Masalimo 37:1-40
-
Ŵandu ŵakumdalila Yehofa yindu yichajendela chenene
Nyimbo ja Daudi.
א [Aleph]
37 Mkatumbilaga* ligongo lya ŵandu ŵakusakalaKapena kwatendela jelasi ŵandu ŵakutenda yachabe.
2 Jemanjajo chachijumula mwachitemachitema mpela manyasi geŵisiSoni chachinyala mpela manyasi gakumela kwene.
ב [Beth]
3 Mumkulupilile Yehofa soni mtendeje yindu yambone.Mtame pachilambo chapasi, soni mtendeje yindu mwakulupichika.
4 Msangalaleje mnope mwa Yehofa,Soni jwalakwe chachimpa yakumbila ya mtima wenu.
ג [Gimel]
5 Mŵiche matala genu mmyala mwa* Yehofa.Mumdalileje, soni jwalakwejo chachimkamuchisya.
6 Jwalakwe chachitendekasya yitendo yenu yakulungama kuŵala mpela kundaŵi,Soni chachitendekasya kuti chilungamo chenu chiŵale mpela kuŵala kwa lyuŵa musi.
ד [Daleth]
7 Mumjembecheyeje Yehofa mwakuwusimana mtima.Mjembecheyeje yachachimtendela jwalakwejo.
Mkatumbilaga pamkumwona munduJwakusalinganyaga yiwembu yindu yili mkumjendela chenene.
ה [He]
8 Mkapyaga mtima soni mleche kutumbila.Mkapyaga mtima, ligongo mpaka yimlongolele kuti mtende yakusakala.
9 Pakuŵa ŵandu ŵakusakala chachajonanga,Nambo ŵandu ŵakumjembecheya Yehofa chachipochela chilambo chapasi.
ו [Waw]
10 Pasigele kandaŵi kamnono, mwamti ŵakusakala ngasawonekasoni.Chimchalolesya paŵatamaga,Nambo ngasasimanikwa.
11 Nambo ŵandu ŵakufasa* chachipochela chilambo chapasi,Soni chachisangalalaga mnope ni mtendele wejinji.
ז [Zayin]
12 Mundu jwakusakala akusamlinganyila chiwembu mundu jwakulungama.Akusammemenela meno jwalakwejo.
13 Nambo Yehofa chachimseka jwalakwejo,Pakuŵa akumanyilila kuti lisiku lyakumalana najo likwika.
ח [Heth]
14 Ŵandu ŵakusakala akusaswekula maupanga* gawo soni kukunga maukunje gawoKuti ŵagwisye ŵandu ŵakulagasika soni ŵakulaga,Kuti ŵasikite ŵandu ŵakusatenda yagoloka.
15 Nambo maupanga gawogo gachisoma mtima wa achimsyenepewo.Maukunje gawogo chachigatemangula.
ט [Teth]
16 Yindu yamnono yakwete mundu jwakulungama yili yamboneKulekangana ni yindu yejinji yakwete ŵandu ŵakusakala.
17 Pakuŵa makono ga ŵandu ŵakusakala chachigatemangula,Nambo Yehofa chachakamuchisya ŵandu ŵakulungama.
י [Yod]
18 Yehofa akumanyilila yindu yakusasimana nayo ŵandu ŵangalemwa,*Mwamti chipanje chawo ngasichimala mpaka kalakala.
19 Jemanjajo ngasatenda sooni pandaŵi jakusawusya.Pandaŵi ja sala, chachikola yakulya yejinji.
כ [Kaph]
20 Nambo ŵakusakala chachijonasika.Adani* ŵa Yehofa chachimala mpela mwagakusanyalila manyasi.Jemanjajo chachisimililika mpela lyosi.
ל [Lamed]
21 Mundu jwakusakala akusajasima nambo jwangawusya.Nambo mundu jwakulungama akusaŵa jwakoloŵa makono* soni jwakupeleka.
22 Ŵandu ŵaŵapele upile Mlungu chachipochela chilambo chapasi,Nambo ŵandu ŵaŵatembelele chachimalana nawo.
מ [Mem]
23 Naga Yehofa akusangalala ni litala lya munduAkusamlongolela* wende wakwe.
24 Jwalakwe mpaka agwe, nambo nganaŵa agwile mpaka kuŵa kwalaa pasi,Pakuŵa Yehofa akusamkamula jwalakwejo mkono* kuti amjimusye.
