Michelle: Mliwuli Sophia? Sangalele kuti namsimene lelo.

Sophia: Unesoni sangalele.

Michelle: Lisiku lyanayiche lila, twakambilene mwakusapikanila Mlungu, ŵanduwe patukusimana ni yakusawusya. a Mmwejo mwasasile kuti mama ŵenu paŵagambile kuwulala pa ngosi ja galimoto, mŵele mli mkuliwusya chiwusyo chelechi. Nambo apano, ana mama ŵenu akusimana uli?

Sophia: Pane akusimanaga chenene, pane mpela yigundiche myoyo. Nambo lelo akuwoneka kuti ali chenene.

Michelle: Sangalele kupikana yeleyo. Sikomo kwejinji ligongo lya kulingalinga kwenu pakwasamalila mama ŵenu.

Sophia: Sikomo. Nambope ndaŵi sine ngasaliwusya kuti, ana mamaŵa chaŵepe ali mkulagasika mpaka chakachi?

Michelle: Nganikuŵa kulemwa kuliwusya myoyo mjangu. Paulendo wanayiche ula, namlechele chiwusyo chakuti, “Ligongo chichi Mlungu akundile kuti tulagasicheje atamose kuti jwana machili gakumachisya yakusawusyayi.”

Sophia: Elo, ngukumbuchila.

Michelle: Mkanitujanje chiwusyo chelechi kupitila m’Baibulo, kwende tukambilanesoni mfundo sine sitwakambilene paulendo upite ula.

Sophia: Chambone.

Michelle: Mfundo jimo jaliji jakuti, atamose mundu jwine jwakulupichika jwa m’Baibulo jwaliwusisye kuti ligongo chichi Mlungu akusakunda kuti yakusakala yitendekweje? Nambotu Mlungu nganamkalipila mundujo ligongo lyakuwusya chiwusyo chelechi? Kapena kumsalila kuti “Mmwe ŵangali chikulupi eti?”

Sophia: Mfundo jejila jasangalesye kwabasi.

Michelle: Twalijiganyisyesoni kuti Yehofa Mlungu jwangasangalala pakutuwona tuli mkulaga. Mwachisyasyo, Baibulo jikusasala kuti ŵandu ŵakwe paŵalagasikaga, ‘nombenajo jwalasile pakuyiwona yisawusyo yawo.’ b Yili yakusangalalasya kumanyilila kuti nombenajo Yehofa yikusamkwaya patukusimana ni yakusawusya.

Sophia: Yisyene.

Michelle: Pambesi pakwe, twakambilene mfundo jakuti, ganichisya machili gakwete Mlungu jwetu jwele juŵapanganyisye yindu yosope, kukusatusimichisya kuti jwalakwe mpaka amasye yakusawusya yosope yatukulaga nayo.

Sophia: Ni ligongo lyakwe uneji ngangusapikanichisyatu. Ligongo chichi Mlungu akusakunda yakusawusya yeleyi kuti yitendekweje chitamilecho akwete machili gakumachisya yakusawusya yosope yeneyi?

Michelle: Kuti tupate kwanga kwa chiwusyo chenuchi, kwende tulole yayili m’buku jandanda ja m’Baibulo, Genesesi. Ana mkusajimanyilila ngani ja Adamu ni Hawa soni ya chitela chiŵalekasisye?

Sophia: Elo, ngujimanyilila ngani jeleji, nalijiganyisye ku Sande sukulu. Mlungu ŵasalile kuti akalyaga yisogosi ya m’chitela chinechakwe, nambo jemanjaji nganapikanila mwamti ŵalile.

Michelle: Yisyene yeleyo. Sano kwende tukambilane yayatendekasisye kuti Adamu ni Hawa alemwe. Yayatendekweyo yitukamuchisye kumanyilila ligongo lyakwe ŵanduŵe tukusasimana ni yakusawusya. Ana mpaka mŵalanje pa Genesesi chaputala 3 ndime 1 mpaka 5?

