Ngongol ni Kireb e Ra Chuw ni Gubin!

KE PI’ Got e Thin rok ngodad ni ir e be weliy fan ni ma rin’ e girdi’ e kireb. Ki pi’ e puf rogon ngodad ma ki sunmiydad nrayog ni ngaud t’ared lanin’dad u boch ban’en. Aram fan nrayog ni ngad mel’eged ndab da rin’ed e tin nib kireb. (Deuteronomy 30:15, 16, 19) Ere rayog ni ngad gayed rogon ngad nanged e pi n’en nra waliydad ni ngad lemnaged ara da rin’ed e tin nib kireb, ma gad guy rogon nge chuw. Faan gad ra palog ko kireb, ma aram e gad ra felfelan’, miki felfelan’ e girdi’ u toobdad.​—Psalm 1:1.

Demtrug gelngin ni gad ma guy rogon ndab kud rin’ed e kireb ma ka be gafgow e fayleng ni bochan e kireb ni be rin’ boch e girdi’. Be ginangdad e Bible ni gaar: “Mu ta’ fanam i yan ko re bugithin ney! Tin tomren e rran e ri bay mo’maw’ ni ngan par nrogon e  tin riyul’ ni girdien Kristus.” Be weliy e n’en ni be ‘mo’maw’nag’ e par ko tin tomren e rran ni gaar: “Bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wan’rad; ma bay ur dake yad be liyor ngak Got, machane bay ra pied keru’rad nga gelngin. Mu tiyem u urel rok e pi girdi’ nem.”​—2 Timothy 3:1-5.

Sana kam guy fare bugithin ni “tin tomren e rran” ko fare thin nu Bible aray u lang. Mang fan e re thin nem u wan’um? Faan yira gaar, “tin tomren e rran” ma aram e be dag ni bay ban’en ni bayi mus. Mang e re n’em? Mu tay fanam i yan ko n’en ni ke micheg Got ko Thin rok.

Piin nib kireb e yira chuwegrad.

“Dab ki n’uw nap’an me yan e piin nib kireb nga bayang; ra mu gayiyrad, ma dab mu piriegrad; machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”​—PSALM 37:10, 11.

“Ma yoror rok urngin e piin nib t’uf rorad, machane ra thang e pogofan rok urngin e piin nib kireb.”​—PSALM 145:20.

Ra tal e gafgow ni yibe tay ko girdi’.

“Piin ni gafgow e yad ra wenig ngak ni nge ayuwegrad ko gafgow ni ke yib ngorad ma ra chuwegrad u fithik’, ma ku er i tay e piin ni gafgow ni dabi siy ni ngan ayuwegrad ma kan pagrad nda ni ayuwegrad. Ma chuwegrad u fithik’ urngin mit e gafgow nib gel ni yibe tay ngorad.”​—PSALM 72:12, 14.

“Aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.”​—ROMA 8:21.

Yira pi’ e tin nib t’uf ko girdi’ nge gaman.

“Bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak. I Somol ni Gubin ma Rayog Rok e ke micheg e pi n’ey.”​—MIKAH 4:4.

“Bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed. Girdi’ rog e bayi n’uw nap’rad ni bod e gek’iy. Pi n’en ni kar muruwliyed e ri bayi fel’ rogorad riy.”​—ISAIAH 65:21, 22.

Ra par e tin nib mat’aw.

“Gimed be finey ma dabi turguy Got e tin ni ir e mmat’aw nra fel’ rogon e tirok e girdi’ riy ni piin ni yad be wenig ngak ni rran nge nep’. . . ? Nggog ngomed nra turguy ni nge ayuwegrad me rin’ ni papey.”​—LUKE 18:7, 8.

“Somol e ba t’uf rok e tin nib mat’aw, ma der ma pag e piin ni yad ba yul’yul’ ngak, ni aram girdien; ma yoror rorad ni gubin ngiyal’.”​—PSALM 37:28.

Tin nib mat’aw e ra yan nga luwan e ngongol ni fel’ngak.

“Yad gubin ma bay fin ra nanged ko mang e ba mat’aw.”​—ISAIAH 26:9.

“Bay sum e bin nib beech e lan e lang nge bin nib beech e fayleng, ni aram e tin nib mat’aw e  ngongol e bay i par riy, ni ereray e pi n’en ni gadad be sonnag.”​—2 PETER 3:13.

Chiney e Be Thil e Girdi’

Dariy e maruwar riy ni gad ra felfelan’ ko fapi n’en ni kan micheg. Machane, mang e mich riy nra lebug? Aram e n’en ni gad be guy e ngiyal’ ney. Mang e re n’em? Bokum milyon e girdi’ u fayleng e ke yog ni ngar paged e ngongol ni fel’ngak, nge ngongol nde yalen, nge cham ma kar filed rogon ni ngar pared ni yad ba yul’yul’, ma yad ba gapas, ma kar manged girdi’ nib gol. Pi Mich Rok Jehovah e ngiyal’ ney ni ke pag medlip e milyon urngirad e yad ba ulung i walag nib thilthil e nam rorad, nge yalen rorad, nge thin rorad, nge am rorad, nge rarogon e par rorad. Ma gad manang ni aram e pi n’en ni i k’aring e fanenikan, nge cham, nge mali’ girdi’ ni kab kafram i yib. Ere bochan e pi n’ey, ma rayog ni nge pagan’dad nra lebug e tin ni ke micheg Got.

