Dariy ba ken e babyor ni ke ngongliy barba’ e teliw ni bod rogon e Bible. Dariy ba ken e babyor ni kan ngongliy ni ke yag ni nge gagiyegnag rogon e michan’ rok boor e girdi’ ni kab kakrom i yib ni bod rogon e re ke babyor ney. Maku reb e, dariy ba ken e babyor ni kan fal’eg i fil ma yibe gay murung’agen ni aray rogon.

Bod ni, bay boch e girdi’ ni llowan’ ni be maruwar u wan’rad e yu ke Bible ni bay e ngiyal’ ney ni bochan e yad be lemnag nib thil ko tin nni yoloy nth’abi som’on. Bay reb e sensey u reb e skul nib tolang ni ma fil ko girdi’ murung’agen e teliw ni yog ni gaar: “Dabiyog ni ngar da micheged nib puluw rogon ni kan pilyeg e thin ko tin som’on e babyor ko Bible. Yu ken ni baaray e Bible ni bay rodad e ngiyal’ ney e boor e oloboch riy, ya boor e chibog nga tomuren nni yoloy e tin som’on e babyor ko Bible mfin nni ngongliy. Ere, rib gel e thil riy ko tin som’on e babyor ko Bible nni yoloy.”

Ku bay boch e girdi’ ni be maruwar e Bible u wan’rad ni bochan e teliw rorad. Faizal e ir be’ ni ilal u reb e tabinaw ni yad ma un nga barba’ e teliw ndarur rogned ni yad boch e Kristiano. Ere, i fil chon e tabinaw rok ngak ni Bible e ba ke babyor nib thothup machane ke thil ko ken ni kakrom. I yog ni gaar: “Bochan e re n’ey, ma aram fan nder ma pagan’ug ni nggu non ngak e piin ni yad baadag ni ngar weliyed murung’agen e Bible ngog. Bin riyul’ riy e, dariy e ken th’abi som’on e Bible rorad. Ya Bible ni bay rorad e ke thil!”

Gur, rib ga’ fan ko ke thil e Bible fa dawor? Am lemnag e pi deer ni baaray: Rayog ni nge pagan’um ko pi n’en ni kan micheg u Bible u murung’agen e par rodad boch nga m’on ni faanra dam nang ko rriyul’ ni immoy e pi thin nem u lan e tin th’abi som’on e babyor ko Bible, fa? (Roma 15:4) Gur, ra um fol ko pi kenggin e motochiyel nu Bible u nap’an ni ngam dugliy boch ban’en ni bay rogon ko maruwel ni ga ma un ngay, nge tabinaw rom, nge liyor ni ga ma tay ni faanra pi Bible ni bay e ngiyal’ ney e boor e oloboch riy?

Yugu aram rogon ndakuriy e tin th’abi som’on e babyor ko Bible nni yoloy kakrom, machane rayog ni ngad sulod ngad yaliyed boch e babyor ni un abweg e thin ko pi babyor ko Bible ney ngay kakrom. Pi babyor ney e kub muun ngay yu yang e babyor ni un abweg e pi thin ko Bible ngay kakrom ni un yoloy nga paay. Uw rogon ni ke yag ni nge magey e yungi babyor ney nde wod nge m’ay? Ma uw rogon ni ke yag ni nge par ke mada’ ko ngiyal’ ney ni yugu aram rogon ni immoy boch e girdi’ ni ur guyed rogon ni ngar kirebnaged e Bible, ma boch e yad be guy rogon ni ngar thilyeged e thin riy? Uw rogon nrayog ni nge ayuwegem e pi n’ey ni nge pagan’um ko Bible ni bay rodad e ngiyal’ ney? Mu fal’eg i yaliy e fulweg ko pi deer ney ko tin migid e article.