Yibe Gay e Fulweg
Yibe Gay e Fulweg
“Gathi’ gubin e girdi’ ni yad manang ko mini’ Jesus. Yugu dariy fan rogon gelngin e michan’ ara maruwaran’ rodad u murung’agen, ma gad ma fith, ‘Ko mini’ e re m’on ney?’”—ROGON NI YOG STAN GUTHRIE.
GIRDI’ e yad baadag ni ngar nanged murung’agen Jesus. Boor ken e babyor nge kachido ni kan fal’eg ni murung’agen. Machane ku boor e deer ni murung’agen Jesus ni kan fith. Ba thilthil rogon ni ma lemnag e girdi’ ko mini’ Jesus.
Boch e duw kafram, ma l’agruw e ta yol e kar piningew e girdi’ ni ngar pied e fulweg ko re deer ney ni “Mini’ Jesus?” Baaray boch e fulweg ni ke pi’ e girdi’:
● “Sana ir reb e sensey ni ke dag ko yafas rok ni ir be’ ni ma runguy e girdi’.”
● “I ir be’ ni taareb rogon ko yug girdi’ machane ba thil rogon e yafas rok ko yugu boch e girdi’.”
● “Dariy e mich riy ni immoy u roy u fayleng.”
● “Jesus e ir Fak Got ni kan gargelnag, me yim’, min faseg ko yam’ ni nge chuwegdad ko denen. Be par nib fas e ngiyal’ ney, ma ku ra sul bayay nga fayleng.”
● “Ba mich u wan’ug ni Jesus Kristus e kari mus ni ir fak Got, ni ir be’ ni bod e girdi’, ma ku ir reb e Got.”
● “Jesus e ba yat ni fan ko piin bitir ni ke ilal boch.”
Ba tamilang ni dariy reb ko pi n’en ni kar weliyed nib puluw. Bay bang ni gad ra pirieg e fulweg nib tamilang mab puluw ko pi deer rodad u murung’agen Jesus? Piin ni kar yoloyed e re babyor ney e ba mich u wan’rad ni goo Bible ni Thin rok Got e ir e ra tamilangnag e thin riyul’ u murung’agen Jesus. *—2 Timothy 3:16.
U lan e bin migid e article e gad ra weliy e fulweg u boch e deer u murung’agen Jesus u lan e Bible. I yog ni faanra nge yog e yafas ngodad ma ba t’uf ni nge ‘michan’dad ngak.’ (John 3:16) Gamad be pi’ e athamgil ngom ni ngam fal’eg i yaliy e pi fulweg n’ey mag dugliy u lanin’um ko ga baadag ni ka ga ra fil boch murung’agen Jesus ma ga maruweliy e michan’ rom ngak.
[Footnote]
^ Ra ga baadag ni ngkum nang boch, mag guy e Guruy ni 2, ni kenggin e “Bible e Ba Ke Babyor ni Yib Rok Got” ni bay ko fare ke babyor ni Mang e Ri be Fil e Bible? ni ke ngongliy e Pi Mich Rok Jehovah.