LYAKULEMBA pa September 1, 1919, kwacele cenene soni kwaŵasile lyuŵa panyuma pakuti masiku gejinji mkaniliyice lisikuli kwatendaga mbungo soni kwanyaga wula. Musi wa lisikuli, ŵandu ŵangakwana 1,000 ŵasongene pamalo gakutendela msongano gaŵakwanaga ŵandu 2,500 ku Cedar Point, Ohio, m’cilambo ca United States. Cakumagulo kwa lisikuli, ŵandu ŵane ŵakupunda 2,000 ŵayice kumaloko pamaboti, pamagalimoto soni pasitima syapamkuli. Lyaŵili, kwaliji ŵandu ŵajinji mwati msonganowo watendecele kusa pasi pa yitela.

Lilanguka lya lyuŵa lyapitaga m’masamba soni yiwulili ya masambago yawonecelaga pa yakuwala ya abale. Yisoti ya alongo yagwedanyikaga ni kambungo kakutyocela mu nyasa ja Erie. M’bale jwine ŵasasile kuti, “Malo gatwatendelaga msonganogo galiji gakusalala mnope soni gamtendele. Abale ni alongo ŵaliji pampepe mwakutalikangana ni ŵandu ŵakucilamboci. Yaliji mpela kuti ali m’paladaiso.”

Atamose kuti malogo galiji gakusalala, nambo ngope syakusangalala sya ŵandu ŵaŵasimanikwe pa msonganowu syawonekaga syakusalala mnope kupunda malogo. Nyusipepala jine jasasile kuti, “Ŵandu wosope ŵawonekaga kuti ali ŵakulipeleka mnope ku dini jawo soni ŵaliji ŵakusangalala.” Ŵakulijiganya Baibulo ŵasangalele mnope kuŵa pampepe ni abale ŵawo pandaŵiji panyuma pakusimana ni yakusawusya yejinji. Yaka yamunyumamo, Ŵakulijiganya Baibuloŵa ŵalasile mnope ligongo lya ngondo, ungakamulana wa ŵandu m’mipingo, kuwugalidwa kwa beteli ja ku Brooklyn, soni kutaŵigwa kwa abale ni alongo ŵajinji ligongo lya Ucimwene, kupwatikapo abale ŵakulongolela ŵakwana 8 ŵaŵalamwile kuti akatame kundende kwa yaka 20. *

Ligongo lyakutenguka ni yayatendekweyi, Ŵakulijiganya Baibulo ŵane ŵalesile kulalicila. Nambope papali ŵane ŵajinji ŵaŵajendelecele kamula masengoga atamose kuti ŵasimanaga ni yakusawusya. Mundu jwine jwakuwungunya yindu ŵasasile kuti Ŵakulijiganya Baibulo ŵaŵaŵecetene nawo ŵasasile mwakulimba mtima kuti ‘cajendelecele kulalicila maloŵe ga Mlungu mpaka kumbesi’ atamose kuti ŵajogoyaga mnope.

Kwandaŵi josope jele Ŵakulijiganya Baibulo ŵakulupicika ŵasimanaga ni yakulingwa, ‘ŵayiwonaga kuti Ambuje akwalongolela, . . . ŵapopelaga ndaŵi syosope kuti Atati ŵalongoleleje.’ Sambano jemanji ŵaliji ŵakusangalala kusimana pamsonganowu ku Cedar Point. Ŵandu ŵajinji nganamanyililaga yampaka atende kuti akombole konjecesya yakutenda pamasengo gakulalicila soni kugakamula mwadongosolo. Nambope, jemanjaji  ŵaliji ŵakusacilila mnope kamula masengo gakulalicilaga.

Kwa cijuma cosope ŵandu ŵaŵasimanikwe pamsonganowo ŵasimongaga ni maloŵe gakuti “GA” gagaliji pa pologalamu ja msongano, tumakadi twakwapocelela ŵandu soni yikwangwani yayaliji pamalopo. Lyamsano, M’bale Joseph F. Rutherford ŵasalile ŵandu ŵakwana 6,000 ŵaŵasongenewo kuti maloŵe gakuti “GA” gajimilaga magasini jasambano jakamulicisya masengo mu undumetume jakolanjikwa The Golden Age. *

Pakusala ya Aklistu ŵasagulwe acimjakwe, M’bale Rutherford ŵatite, “Atamose kuti ŵasimanaga ni yakusawusya nambo ligongo lyakuti ŵakwete cikulupi ŵajiweni ndaŵi japajika ja ulamusi wa Mesiya. . . . Jemanjaji akusawuwona kuŵa upile wawo kwasalila ŵandu wosope ya kwika kwa ndaŵi japajikaji. Jeleji jili mbali ja masengo gawo gaŵapele Mlungu.”

