«Walajki wa jaypʼéel añosaʼ, ¿máasaʼ maʼ t-tuklaj wa le kaʼansaj ku tsʼáaik u kaajal Jéeobaoʼ yaan u tsʼaʼabaltoʼon ich Internet?». Lelaʼ bey tu yaʼalil le sukuʼun Geoffrey Jackson teʼ jaats 6 tiʼ u informe le Cuerpo Gobernante 2020. Tsʼoʼoleʼ tu yaʼalaj xan: «Pero beora táan le pandemiaaʼ, ¿baʼax ken k-beet kaʼach wa minaʼantoʼon le aplicación JW libraryoʼ? Jéeobaeʼ úuch joʼopʼok u prepararkoʼon utiaʼal k-aktáantik le baʼaxoʼob ku yúuchul teʼ kʼiinoʼobaʼ».

 ¿Bix úuchik u prepararkoʼon Jéeoba? ¿Baʼaxoʼob kʼaʼabéetchaj utiaʼal u beetaʼal le aplicación JW Libraryoʼ? ¿Baʼaxoʼob kʼaʼabéet utiaʼal u actualizartaʼal yéetel utiaʼal u maas jatsʼutskíintaʼal?

 Tu mesil mayo tiʼ 2013, le Cuerpo Gobernanteoʼ tu yaʼalaj tiʼ le sukuʼunoʼob ku meyajoʼob yéetel MEPS, junpʼéel departamento yaan teʼ central mundialoʼ, ka u beetoʼob junpʼéel aplicación tuʼux jeʼel u páajtal u xoʼokol le Biblia Túumben Luʼumoʼ. Paul Willies ku meyaj teʼ departamentoaʼ tu yaʼalaj: «Mix juntéen k-beet junpʼéel aplicación beyaʼ, utiaʼal k-beetkeʼ kʼaʼabéetchaj k-jeʼelsik jujunpʼéel proyectoʼob k-beetik kaʼachi. Tsʼoʼoleʼ t-formartaj junpʼéel túumben equipo yéetel t-kʼáataj u yáantaj uláakʼ departamentoʼob ku meyajoʼob Betel. Sen orarnajoʼon xan tiʼ Jéeoba utiaʼal k-kʼáatik u yáantaj yéetel jach t-ilaj bix úuchik u yáantkoʼon. Chéen cinco meses máankeʼ ka presentartaʼab le aplicación JW Library tu muchʼtáambalil 2013».

 Baʼaleʼ yaan uláakʼ meyaj kun beetbil kaʼachi, u tsʼaʼabal uláakʼ publicaciónoʼob ich jejeláas idiomaʼob utiaʼal u xakʼalxook máakiʼ. Tu mesil enero tiʼ 2015, tsʼokaʼaniliʼ u tsʼaʼabal yaʼab publicaciónoʼob ich inglés ichil le aplicacióno’, ka máan seis meses xaneʼ páajchaj u descargartaʼal yaʼab publicaciónoʼob ichil u cientosil idiomaʼobiʼ.

 Le sukuʼunoʼoboʼ láayliʼ táan u meyajoʼob utiaʼal u maas jatsʼutskíintikoʼob le aplicaciónoʼ. Por ejemploeʼ beoraaʼ ku páajtal u chaʼantaʼal videoʼobiʼ yéetel tsʼoʼok u tsʼaʼabal tuláakal le baʼaxoʼob kʼaʼabéet utiaʼal k-líiʼsikba yéetel le reuniónoʼoboʼ. Tsʼoʼoleʼ le táan k-xokik le Bibliaoʼ ku páajtal k-ilik le referenciaʼob ku taasik le libro Áantaj utiaʼal xakʼalxookoʼ.