נ [Nun]
25 Une naliji mwanache nambo apano ngusile,Nambo nganinamwoneje mundu jwakulungama ali amjasile,Kapena ŵanache ŵakwe alimkuŵendaŵenda yakulya.
26 Jwalakwe akusaŵa jwakusachilila kwajasima ŵane yindu yakwe,Soni ŵanache ŵakwe chachipochela upile.
ס [Samekh]
27 Mleche kutenda yakusakala ni kutendaga yambone,Mwamti chimchitama mpaka kalakala.
28 Pakuŵa Yehofa akusanonyela chilungamo,Mwamti ngasiŵajasa ŵandu ŵakwe ŵakulupichika.
ע [Ayin]
Jwalakwe chachachenjelaga jemanjajo ndaŵi syosope.Nambo ŵanache ŵa ŵandu ŵakusakala chachimalana nawo.
29 Ŵakulungama chachipochela chilambo chapasi,Ni chachitamaga mwelemo mpaka kalakala.
פ [Pe]
30 Pakamwa pa mundu jwakulungama pakusaŵecheta yindu yalunda,*Soni lulumi lwakwe lukusaŵecheta yindu yachilungamo.
31 Malamusi ga Mlungu jwakwe gali mumtima mwakwe.Pakwenda, sajo* syakwe ngasisitelesya.
צ [Tsade]
32 Mundu jwakusakala akusamlolechesya mundu jwakulungama,Kusosasosa mpata wakuti amwulajile.
33 Nambo Yehofa ngasamleka jwalakwejo mmyala mwa mundu jwakusakalajo kuti amwulajeKapena kumsimana jwakulungamajo kuti ali jwakulemwa pachachim’welusyaga.
ק [Qoph]
34 Mumjembecheyeje Yehofa soni mkuyeje matala gakwe,Mwamti jwalakwe chachimpa upile wakuti mpochele chilambo chapasi.
Ŵakusakala pachachimalanaga nawo, mmwejo chimchiyiwona yeleyo.
ר [Resh]
35 Une nam’weni mundu jwakusakala soni jwangasaYindu yili mkumjendela chenene mpela chitela chewutalile masamba palitaka lyakwe lyaŵachipandile.
36 Nambo mwakusisimuchisya jwalakwejo ŵawile ni ngawonekasoni.Namsosilesosile, nambo nganinampata.
ש [Shin]
37 Mumlole mundu jwangalemwa,*Soni mumlolechesye mundu jwagoloka.Pakuŵa sogolo ja mundu jwelejo jichiŵa jamtendele.
38 Nambo ŵandu wosope ŵakulemwa chachajonanga.Ŵandu ŵakusakala ngasakola sogolo jilijose.
ת [Taw]
39 Chikulupusyo cha ŵandu ŵakulungama chikusatyochela kwa Yehofa.Jwalakwe ali malo gawo gakulimbangana gakutilila pandaŵi ja yisawusyo.
40 Yehofa chachakamuchisya jemanjajo soni chachakulupusya.
Jwalakwe chachakulupusya jemanjajo mwakwatisya mmyala mwa ŵandu ŵakusakala,Ligongo lyakuti jemanjajo atilile kwa jwalakwejo.
Maloŵe Gamwiŵanda
^ Kapena kuti, “Mkapyaga mtima.”
^ Mu Chihebeli ŵatiga, “Mtule matala genu pa.”
^ Ŵane akusati “kulijinichila.”
^ Upanga ukusawoneka mpela chipula chekulungwa chakutema kosekose.
^ Mu Chihebeli ŵatiga, “akumanyilila masiku ga mundu jwangalemwa.”
^ Ŵane akusati “achimmagongo.”
^ Kapena kuti, “akusaŵa jwakwatendela chanasa ŵane.”
^ Kapena kuti, “Akusalimbisya.”
^ Kapena kuti, “akusamkamula jwalakwejo ni mkono wakwe.”
^ Kapena kuti, “Mundu jwakulungama akusaganichisya yindu yalunda mumtima mwakwe.”
^ Ŵane akusati “makawu.”
^ Kapena kuti, “mundu jwakusatenda yindu mwakulupichika.”
