Nakulile mumsinda wa kulaga mnope wa Montreal. Ndili ngwete miyesi 6 baba ŵawile. Yeleyi yatendekasisye kuti mayi, asamalileje jika liŵasa lyetu. Tupali ŵanache 8 soni uneji ndili jwakumalisya.

Panakulaga natandite kutenda yindu yachiwawa. Sonitu namalilaga ndaŵi jangu ndili mkumwa mitela jakusokonasya mtwe, kuchesa juga soni kunguluka ni ŵandu ŵakogoya. Panaliji ni yaka 10, natandite kwakamuchisya ŵandu ŵakwasimisya mbiya mwakatapila soni ma hule. Nalambusyaga ŵandu kuti atende yindu yangusaka. Yindu yeleyi nayinonyelaga mnope.

Ndili ni yaka 14, naliji namatetule pakwalambusya ŵandu. Mwachisyasyo, nasumaga mawochi, yibangili soni maling’i getaje golidi panandi. Kaneko nayiŵikaga kachimanyilo kakulosya kuti yinduyi ŵayipanganyisye ni golidepe. Najawulaga kumashopu gekulungwakulungwa soni misewu kukusumisya yindu yeleyi mwamti nayisumisyaga mwakudula mnope. Sonitu nasangalalaga ligongo napataga mbiya syejinji mwangasawusya. Lisiku line napatile mbiya syakwana madola 10,000 ga ku Canada.

Ndili ni yaka 15, ŵandopwesye kusukulu janatamaga. Pandaŵiji nasoŵile kwangatame. Kaneko natandite kugona misewu, m’malo mwakusapumulila ŵandu, soni m’nyumba sya achimjangu.

Ligongo lyakuti natendaga yachinyengo, ndaŵi syejinji ŵapolisi ŵangamulaga. Nambope jemanjaji nganandaŵaga ligongo nganisumisyaga katundu jwakwiŵa. Atamose yaliji myoyo, ŵapolisiŵa ŵalamulaga kuti mbeleche mbiya syejinji ligongo lya yindu yanatendagayi. Ligongo lyakuti nganinamjogopaga jwalijose, ŵandu ŵakongosya mbiya mwakatapila ŵandumaga kuti ngajigalile mbiya syawo kwa ŵandu ŵaŵakongwele. Kutenda yeleyi kwaliji kwakogoya mwamti ndaŵi sine najigalaga uti. Sonitu ndaŵi sine najendaga ni yigaŵenga.

Napikene kandanda ya Baibulo ndili ni yaka 17. Pandaŵiji uganja ŵangu ŵatandite kulijiganya Baibulo ni Mboni sya Yehofa. Nambope nganingamulanaga ni yajasalaga Baibulo pangani ja ndamo syatukusosekwa kukola. Myoyo namasisye uganja ni kuja kutama ni msikana jwine jwanalijisoni najo pauganja.

Uganja ŵangu ŵaŵiliwu ŵatanditesoni kulijiganya Baibulo ni Mboni sya Yehofa. Pelepatu yindu yachenjile mnope paumi wangu. Msikanaju jwachenjile yindu yejinji. Natandite kuyiwona kuti akutenda yindu mwakulinandiya soni mwakuwusimana mtima. Myoyo nakundile paŵambilasile kuti njawule kumisongano ja Mboni sya Yehofa. Ŵandu ŵakwe ŵaliji ŵambone soni ŵambochele chenene. Jemanjaji ŵaliji ŵakulekangana ni ŵandu ŵanakungulukaga nawo. Mliŵasa lyanakulile ŵandu ŵakwe ngananonyelaga soni kusamalila chenene. Nambo yaŵatesile ŵa Mboni, pa kumbochela chenene soni kulosya chinonyelo yasangalesye mnope. Ŵa Mboni paŵambendile kuti tulijiganyeje Baibulo, ndaŵi jijojo nakundile.