Sophia: Chambone. Pakuti, “Pandaŵi aji lijoka lyaliji lyakalamuka mnope kuyipunda yinyama yosope yiŵayipanganyisye Ambuje Mlungu. Lijoka lyamwusisye jwamkongwe kuti, “Ana yakuwona kuti Mlungu ŵatite mkasimlya chisogosi cha yitela yiliyose mu mgunda muno?” Jwamkongwe ŵajanjile kuti, “Tukomboleka kulya yisogosi ya yitela yiliyose mu mgunda muno, nambo kuleka chitela chachili pasikati pakwe. Mlungu ŵatusalile kuti tukalya yisogosi ya mchitela chelecho, nipo ngatukwenela atamose kuyikwaya, ligongo lyakuti naga tukutenda myoyo, tuchiwa.” Nambo lijokalyo lyamsalile jwamkongwejo kuti, “Iyayi, yeleyo ngaŵa myoyo, kuwa ngasim’wa. Mlungu akumanyilila kuti, pandaŵi jitimchilya yisogosi yeleyi, meso genu tigachiwuguka ni timchiŵa mpela mwaŵelele Mlungujo, timchimanyilila yindu yambone ni yakusakala.”

Michelle: Mŵalasile chenene. Kwende tukambilane panandi ndime syelesi. Myiweni, chandanda lijokali lyaŵechetene ni Hawa. Lilemba line likusalondesya kuti juŵaŵechetaga pelepa kusyesyene jwaliji Satana juŵaŵechetaga kupitila mwa lijoka. c Satana ŵamwusisye Hawa ya lilamusi lya Mlungu lyakwamba chitela chinechakwe. Ana myiweni yaŵatite Mlungu kuti yichitendekwa naga Adamu ni Hawa akulya ya m’chitelachi?

Sophia: Mlungu ŵasalile jemanjaji kuti chachiwa.

Michelle: Yisyene. Nambo kaneko maloŵe gaŵaŵechete Satana galiji gakumjimba magambo Mlungu. Mkukumbuchila yaŵaŵechete jwalakwe, jwatite, “kuwa ngasim’wa.” Pelepatu Satana jwasalaga kuti Mlungu ali jwaunami.

Sophia: Kuli kutanda kupikana yeleyi.

Michelle: Pasosekwa ndaŵi kuti yimanyiche naga yaŵasalaga Satana yakuti Mlungu ali jwaunami yili yisyene kapena iyayi. Ana mkumanyilila ligongo lyakwe?

Sophia: Hmm. Ngangumanyilila.

Michelle: Chambone, nambo kwende tuyiwanichisye yeleyi m’litala ali. Tuwanichisye kuti lisiku line ngumsalila kuti une ngwete machili kumpunda mmwejo. Ana mpaka mtende uli pakusaka kusimichisya naga yangusalayi yisyene kapena iyayi?

Sophia: Mpaka tusosekwe kutenda yineyakwe kuti tusimichisye yeleyo.

Michelle: Yisyene yeleyo. Mwine mpaka tusagule yakunyakula chindu chinechakwe chawusito mnope ni kulola jwampaka akombole kunyakula chinducho. Pelepatu mpaka yiŵe yangasawusya kumasya nganiji.

Sophia: Sambano ngumpikanichisya.

Michelle: Nambi uli yikaŵe kuti namsalile kuti une ndili jwakulupichika kumpunda mmwejo. Ana mpaka yiŵe yakulandana ni ngani ja machili?

Sophia: Mpaka yiŵe yakulekangana.

Michelle: Yisyene yeleyo ligongo ngani jakulupichika jili jakulekangana ni machili janganituŵa tujimasisye mwangasawusya.

Sophia: Yisyene.

Michelle: Ngani jeleji mpaka jimale pali papite ndaŵi jelewu kuti ŵandu ammanyilile jwali jwakulupichika pasikati pa mmwejo ni une.

Sophia: Pelepo ni mbikanichisye.

Michelle: Sambano kwende tuwujilesoni ku ngani jetu ja pa Genesesi jila. Ana pelepa Satana jwasalaga kuti ali jwamachili mnope kumpunda Mlungu?

Sophia: Iyayi.

Michelle: Yikaŵe myoyo Mlungu akamasisye mwangasawusya kuti Satana akulambusya. Mmalomwakwe Satana jwasalaga kuti jwalakwe ali jwakulupichika kumpunda Mlungu. Pelepatu Satana ŵagopolelaga kuti jwalakwejo ni juŵasalaga yisyene nambo Mlungu ni juŵalambusyaga.’

