Yam’ ni tay Jesus e aram e n’en ni buch kakrom nth’abi ga’ fan. Ya ke yim’ ni nge sulweg e yafos ko girdi’ nga rogon ko som’on. I sunmiy Got e gal nsom’on e girdi’ ni yow ba flont, maku dab ra m’argow ara ra mow’. (Genesis 1:31) Machane, ke yib e denen nga fayleng u daken taabe’ ni aram Adam. I pi’ Jesus e yafos rok ni nge chuwegdad ko denen nge yam’.​—Mu beeg e Matthew 20:28; Roma 6:23.

Ke dag Got feni ri gad ba t’uf rok ni bochan e ke l’og Fak ke yib nga fayleng ke yib i yim’ ni fan ngodad. (1 John 4:9, 10) I yog Jesus ngak pi gachalpen ni ngaur pugeduran ngan’rad e yam’ ni tay ni aram e ngar madnomnaged e re n’ey ni ngar ked e flowa mar unumed e wain. Faan gad ra un ko re madnom ney ni gubin e duw, ma aram e gad be dag nib ga’ fan u wan’dad e t’ufeg ni ke dag Got nge Jesus ngodad.​—Mu beeg e Luke 22:19, 20.

Som’on u nap’an ni yog Jesus ngak pi gachalpen ni ngar madnomnaged e yam’ ni tay, me weliy murung’agen reb e m’ag nra ngongliy u thilrad. (Matthew 26:26-28) Re n’ey ni rin’ e aram e n’en ni bing e kanawo’ ngorad nge yugu boch e girdi’ ni ngar uned ngak Jesus nga tharmiy ni ngar manged boch e pilung nge prist. Yugu aram rogon ni bokum milyon e girdi’ ni yad ma madnomnag e yam’ ni tay Jesus, machane kemus ni piin ni yad bay u tan fare m’ag e yad ra kay fare flowa mar unumed fare wain.​—Mu beeg e Revelation 5:10.

Ke chugur ni nge gaman 2,000 e duw ni be mel’eg Jehovah e piin ni yad ra mang pilung u Gil’ilungun. (Luke 12:32) Pi girdi’ ney e yad buchuuw ni faanra ngan taarebrogonnag urngirad ngak e piin ni athap rorad e ngar pared u roy u fayleng ndariy n’umngin nap’an.​—Mu beeg e Revelation 7:4, 9, 17.