Kalakala, Mlungu ŵakamulicisyaga masengo ŵakulamula kuti ŵakulupusyeje ŵandu ŵakwe ku yindu yangali cilungamo. (Oweruza 2:18) Baibulo jikusasala kuti Lisiku Lyakulamula liciŵa ndaŵi jakusangalasya jele Yehofa, jwali Jwakulamula jwa cilambo cosope, cacakulupusya ŵandu ku yindu yangali cilungamo.—Aŵalanje Salimo 96:12, 13; Yesaya 26:9.

Mlungu asagwile Yesu kuti calamule ŵandu ŵacijumi ni ŵawe ŵakwe. (Masengo 10:42; 17:31) Ŵandu ŵajinji ŵawile ali ngakummanyilila Mlungu. Mkati mwa Lisiku Lyakulamula, Yesu cacajimusya ŵandu ŵeleŵa ni cakulinga cakuti ammanyilile, soni kumnonyela Mlungu.—Aŵalanje Masengo 24:15.

Ŵawe cacajimusya mkati mwa yaka 1,000. (Ciunukuko 20:4, 12) Jemanjaji cacisosekwa kulijiganya yakwamba Mlungu ni kumpikanilaga. Mwakulekangana ni yakusaŵeceta ŵandu ŵajinji, Baibulo jikusasala kuti ŵandu ŵawe cacilamulwa pakujigalila yacacitendaga panyuma pakwimuka kuŵawe.—Aŵalanje Aloma 6:7.

Baibulo jikusasalasoni ya lisiku lyakulamula lyaliciyika mwakusisimucisya yaka 1,000 mkaniyiyice. Lisiku lyelelyo likusamanyikasoni kuti mbesi. Ngani syandanda sya m’magasini ajino sisasile yakwamba lisikuli. Pa lisiku lyelelyo Mlungu cacatyosya ŵandu wosope ŵakusakala. (2 Petulo 3:7) M’yoyo, tukusosekwa kulolecesya kuti tuŵe paunasi wambone ni Mlungu.—Aŵalanje 2 Petulo 3:9, 13.