Mang e ke rin’ ma ke yog ni nge thil e pi girdi’ ney? Fulweg riy e bay u reb e yiiy ni yoloy Isaiah ni profet ni gaar:

“Pi gamanman ni wolf nge saf e bay ur pired nib fel’ thilrad, ma gamanman ni leopard e bay ra paged yad nga but’ u fithik’ pifak e kaming. Pifak e garbaw nge pifak e layon e bay ur abichgad u taabang, ma bbitir ni kab achig e bay i pow’iyrad. . . . Pi layon e bay ur kayed kenggin e grain ni bod e garbaw. Mus ko bitir ni kab achig ndabi buch ban’en rok ni faanra i fafel nib chugur ngak ba porchoyog ni bay e yub u l’ugun. Zion nib thothup ni aram fare burey rok Got e ra par ndariy e kireb riy ara ban’en nra maad’ad ngak be’. Ma girdi’ ko nam e ri bayi tamilangan’rad u murung’agen Somol ni bod rogon lan e yungi day nib sug ko day.”​—Isaiah 11:6-9.

Re n’ey e kemus ni be weliy murung’agen ba ngiyal’ nra par e gamanman nge girdi’ u taabang u fithik’ e gapas, fa? Danga’, ya ku bay ban’en ni be yog. Mu tay fanam i yan riy nu  tungun e re verse ney e be gaar: “Girdi’ ko nam e ri bayi tamilangan’rad u murung’agen Somol.” Ere gur, tamilangan’ rok Got e ir e ra thilyeg e ngongol ko gamanman? Danga’. Machane rayog ni nge thilyeg e ngongol ko girdi’! Re yiiy ney e be tamilangnag ni piin ni ur ngongolgad ni bod e gamanman e yad ra thil ngar ngongolgad ni bod Kristus ni bochan e kar filed ma kar folgad ko thin nu Bible.

Mu lemnag e n’en ni buch ku Pedro. * I lemnag ni be cham ni fan ko tin nib mat’aw u nap’an ni un nga reb e ulung ko terrorist. Tomuren ni kan mu’ i skulnag, ma aram mi nog ngak ni nge yan i bilig ba naun ni ma par e polis riy. Ka be fal’eg rogon mi nib ni kol nga nin’ nga kalbus ni 18 e pul. Yugu aram rogon ma de thilyeg e ngongol rok. Ma nap’an ni bay u kalbus me tabab e ppin rok ko fol Bible ni yad e Pi Mich Rok Jehovah. Ma faan ni pag Pedro u kalbus miki un ko fol Bible, ma n’en ni fil u murung’agen Jehovah e ayuweg ni nge thilyeg e ngongol rok. I gaar: “Gu be pining e magar ngak Jehovah nda gu li’ be’ ko pi duw ni baaram ni ug moy ni gag reb e terrorist. Chiney e gu be fanay fa gi sayden ni aram e Bible ni ke pi’ Got u daken gelngin nib thothup gu be weliy ngak e girdi’ murung’agen e bin riyul’ e gapas nge tin nib mat’aw ni aram fare thin nib fel’ ni murung’agen Gil’ilungun Got.” Ma yan Pedro ko fare naun ni i  guy rogon ni nge bilig ni nge weliy murung’agen e gapas nge reb e fayleng ndariy e cham riy.

Gelngin e Thin rok Got ni be thilyeg e yafas ko girdi’ e ku be tamilangnag fan ni nge michan’dad ko tin ni ke micheg Got ni aram e ra chuw urngin e ngongol ni kireb. Arrogon, ra boch nga m’on ma dab ki rin’ e girdi’ e tin nib kireb ni manemus ya yad ra thil ngar manged girdi’ nib fel’. Dab ki n’uw nap’an me chuweg Jehovah e en tabolngin e kireb ni aram Satan ni Moonyan’, ni ir e be gagiyegnag e fayleng. Be gaar e Bible: “Tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Machane dabki n’uw nap’an min thang Satan nge piin dubrad ni ngar thilyeged e ngongol rorad. Rra fel’ e par ko ngiyal’ nem!

Mang e thingari rin’ be’ me yog e re flaab ney ngak? Dab mu pagtalin ni ‘tamilangan’ u murung’agen’ Jehovah e ir e rayog ni nge thilyeg e ngongol ko girdi’ e ngiyal’ ney, maku aram e n’en nra thilyeg rarogon e fayleng boch nga m’on. Faan ga ra fil e Bible ma ga fol ko thin riy ni bod Pedro, ma rayog ni ngam athapeg ni ngam par u reb e fayleng ni “tin nib mat’aw e ngongol e bay i par riy.” (2 Peter 3:13) Ere gamad be pi’ e athamgil nga lanin’um ni ngam fil murung’agen Got nge Jesus Kristus e chiney ni ka bay e tayim riy, ya aram e n’en nra yognag e yafas ni manemus ngom.​—John 17:3.

[Footnote]

[Picture on page 9]

Rayog ni ngam athapeg ni ngam par u reb e fayleng ni “tin nib mat’aw e ngongol e bay i par riy.”​—2 PETER 3:13