YAMPAKA YAKAMUCHISYE ŴAWILILWE
Yindu Yakamuchisya Mnope Kwa Ŵawililwe
NDAŴI SYEJINJI ŴANDU AŴELE ALI MKUWUNGUNYA MWAKUSAPIKANILA MUNDU PAWILILWE. Nambope mpela mwatuyiwonele kala, yakusasala ŵalijiganye panganiji, yili yakamulana ni lunda lwa m’Baibulo. Yeleyi yikulosya kuti lunda lwa m’Baibulo luli lwakamuchisya ndaŵi syosope. Nambosoni yajikusasala Baibulo yili yakamuchisya mnope kwa jwalijose. Jikusasala yindu yanganituŵa tuyipatile kulikose, yampaka yalimbikasye mnope ŵandu mlongo mjawo pawile.
-
Jikusatusimichisya kuti ŵakunonyelwa ŵetu ŵaŵajasiche ngakulagasika
Palilemba lya Jwakulalichila 9:5, Baibulo jikusasala kuti, “Ŵawe, ŵangamanyilila chilichose.” Nambosoni jikusasala kuti ‘yakuganisya mumtima mwawo yikusamala.’ (Salimo 146:4) Mwakamulana ni yeleyi Baibulo jikusawanichisya kuti chiwa chili mpela lugono.—Yohane 11:11.
-
Jikusatulimbikasya kuti kumkulupilila mnope Mlungu kuli kwakutamika mtima pasi
Pa lilemba lya Salimo 34:15, Baibulo jikusasala kuti, “Meso ga Yehofa * gali pa ŵandu ŵakulungama, soni mawiwi gakwe gakusapikana kugumila kwawo kwakuŵenda chikamuchisyo.” Kumsalila Mlungu mwatukupikanila mumtima kupitila mulipopelo kuli kwakamuchisya mnope kulekangana ni kumsalila mundu jwalijose. Kutenda yeleyi kukusatukamuchisya kuŵa paunasi ni Mlungu, jwakusatutamika mtima pasi mwakutupa machili.
-
Jikusatupa chembecheyo chambone chamsogolo
Aganichisye ndaŵi jele wosope ŵali m’malembe chachijimuka ni kolasoni umi pachilambo chapasichi. Baibulo jikusaŵecheta mwakuwilisyawilisya pakwamba ya ndaŵi jeleji. Pakulondesya mwayichiŵela yindu pandaŵijo, Baibulo jikusasala kuti Mlungu “chachipukuta misosi josope mmeso [mwetu], soni chiwa ngasichipagwasoni. Ngasipapagwasoni kulila, kuwuwula kapena kupikana kupweteka.”—Chiwunukuko 21:3, 4.
Ŵandu ŵajinji ŵakusamkulupilila Yehofa, jwali msyene Baibulo, akusalimbikasidwa pakumanyilila kuti chachawonasoni ŵakunonyelwa ŵawo ŵaŵajasiche. Mwachisyasyo, Ann juŵawililwe ŵamkwakwe ŵa yaka 65 jwatite, “Baibulo jikusanimbikasya kumanyilila kuti achamlongo achimjetu ŵaŵajasiche ngakulagasika, soni kuti Mlungu chachajimusya wosope ŵakwakumbuchila. Ndaŵi jilijose ngusakumbucila maloŵega pandandite kuganichisya ya chiwa cha ŵamkwangu. Yeleyi yikusangamuchisya kupilila chindu chakusawusya mnope changanisimaneje nacho paumi wangu.”
Tiina jwatumkolasile mungani sine sila jwatite, “Paŵagambile kwasika ŵamkwangu Che Timo, Yehofa aŵele ali mkungamuchisya. Nawuweni mkono wa Yehofa wuli mkungamuchisya pandaŵi jakusawusyaji. Soni yajikusasala Baibulo pakwamba ya kwimuka kwa ŵawe, nayiweni kuti yili yisyesyene. Yeleyi yikusalimbikasya pangwembecheya kwawonasoni ŵamkwangu ali umi.”
Yaŵaŵechete ŵanduyi yili yakulandana ni yakusaŵecheta ŵandu ŵajinji ŵakusakulupilila kuti Baibulo jikusasala yisyesyene. Naga akusakayichila yajikusasala Baibulo, akusosekwa kuwungunya umboni wampaka wakamuchisye kusimichisya kuti Baibulo jikusasala yindu yakamuchisya soni kuti yilanga yakwe yili yisyesyene. Pambesi pakwe chachipikanichisya kuti Baibulo jili jakamuchisya mnope kwa ŵawililwe.
MPAKA AMANYILILE YEJINJI PAKWAMBA YAKWIMUKA KU ŴAWE
Alolele mafidiyo gakwamba yeleyi pa webusayiti ja jw.org/yao Ajawule pasi pamtwe wakuti MABUKU >MAFIDIYO
Baibulo jikusasala kuti msogolomu achimjetu ŵaŵajasiche chachijimuka ni kutamaga nawosoni.
Ana chikusatendekwa chichi mundu pawile? Yajikusasala Baibulo panganiji yili yakutondoya soni yakulimbikasya
Ajawule pasi pa mtwe wakuti MABUKU >MAFIDIYO (Mafidiyo Gosope: BAIBULO > Yajikusajiganya Baibulo)
ANA MPAKA ASACHE KUPIKANA NGANI SYAMBONE?
Pachilambopa patupile ngani syakusakala, ana ni kwapi kwampaka tupate ngani syambone? Fidiyoji jikusala ya kabuku ka Ngani Syambone Kutyochela kwa Mlungu!
Ajawule pasi pamtwe wakuti MABUKU >MAFIDIYO (Mafidiyo Gosope: Misongano ni Undumetume Wetu >Yakamulichisya Masengo Pakulalichila)
^ ndime 7 Baibulo jikusasala kuti lina lya Mlungu lili Yehofa.
