼan yéetel luukʼ wa yéetel kʼat.
^ Wa «langostaʼob».
^ Wa «sufrirnak».
