“JWAMKONGWE.” Yesu ndaŵi sine ŵakamulicisyaga masengo maloŵe gelega pakumkolanga mundu jwakulekangana najo yiŵalo. Mwambone, paŵamposyaga mundu jwine juŵaliji jwampindice mgongo kwa yaka 18, jwalakwe jwatite, “Jwamkongwe, mgopwece ku ulemwa wenu.” (Luk. 13:10-13) Mundaŵi ja m’Baibulo maloŵega galiji gakucimbicisya. Yesu ŵakamulicisyesoni masengo maloŵega pakwakolanga mama ŵakwe. (Yoh. 19:26; 20:13) Nambo papali maloŵe gane gagaliji gakupunda pakucimbicisya.

Baibulo jikusakamulicisya masengo maloŵe gane gakulosya cinonyelo soni kuganicisya pakusala ya acakongwe ŵane. Yesu ŵakamulicisye masengo maloŵega paŵaŵecetaga ni jwamkongwe jwine juŵalwasile ulwele wakwasa miyasi kwa yaka 12. Yaŵatesile jwamkongweju pakwawula kuŵaliji Yesu yaliji yangakamulana ni Cilamusi ca Mlungu, ligongo Cilamusico casalaga kuti mundu jwakulwala ulwele welewo nganaŵaga jwamswela. Jwalakwejo ŵasosekwaga kutama kwajika ligongo lya ulwele wakwewo. (Lev. 15:19-27) Nambope jwalakwe ŵaliji ali asingalilwe. Sonitu, ‘ŵalasile kwa madokotala gejinji gagalinjilile kumposya, mpaka ŵajonasile cipanje cakwe cosope, nambo nganapola kose, m’malomwakwe ulwelewo wakulilagakulilagape.’—Maliko 5:25, 26.

Jwamkongweju ŵajesile mwagwala m’likuga lya ŵandu ni kwika kunyuma kwa Yesu, kaneko ŵakwayiye lujenje lwa cakuwala cakwe cakusa. Ndaŵi jijojo ulwele wakwe wula wamasile. Jwalakwe ŵaganisyaga kuti Yesu ngamanyilila yeleyi, nambo Yesu ŵawusisye kuti, ‘Ŵani ŵangwayiye?’ (Luk. 8:45-47) Jwamkongwejo juŵaliji ali mkutenda woga soni kutetemela ŵatindiŵele pameso pa Yesu ‘ni kumsalila yisyesyene yosope.’—Maliko 5:33.

Pakusaka kumtamika mtima pasi jwamkongwejo, Yesu mwacinonyelo ŵamsalile kuti, “Mkadandawula mwanangu.” (Mat. 9:22) Mwakamulana ni yakusasala acinamatetule ŵa Baibulo, maloŵe ga Cihebeli soni ga Cigiliki gaŵagagopolele kuti “mwanangu” mpaka gakamulicisidwe masengo pakusaka kulosya ‘cinonyelo soni kuganicisya.’ Yesu ŵajendelecele kumlimbikasya jwalakwe mwakumsalila kuti, “Cikulupi cenu cimposisye. Mjawule mwamtendele, soni ulwele wenu wekulungwawo umasile.”—Maliko 5:34.

“Mwanangu.” Bowasi juŵaliji jwamlume jwakusicila mnope ku Yisalayeli ŵasasile maloŵe gelega pakumkolanga Lute jwa ku Mowabu. Nombe najo Lute ŵakwete magongo gakumtendekasya kulipikana kuŵa jwangali mate ligongo ŵawululaga mu mgunda wa mundu jwanganammanyililaga. Bowasi ŵasasile kuti, “Mpikane, mwanangu.” Jwalakwe ŵamlimbikasisye Lute kuti ajendelecele kuwulula mu mgunda mwakwe. Lute ŵatindiŵele mpaka ngope jakwe pasi pameso pa Bowasi ni kum’wusya ligongo lyakwe atesile yindu yambone cati m’yoyo kwa jwalakwe, mundu jwakuti ali mlendo. Bowasi ŵajanjile mwakumlimbikasya kuti, ‘Mbikene yosope yamwatendele akwegwe ŵenu [jwamkongwe jwamasije Naomi] . . . Yehofa ampe majali pa yosope yamtesile.’—Rute 2:8-12.

Yesu soni Bowasi ali yisyasyo yambone kwa acakulungwa ŵa mumpingo. Ndaŵi sine, acakulungwa ŵa mumpingo ŵaŵili mpaka amjendele mlongo jwakusosecela cikamucisyo ca m’Malemba soni kumlimbikasya. Panyuma pakuŵenda cikamucisyo kwa Yehofa soni kupikanila mwakusamala yakusala mlongojo, acakulungwa ŵa mumpingowo mpaka amlimbikasye soni kumtondoya pakamulicisya masengo Maloŵe ga Mlungu.—Alo. 15:4.