Pachangakaŵapa m’yilambo ya kungopoko lyuŵa kwa Africa yikwayidwe ni chimbungo chamachili chakolanjidwa kuti Freddy. Chelechi chili chimbungo chachatendekwe kwandaŵi jelewu kulekangana ni mbungo sya munyumamu. Chakundanda kwa mwesi wa Febuluwale 2023, mbungoji jili jitandite jajonasile yilambo yinesoni. Pa Febuluwale 21, 2023, chajonasile yindu ku Madagascar soni kaneko chapitile mchigawo chine cha nyasa jekulungwa ja Indian. Pali pamasile masiku chimbungochi chayiche ku Mozambique soni ku Malawi. Pa Malichi 11, 2023 chimbungochi chapitilisye kula machili mnope mwamti chawujilesoni ku Mozambique. Madela gejinji ga ku Madagascar, Malawi soni Mozambique gakwayidwe ni chimbungochi. M’madelaga, mbungo soni wula jamachili yitendekasisye kuti mesi gasewuchile mwamti nyumba sya ŵandu sijonasiche. Yakuyichisya yakwe ŵandu ŵakupunda 500 awile, kupwatikapo abale ni alongo ŵetu ŵajinji. Mwamti ŵandu masawusande gejinji atisile mnyumba syawo.

Pakwikanaga pa Disemba 27, 2023, tupochele yiŵalanjilo yakuyichisyayi. Lipotili lili lyakudalilichika soni lityochele kwa abale ŵa m’yilamboyi. Nambope yiŵalanjiloyi komboleka kuŵa yakulekangana. Tukuŵecheta yeleyi ligongo lyakuti abale akuwungunyape m’madela gagali gakusawusya kwawulako.

Madagascar

• Abale ni alongo 256 soni ŵandu ŵane atilile mmalo gane ga mchilambochi

• Nyumba syakwana 8 sigumwiche

• Nyumba syakwana 29 sijonasiche

• Nyumba sya Uchimwene sitatu sijonasiche

Malawi

• Yachanasa yili yakuti abale ni alongo ŵakwana 8 awile, soni ŵane 6 ngakuwoneka mpaka apano

• Abale ni alongo ŵatatu awulele

• Abale ni alongo 4,300 soni ŵandu ŵane akombwele kutilila mmalo gane

• Nyumba syakwana 821 sigumwiche

• Nyumba syakwana 174 sijonasiche

• Nyumba sya Uchimwene syakwana 20 sijonasiche

Mozambique

• Yachanasa yili yakuti jwamboni jumo juwile, soni jwine jumo ngajukuwoneka

• Abale ni alongo ŵakwana 880 soni ŵandu ŵane atilile mmalo gane

• Nyumba syakwana 248 sigumwiche

• Nyumba syakwana 185 sijonasiche

• Nyumba sya Uchimwene syakwana 7 sijonasiche

• Mpaka apano yili yakusawusya kwawula ku madela gane kwele chimbungochi chijonasile mnope

• Makomiti Gakamuchisya Pasitendekwe Ngosi gakukamuchisya kwapatila ŵandu malo gambone gakutama, yakulya, mesi soni yindu yine kwa ŵandu ŵakwayidwe ni chimbungochi

• M’dela ja Gaza ku Mozambique, kwalinganyidwe kampu jakuti abale ni alongo ŵakwana 167 yalumo ni maŵasa ŵaŵatamaga ku Malo ga Msongano kuti akatameje ku kampuko mwakwembecheya. Abale ni alongo ŵanesoni ŵajinji akutama m’Nyumba sya Uchimwene soni sya ŵandu ŵane ŵa m’delaji

• Nyumba syangapunda 16 silinganyidwe kala

• Abale ŵa mu komiti ja nyambi, ŵakulolela madela soni achakulungwa ŵa mumpingo akwendela maŵasa gagakwayidwe kuti amanyilile yakusosechela nambosoni kwalimbikasya

Atamose kuti akusimana ni yakusawusyayi, abale ni alongoŵa akupitilisya kutenda misongano nambosoni kulimbikasyana naga yili yakomboleka. Ngatukukayichila kuti Yehofa chiŵape machili “gakupunda ga ŵandu” kuti gakamuchisye kuŵa ŵakupilila.—2 Akolinto 4:7.