Ligongo lyakuti Yesu jwaliji jwamlama, nganasimanaga ni yakusawusya mpela yaŵasimanaga nayo ŵandu ŵane. Nambope atamose yili myoyo jwalakwe jwatendelaga chanasa ŵandu. Yesu jwakombolaga kuleka yaŵatendaga pakusaka kuti ŵakamuchisye ŵandu ŵane, mwamti ndaŵi sine ŵatendaga yejinji kupunda yaŵasosekwaga kutenda. Jwalakwe jwatendaga yosopeyi ligongo lyakwatendela chanasa ŵandu. Yisyasyo yine yikusimanikwa mu Mtwe 32, 37, 57, 19.

Ŵandu ŵakulekangana misingu ŵaliji ŵagopoka kukunguluka ni Yesu ligongo lyakuti jwalakwe nganaŵa jwakupoka, soni nganaliwonaga kuti ali jwapenani kwapunda ŵane. Ligongo lyakuti Yesu jwatendaga chidwi ni ŵandu, yakamuchisyaga kuti ŵanduwo aŵeje ŵagopoka pali najo. Kuti alole muŵatendelaga ni ŵandu, aŵalanje Mtwe 25, 27, 95.

Ndaŵi syosope Yesu jwapopelaga kwa atati ŵakwe. Jwalakwe jwatendaga yeleyi pali pajika soni pali ni ŵakumkuya ŵakwe ŵakulupichika. Yesu jwapopelaga pa yakutendekwa yejinji, ngaŵape pa yakulya. Jwapopelagasoni pakusaka kwayamichila Atati ŵakwe, kwalumba, soni kuti amkamuchisye mkanasagule yindu yakusosekwa mnope. Alole yisyasyo yine mu Mtwe 24, 34, 91, 122, 123.

Yesu ndaŵi sine nganapumulaga soni kunguluka pakusaka kuti ŵakamuchisye ŵandu ŵane. Jwalakwe nganatendaga yindu mwakulinonyela. Jwaŵikaga yakusaka ya ŵane pa malo gandanda. Yesu ali chisyasyo chambone mnope chatukusosekwa kujigalila. Aŵalanje Mtwe 19, 41, 52, kuti alole yaŵatendaga Yesu pakusaka kulosya ndamoji.

Yesu nganagambaga kwiganya yakuti ŵandu akusosekwa kwakululuchila ŵane. Jwalakwe jwalosisyesoni ndamoji paŵatendaga yindu ni ŵakumkuya ŵakwe soni ŵandu ŵane. Aganichisye ya yisyasyo yayikusimanikwa pa Mtwe 26, 40, 64, 85, 131.

Baibulo jasasile mkanipaŵe kuti Ayuda ŵajinji tachimkana Mesiya soni kuti achim’magongo ŵakwe tachimwulaga. Nambotu yeleyi nganiyimtendekasya Yesu kuwujila munyuma pangani jwakwakamuchisya ŵandu. M’malo mwakwe jwalipeleche mnope pakutamilikasya kulambila kwakuwona. Jwalakwe jwapeleche chisyasyo chambone kwa ŵakumkuya ŵakwe cha kulipeleka atamose patindene nganisyo kapena kulagasidwa. Alole Mtwe 16, 72, 103.

Yesu jwaliji jwakulekangana ni ŵandu ŵangali umlama m’matala gejinji. Mwachisyasyo ŵalekanganaga pakamanyilile kakwe ka yindu soni lunda. Mwangakayichila yeleyi yamkamuchisye jwalakwe kukombola kutenda yindu chenene kulekangana ni jwalijose. Nambope, mwakulinandiya jwatumichilaga ŵane. Mpaka alole yeleyi mu Mtwe 10, 62, 94, 116.

Yesu jwaliji jwakuwusimana mtima paŵatendaga yindu ni ŵandumetume ŵakwe soni ŵandu ŵane. Ŵatendaga yeleyi atamose palepele kusyasya chisyasyo chakwe soni kulepela kukamulichisya masengo yaŵajiganyaga. Mwakuwusimana mtima ŵapitilisyaga kwasalila yaŵasosekwaga kutenda kuti aŵe paunasi wakulimba ni Yehofa. Kuti alole yaŵatendaga Yesu pakusaka kulosya ndamoji, aŵalanje Mtwe 74, 98, 118, 135.