 Cada meseʼ JW Libraryeʼ ku usartaʼal tiʼ maas tiʼ 15 millones dispositivoʼob, pero 8 millones tiʼ letiʼobeʼ sáamsamal u usarkoʼob le aplicaciónoʼ. ¿Baʼax túun ku beetaʼal utiaʼal ka páajchajak u meyaj tubeel? Paul Willieseʼ ku yaʼalik: «U jaajileʼ junpʼéel meyaj mix bikʼin u xuʼulul tumen cada táan k-tsʼáaik uláakʼ baʼaloʼobiʼ yéetel táan k-ilik ka fácilchajak u usartaʼal JW Library. Como cada táan u actualizartaʼal le bix u meyaj le dispositivoʼoboʼ kʼaʼabéet xan k-ilik ka seguernak u meyaj maʼalob le aplicación JW Libraryoʼ. Tsʼoʼoleʼ como cada táan xan u tsʼaʼabal u maasil grabaciónoʼob yéetel túumben publicaciónoʼobeʼ ku kʼaʼabéetchajal k-actualizartik JW Library yéetel k-ilik baʼax ku bineltiktiʼ». Tak bejlaʼeʼ teʼ aplicación JW Libraryoʼ yaan kex 200,000 publicaciónoʼob ichil yéetel maas tiʼ 600,000 grabaciónoʼob ich jejeláas idiomaʼob, yaneʼ beetaʼan u videoil yéetel yanoʼobeʼ chéen u audioil.

 Utiaʼal u actualizartaʼal le aplicaciónaʼ maʼ chéen ku kʼaʼabéettal computadoraʼobiʼ, baʼaxeʼ ku kʼaʼabéettal xan u maʼanal u licenciail wa u permisoil. Utiaʼal u maʼanal junpʼéel u licenciail le aplicaciónaʼ ku boʼotaʼal 1,500 dólares cada año, tsʼoʼoleʼ cada añoeʼ u departamentoil MEPSeʼ ku xupik kex 10,000 dólares ikil u manik u maas túumbenil le nuʼukuloʼob jeʼex computadoraʼob, tabletaʼob yéetel celuraroʼob utiaʼal u yilik wa láayliʼ maʼalob u meyaj le aplicación JW Libraryoʼ.

 Yéetel u yáantaj le aplicación JW Libraryoʼ tsʼoʼok u ahorrartaʼal yaʼab taakʼin tumen maʼ yaʼab publicaciónoʼob ku imprimirtaʼal yéetel ku túuxtaʼaliʼ. Por ejemploeʼ tu añoil 2013, le folleto Xakʼalxokt sáamsamal le Kiliʼich Tsʼíiboʼoboʼ imprimirtaʼab 12 millones u pʼéelaliʼ, pero tu añoil 2020, chéen imprimirtaʼab cinco millones u pʼéelal kex anchaj uláakʼ 700 mil publicadoroʼob tiʼ tuláakal yokʼol kaab. ¿Baʼaxten maʼ yaʼab imprimirtaʼabiʼ? Tumen bejlaʼeʼ u maas yaʼabil le sukuʼunoʼoboʼ teʼ JW Library a ku xokikoʼob u tekstoil le kʼiinoʼ.

 Yaʼab bix jeʼel u meyajtoʼon JW Libraryeʼ. Por ejemplo Geneviève, juntúul kiik kajaʼan Canadáeʼ ku yaʼalik bix tsʼoʼok u yáantaʼal tumen JW Library utiaʼal u maas maʼalobkíint bix u xakʼalxook. Letiʼeʼ ku yaʼalik: «U jaajileʼ wa sáamsamal yaan u kʼaʼabéettal in jóoʼsik yaʼab libroʼobeʼ, in waʼalikeʼ maʼ tun taaktal in xakʼalxook. Pero yéetel u yáantaj le aplicaciónaʼ chéen kʼaʼabéetten in tablet tumen tiʼ yaan tuláakal baʼax kʼaʼabéet utiaʼal in xakʼalxookiʼ. In xakʼalxook sáamsamaleʼ tsʼoʼok u yáantken utiaʼal u maas muʼukʼaʼantal in fe yéetel utiaʼal in maas náatsʼal tiʼ Jéeoba».

 Le aplicaciónaʼ jach yaʼab u yáantaj, maases tu kʼiiniloʼob le coronavirusoʼ. Charlyn, kajaʼan Estados Unidoseʼ, ku yaʼalik: «Yoʼolal le coronavirus táan u afectartik tuláakal yóokʼol kaaboʼ tsʼoʼok maas tiʼ junpʼéel año maʼ kʼuchukten mix junpʼéel publicación imprimirtaʼaniʼ. Pero teʼ JW Libraryoʼ tsʼaʼan tuláakal le baʼaxoʼob kʼaʼabéet utiaʼal k-maas muʼukʼaʼankúuntik k-espiritualidadoʼ, kin tsʼáaik u graciasil tiʼ Jéeoba yoʼolal le jatsʼuts regalo tu tsʼáajtoʼonoʼ».