Sophia: O-oo!

Michelle: Pakuŵa Mlungu ali jwalunda, jwalakwe ŵasagwile yakuti papite kaje ndaŵi kuti nganiji jimale. Ŵatesile yeleyi ni chakulinga chakuti ŵandu amanyilile juŵasalaga yisyene pasikati pa jwalakwejo ni Satana.

Sophia: Nambo ana chiwa cha Hawa, nganiwuŵa umboni wakwanila wakulosya kuti Mlungu ni juŵasalaga yisyene?

Michelle: Yisyene waliji umboni wakwanila. Nambo yaŵasasile Satana yakwayiye mbali syejinji. Kwende tulolesoni pa ndime 5. Ana myiweni yindu yinesoni yaŵasasile Satana kwa Hawa?

Sophia: Jwalakwe ŵasalile kuti naga akulya yisogosi ya mchitela chaŵalekasisyecho, meso gawo tigachiwuguka.

Michelle: Yisyene yeleyo, soni jwatite, “Meso genu tigachiwuguka ni timchiŵa mpela mwaŵelele Mlungujo, timchimanyilila yindu yambone ni yakusakala.” Satana pakuŵecheta yeleyi ŵagopolelaga kuti Mlungu ŵajimaga ŵandu yindu yineyakwe yambone.

Sophia: o-oo!

Michelle: Ngani jelejisoni jaliji jekulungwa.

Sophia: Ana pelepo akugopolela chichi?

Michelle: Satana pelepa ŵagopolelaga kuti yindu mpaka yimjendeleje chenene Hawa soni ŵandu ŵane wosope pali pangali ulamusi wa Mlungu. Pangani jelejisoni, Yehofa ŵayiweni kuti litala lyambone lili kumkunda Satana kuti alosye naga yaŵasalagayo yili yisyene. Myoyo Mlungu amkundile Satana kuti alamulile chilambochi kwakandaŵi. Ni ligongo lyakwe pachilambopa pakutendekwa yakusawusya yejinji ligongo Mlungu ngakulamulila chilambochi, chili myala mwa Satana. d Nambo pana ngani jine jakusangalasya.

Sophia: Ngani jamtuli?

Michelle: Baibulo jikusajiganya yindu yakusangalasya yakwamba Mlungu. Chindu chandanda chili chakuti Yehofa ŵangatulekaga jika patukusimana ni yakusawusya. Mwachisyasyo, aganichisye maloŵe ga Mwenye Daudi gagakusimanikwa pa Masalimo 31:7. Daudi jwasimene ni yakusawusya yejinji paumi wakwe. Nambo kwende tulole yaŵasasile jwalakwe paŵapopelaga kwa Mlungu. Ana mpaka mŵalanje?

Sophia: Chambone, pakuti, “Tinjikondwa ni kusangalala ligongo lya chinonyelo chawo changamala, ligongo ŵalakwe ayiweni yisawusyo yangu; ni ayimanyilile yisawusyo yangu kuti yili yekulungwa.”

Michelle: Atamose kuti Daudi jwasimanaga ni yakusawusya nambope kumanyilila kuti Yehofa jwalolaga yosope yaŵasimanaga nayo kwamlimbikasisye mnope. M’wejisoni yikusatulimbikasya mnope patukumanyilila kuti Yehofa akulola yakupweteka yosope yatukusimana nayo atamose kuti ŵandu ŵane nganaŵa ayipikanichisye.

Sophia: Yisyene yili yakulimbikasya.

Michelle: Chindu chaŵili chakusangalasya mnope chili chakuti Mlungu ngasakunda kuti tusimaneje ni yakusawusya mpaka kalakala. Baibulo jikusajiganya kuti pamkaŵapa Mlungu chamasye ulamusi wakusakala wa Satana. Nambosoni chachimasya yakusakala yosope yayikutendekwa kupwatikapo yamkulaga nayo mmwejo soni mama ŵenu. Ana mpaka yichesoni wiki ja malaŵi kuti chinamlosye ligongo lyakwe tukusosekwa kulupilila kuti Mlungu chamasye yakusawusyayi pamkaŵapa? e

Sophia: Ngasimlepela chonde chimusimane.