Yaʼab máakoʼob chiʼichnakoʼob yoʼolal le guerra yaan Israel, Irán yéetel Estados Unidosoʼ. ¿Yaan wa u maas peortal le guerraoʼ? ¿Jeʼel wa páajtal u evitartaʼal tumen le gobiernoʼob ka maas peorchajkoʼ? ¿Jeʼel wa u beetkoʼob u yantal jeetsʼelil way Luʼumeʼ?

 Le máaxoʼob u kʼaj óoloʼob le profecíaʼob yaan teʼ Biblia tu libroil Apocalipsisoʼ maʼ xaaneʼ taak u yojéeltikoʼob wa letiʼe Armagedón tsʼoʼok u káajal tu chikʼinil Asiaoʼ.

 ¿Baʼax ku yaʼalik le Bibliaoʼ?

¿Le gobiernoʼoboʼ jeʼel wa u páajtal u xuʼulskoʼob le guerra yaan tu chikʼinil Asiaoʼ?

 Le Bibliaoʼ ku yaʼalik: «Maʼ a kʼubik a wóoleʼex tiʼ príncipeʼob, mix tiʼ uláakʼ j-kʼeban máakoʼob tumen maʼ tu páajtal u salvarkoʼob máak» (Salmo 146:3).

 U jaajileʼ maʼ k-ojel wa le gobiernoʼoboʼ yaan u páajtal u beetkoʼob u yantal jeetsʼelil teʼ tuʼux yaan le guerraoʼ. Chéen baʼax k-ojleʼ le Bibliaoʼ ku yaʼalikeʼ mix juntúul político, gobierno wa u muchʼ máakoʼob kun páajtal u xuʼulskoʼob le guerraʼoboʼ. Chéen Jéeoba kun páajtal u beetik «u xuʼulul u yantal baʼateʼel tiʼ tuláakal yóokʼol kaab» (Salmo 46:9).

•   Utiaʼal a wojéeltik u maasileʼ ilawil le xook «Taʼaytak u xuʼulul le guerraʼoboʼ», jóokʼ teʼ revista Le Máax ku Kananoʼ.

Le guerraoʼ, ¿táan wa u béeykuntik junpʼéel profecía?

 Le Bibliaoʼ ku yaʼalik: «Teʼexeʼ yaan a wuʼuyikeʼex jejeláas tuʼuxoʼob táan u baʼateʼel le kaajoʼoboʼ. [...] Junpʼéel kaajeʼ yaan u baʼateʼel tu contra uláakʼ kaaj, junpʼéel reinoeʼ yaan u baʼateʼel tu contra uláakʼ reino» (Mateo 24:6, 7).

 Le guerra yaan tu chikʼinil Asiaoʼ ku yeʼesikeʼ kuxaʼanoʼon «tu tsʼook kʼiinoʼob» (Mateo 24:3; 2 Timoteo 3:1). Ku yeʼesik xaneʼ Dioseʼ jach taʼaytak u xuʼulsik tiʼ le guerraʼoboʼ bey xan tiʼ tuláakal le baʼaxoʼob beetik k-muʼyajoʼ.

•   Wa taak a wojéeltik u maasileʼ ilawil le xook «¿Baʼax eʼesik kuxaʼanoʼon ‹tu tsʼook kʼiinoʼob›?».

¿Tu chikʼinil Asia wa kun káajal le Armagedónoʼ?

 Le Bibliaoʼ ku yaʼalik: «Tu muchʼkíintoʼob le reyoʼob teʼ lugar ku kʼaabaʼtik ich hebreo Armagedónoʼ» (Apocalipsis 16:16).

 Le Armagedónoʼ maʼ tu chikʼinil Asia kun káajaliʼ tumen maʼ u guerra u gobiernoiloʼob wíinikiʼ, baʼaxeʼ u guerra Dios tu contra le gobiernoʼoboʼ.

•   Wa taak a wojéeltik u maasileʼ ilawil le xook «¿Baʼax le Armagedónoʼ?».

¿Baʼax jeʼel u yáantkoʼon utiaʼal maʼ k-sen chiʼichnaktaleʼ?

 Le Bibliaoʼ ku yaʼalik: «Maʼ a sen chiʼichnaktaleʼex tu yoʼolal mix baʼal, baʼaxeʼ aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex» (Filipenses 4:6).

 Jéeobaeʼ a jach u kʼáat ka orarnakoʼon tiʼ letiʼ. Letiʼeʼ taak u yáantkoʼon le oʼolal ku yuʼubik k-oraciónoʼob yéetel ku yáantkoʼon utiaʼal maʼ k-sen chiʼichnaktal (1 Pedro 5:7). Junpʼéel bix u yáantkoʼoneʼ letiʼe u tsoliktoʼon baʼaxten yaan guerraʼob, bix ken u xuʼulse yéetel baʼax ken u beet utiaʼal u luʼsik tuláakal le baʼaxoʼob beetik k-sufrir teʼ kʼiinoʼobaʼ (Apocalipsis 21:3, 4).

•   Utiaʼal a wojéeltik u maasileʼ ilawil le xook «¿Jeʼel wa u yáantken le baʼax ku yaʼalik le Bibliaoʼ?».