 Faye, juntúul kiik kajaʼan Filipinaseʼ ku yaʼalik xan: «Jach táaj jatsʼuts le aplicaciónaʼ, tiaʼan tuláakal baʼax kʼaʼabéetten utiaʼal in náatsʼal yiknal Jéeobaiʼ. Ku meyajten sáamsamal de temprano utiaʼal in xook, le táan in meyaj tin wotochoʼ kin wuʼuyik wa baʼax grabacióniloʼob, ku meyajten utiaʼal in prepararkinba yéetel le reuniónoʼoboʼ, utiaʼal in xakʼalxoktik le Bibliaoʼ yéetel in chaʼantik videoʼobiʼ. Tsʼoʼoleʼ mientras táan in páaʼtik u kʼuchul in turno le bijaʼanen wa tuʼuxoʼ ku meyajten utiaʼal in xokik le Bibliaoʼ bey xan le publicaciónoʼoboʼ. Le aplicaciónaʼ jach táaj jatsʼuts».

 Tsʼoʼoleʼ le aplicaciónaʼ jach ku yáantaj kéen k-tsikbalt u tʼaan Dios tiʼ le máakoʼoboʼ. Por ejemploeʼ juntúul kiik kajaʼan Camerúneʼ jach jatsʼuts tu yuʼubil junpʼéel teksto meyajnaj tiʼ u compañera le táan u múul predicaroʼoboʼ. Ka máan wa jaypʼéel kʼiinoʼobeʼ le táan u kaʼansik u tʼaan Diosoʼ taakchaj xan u meyajtiʼ le tekstooʼ, pero maʼ kʼajaʼantiʼ máakalmáakiʼ. Letiʼeʼ ku yaʼalik: «Yaaske kʼajaʼanten baʼax ku yaʼalik u jaats tiʼ le tekstooʼ, tin jeʼekʼabtaj JW Libraryeʼ, binen tuʼux yaan le Bibliaoʼ ka tin tsʼíibtaj teʼ chan lupa le tʼaan kʼaʼajtenoʼ. Yéetel u yáantaj le aplicaciónaʼ ku páajtal in kaxtik le tekstoʼob maʼ jach kʼajaʼantenoʼ».

 Jach k-tsʼáaikteʼex u graciasil yoʼolal le donaciónoʼob ka túuxtikeʼex teʼ donate.jw.org. Yoʼolal a wáantajeʼexeʼ ku páajtal u actualizartaʼal JW Library yéetel u maas maʼalobkíintaʼal bix u meyaj. Beyoʼ le sukuʼunoʼob tiʼ tuláakal yóokʼol kaaboʼ ku páajtal u jóoʼskoʼob u yutsil. Jach k-tsʼáaikteʼex u graciasil yoʼolal a wutsileʼex.

1. Octubre tiʼ 2013: Ku publicartaʼal JW Library yéetel ichileʼ tsʼaʼan le Biblia Túumben Luʼum ich inglésoʼ.

2. Enero tiʼ 2015: Ku tsʼaʼabal u maasil publicaciónoʼob ich inglésiʼ, ka máan kʼiineʼ ichil u cientosil idiomaʼob.

3. Noviembre tiʼ 2015: Ku tsʼaʼabal le coloroʼob utiaʼal u marcartaʼal le tʼaanoʼoboʼ.

4. Mayo tiʼ 2016: Ku tsʼaʼabal le jaats «Reuniones».

5. Mayo tiʼ 2017: Ku tsʼaʼabal le jaats utiaʼal u beetaʼal notasoʼ.

6. Diciembre tiʼ 2017: Ku tsʼaʼabal le Biblia de estudio ich inglésoʼ.

7. Marzo tiʼ 2019: Ku páajtal u descargartaʼal audioʼob, u chaʼantaʼal videoʼob en línea yéetel u xoʼokol le referenciaʼob ku taasik le libro Áantaj utiaʼal xakʼalxookoʼ.

8. Enero tiʼ 2021: Ku tsʼaʼabal túumben baʼaloʼob utiaʼal u béeytal u meyaj le libro Disfrutart le Kuxtaloʼ.