Magasini ja The Golden Age jajasalaga ya usyesyene, cembeceyo, soni cikulupi jakamucisye pakutandisya litala lyasambano lyakuwandicisya usyesyene lyalili kulalicila ku nyumba ni nyumba. Paŵawusisye kuti ŵani mwa ŵandu ŵaŵaliji pamsonganopo ŵaŵasakaga kamula masengoga, wosope ŵajimi mwakusangalala. Kaneko, “mwakusangalala soni mwamacili,” jemanjajo ŵajimbile nyimbo jakuti, “Ambuje, atumisye lilanguka soni usyesyene wawo.” M’bale Norris ŵasasile kuti, “Wosope ŵajimbile mwakwesya maloŵe mwati yawonekaga mpela kuti yitela yikugwedanyika.”

Panyuma pa msongano, wosope ŵajimi pamsele ni kulembesya kuti apoceleje magasiniji. Ŵandu ŵajinji ŵapikene mumtima mpela muŵapikanile Mlongo Mabel Philbrick juŵatite, “Yaliji yakusangalasya mnope kumanyilila kuti citukolesoni masengo gakuti tutendeje.”

Ŵakulijiganya Baibulo ciŵandika 7,000 ŵaliji ŵakoseka kamula masengoga. Cipepala cakusala mwacigajendeleje masengo gakulalicila soni kabuku kakuti Kwa Ŵandu Ŵaŵapele Masengoga yasasile yindu yakuyicisyayi: Ku likulu catamilikasye Dipatimenti ja Undumetume jasambano jacijilongoleleje masengo gakulalicila. Mumpingo akusosekwa kutamilikasya Komiti ja Undumetume soni kusagula jwakulongolela jwacasaleje yakusosekwa kutenda. Akusosekwa kugaŵa mikuli jakulalicila kuti umo ukoleje nyumba kutandila 150 mpaka 200. Lyamcece lililyose ligulo kutendekweje Msongano wa Undumetume kuti abale asaleje yasimene nayo mu undumetume soni kupeleka malipoti.

M’bale Herman Philbrick ŵasasile kuti, “Patwawujile kunyumba syetu, wosope twakamwile mwamtawu masengo gakwasalila ŵandu kuti alembesye kuti apoceleje magasiniji.” Ŵandu ŵajinji ŵaŵasimanaga nawo ŵapikanilaga mwalung’wanu. Mlongo Beulah Covey ŵasasile kuti, “Yikuwoneka kuti panyuma pa ngondo soni yakusawusya yejinji, jwalijose ŵaliji jwakusangalala kupikana ya ndaŵi jele yakusawusya yosope ya ŵandu yicimala soni jwalijose cacikola umi wambone.” M’bale Arthur Claus ŵalembile kuti, “Mpingo wosope wasimonjile mnope kulola kuti ŵandu ŵajinji ŵalembesye kuti apoceleje magasiniji.” Pajamalaga miyesi jiŵili cikopocele magasini ja The Golden Age, Ŵakulijiganya Baibulo ŵaliji ali agaŵile magasini gamajinji, soni ŵandu ŵakupunda 50,000 ŵalembesye kuti apoceleje magasiniji.

M’bale A. H. Macmillan ŵasasile kuti likuga lya Mlungu lyakamulicisye masengo ngani jakuti “Ngani syambone syakwamba ya Ucimwene” jajaliji mu Sanja ja Mlonda ja July 1, 1920 pakusaka kwalimbikasya kandanda abale ni alongo kuti akamuleje masengo gakulalicila ya Ucimwene wa Mlungu. Nganijo jalimbikasisye Aklistu ŵasagulwe kuti “ajenesye kwa ŵandu wosope kuti ucimwene wakwinani uŵandicile.” Moŵa agano, Abale ŵa Klistu “ŵaŵapele masengoga” pampepe ni ŵangondolo sine akukamula masengo gakulalicilaga mwamtawu pakwembeceya ndaŵi jakusangalasya ja Ucimwene wa Mesiya.