Ŵa Mboni sya Yehofa akusamanyika cenene ligongo lya masengo gawo gakulalicila pelanguka. Nambo, ana akumanyililasoni kuti akwete pologalamu ja lijiganyo lya Baibulo lyatukusatenda ni ŵandu pacilambo cosope?

Mu 2014, ŵa Mboni ciŵandika 8,000,000 m’yilambo yakwana 240 ŵatendesyaga majiganyo ga Baibulo gakupunda 9,500,000 mwesi uliwose. * Yeleyi yikulosya kuti ciŵalanjo ca ŵandu ŵatukusalijiganya nawo Baibulo cikutupa kupunda ciŵalanjo ca ŵandu m’yilambo yakwana 140.

Kuti masengoga gakombolece, ŵa Mboni sya Yehofa caka cilicose akusakoposya Mabaibulo, mabuku, magasini, soni mabuku gakulijiganyila Baibulo ciŵandika 1 biliyoni ni litika m’yiŵeceto yakwana 700. Mabuku gagakusakopokaga gakusakamucisya ŵandu kuti alijiganyeje Baibulo m’ciŵeceto cakusaka.

Ana lijiganyo lya Baibulo likusatendekwa catuli?

Tukusajigala ngani sya m’Baibulo kaneko tukusalola malemba m’Baibulo gakamulana ni nganisyo. Mwambone, Baibulo jikusajanga yiwusyo mpela yakuti, Ana Mlungu ali ŵani? Ana jwalakwe ali jwatuli? Ana akwete lina? Ana akusatama kwapi? Ana mpaka yikombolece kum’ŵandicila? Cakusawusya cili kupata m’Baibulo palili lilemba lyalikwanga ciwusyoco.

Pakusaka kwakamucisya ŵandu kupata kwanga kwa yiwusyo, tukusakamulicisya masengo buku ja mapeji 224 jakuti Ana Baibulo Jikusajiganya Cici Kusyesyene? * Bukuji ŵajipanganyisye pakusaka kwakamucisya ŵandu kupikanicisya cenene yijiganyo yandanda ya m’Baibulo. Yeleyi yikupwatikapo yakwamba Mlungu, Yesu Klistu, yipwetesi ya ŵandu, kwimuka ku ŵawe, lipopelo ni ngani sine syejinji.

 Ana lijiganyo lya Baibulo likusatendecela kwapi, soni ndaŵici?

Lijiganyoli likusatendekwa pandaŵi ni malo gakusaka wawojo.

Ana tukusalijiganya kwa maawala galingwa?

Ŵandu ŵajinji akusalijiganyaga kwa awala jimo kapena kupunda cijuma cilicose. Nambo ndaŵiji tukusacenga mwakamulana ni mwayiŵelele yindu. Ŵane akusalijiganya kwa maminisi 10 kapena 15 cijuma cilicose.

Ana akusasosekwa kulipila mbiya silingwa pa majiganyoga?

Majiganyoga soni mabuku gakulijiganyila yili yalulele. Yeleyi yikamulana ni yiŵasalile Yesu ŵakumkuya ŵakwe kuti, “Mwapocele mwalulele, m’yoyo kapelecenisoni mwalulele.”—Matayo 10:8.

Ana majiganyoga gakusajigala ndaŵi jelewu catuli?

Mpaka aŵe ali mkulijiganya kwa ndaŵi jakusaka. Buku jakuti Ana Baibulo Jikusajiganya Cici Kusyesyene? jikwete mitwe 19. Mpaka amalisye kulijiganya majiganyoga mwakamulana ni lipesa lyakwete.

Ana cinjisosekwa kuŵa jwa Mboni sya Yehofa pacinjimalisya kulijiganyaku?

Iyayi. Tukusamanyilila kuti mundu jwalijose akwete ukoto wakusagula yakusaka kuyikulupilila. Nambope ŵandu ŵalijiganyisye soni kujimanyilila cenene Baibulo, mpaka asagule jika yakutenda mwalunda.

 Ana mpaka ndende cici kuti nalijiganye yejinji?

Webusayiti ja jw.org/yao jikusasala yikulupi ya ŵa Mboni sya Yehofa, soni yakusatenda.

Ana mpaka mbende catuli lijiganyo lya Baibulo?

• Mpaka aŵende lijiganyoli kupitila pa Webusayiti jetu ja www.jw.org/yao.

•  

• Aŵecetane ni ŵa Mboni sya Yehofa ŵali pakuŵandika. Kapena ŵawungunye pakulola maloŵe gakuti “Mboni sya Yehofa” m’buku ja manambala ga mafoni.