Yanalijiganyaga m’Baibulo yakulupwisye umi wangu. Pandaŵiji une ni achimjangu ŵaŵili twakamulene kuti tukajiŵe. Nasakaga kupata mbiya syakwana madola 50,000 kuti mbeleche ngongole janakwete panachesaga juga. Nambo ngusasangalala kuti nganijawula nawo kukwiŵa. Nambopetu achimjangu ŵala ŵapite mwamti jwine ŵamkamwile ni kumtaŵa pele jwine ŵamgombele soni jwawile.

Panalijiganyaga Baibulo, nayiweni kuti ngusosekwa kuchenga yindu yejinji. Mwachisyasyo, nalijiganyisye yajikusasala Baibulo pa 1 Akolinto 6:​10. Lilembali likusati, “Ŵakusajiŵa, ŵa umbombo, ŵakusakolelwa, ŵakwasinjilila ŵane kapena ŵali ŵawiyi ngisapochela Uchimwene wa Mlungu.” Ndili mbalasile lilembali nalisile mnope. Ligongo naganichisye yindu yakusakala yambele ndili mkutenda, namanyilile kuti ngusosekwa kuchenga nditu. (Aloma 12:2) Naliji mundu jwakunonyela yachiwawa soni jwaukali. Nanonyelagasoni kwalambusya ŵandu.

Nambope nalijiganyisyesoni kuti Yehofa ali jwachanasa soni jwakululuchila. (Yesaya 1:​18) Namŵendile Yehofa kuti angamuchisye kuchenga. Ni chikamuchisyo chakwe, nakombwele kuchenga ndamo syangu. Chindu chine chakusosekwa chanatesile, chaliji kulembesya ukwati wetu ku boma ni jwamkongwe junatamaga najo jula.

Pandaŵiji naliji ni yaka 24 soni nakwete ŵanache ŵatatu. Myoyo nasosekwaga kupata masengo. Nambope nganingola yipepala yakungunda kukamula masengo ligongo naliji jwangalijiganya. Myoyo napopesile kwa Yehofa. Kaneko napite kukusosa masengo. Nasalilaga mabwana kuti ngusaka kuchenga umi wangu kuti ndendeje yindu mwachilungamo. Nasalilagasoni kuti apano ngulijiganya Baibulo mwamti ngusaka kuŵa mundu jwambone. Nambope jemanjaji nganasakaga kulemba masengo. Kaneko namsalile bwana jwine yindu yakusakala yambele ndili kumtenda. Ni jwalakwe ŵatite, “Ngangumanyilila ligongo lyakwe, nambo ngulipikana kuti ngusosekwa kumlemba masengo.” Nakulupilile kuti pelepa Yehofa ajanjile lipopelo lyangu. Kaneko une ni ŵamkwangu twabatisidwe ni kuŵa ŵa Mboni sya Yehofa.

Ndili chiŵela umi ligongo natandite kukamulichisya masengo yajikusajiganya Baibulo. Ngwete liŵasa lyambone. Ngusamanyililasoni kuti Yehofa ŵangululuchile yakulemwa yangu mwamti ngangusalijimbaga magambo.

Kwa yaka 14 mbele ndili mkulalichila kwa mawola 70 mwesi wuliwose, pakwakamuchisya ŵandu kulijiganya yakwamba Baibulo. Sonitu pachangakaŵapa mbele ndili mkulalichila yimpepe ni ŵamkwangu. Kwa yaka 30 yipiteyi nakamuchisye ŵandu ŵangusakamula nawo masengo ŵakwana 22 kuti atande kutumichila Yehofa. Ngusajawulape kumashopu gekulungwakulungwa, ngaŵa kukutenda yindu yachinyengo mpela mwanatendelaga pandanda. Ngusajawula kweleku kuti ngalalichile ŵandu. Ngusinasalila kuti pachangakaŵapa tuchitama mchilambo chasambano kwele kuchiŵa kwangali kutendelana yindu yachinyengo.​—Salimo 37:10, 11.