1. Ino antony araiky mahavy fianakavian̈any Jehovah miray sain̈y?

RAVORAVO atsika fotony an̈isany fianakavian̈any Jehovah. Mihavan̈a tsarabe sady miray sain̈y fianakavian̈a io. An̈isany antony araiky mahavy zen̈y, atsika jiaby mifen̈y han̈aja fahifan̈a napetrakany Jehovah. Hahaihiray sain̈y fo atsika izikoa mazava amintsika ino aby fahifan̈a napetrakany Jehovah.

2. Ino aby fan̈ontanian̈a hivaliantsika amy lahatsoratra ty ato?

² Handiniky momba fahifan̈a napetrakany Jehovah an̈ivony fiangonan̈a atsika amy lahatsoratra ty ato. Ke ty aby fan̈ontanian̈a hivaliantsika: Ino ma anjara asany ranabavy? Izio ma izikoa fa rahalahy efa lohany ranabavy edy? Miran̈a amy fahifan̈a anan̈any lohany fianakavian̈a amy vady amanjanakanany ma fahifan̈a anan̈any antipan̈ahy amy piaramanompo? Alô antsendriky hizahavantsika karakory ma tokony ho fiheverantsika iro ranabavy aby io.

3. Ino raha han̈ampy atsika hampitombo fankasitrahantsika iro ranabavy aby io?

³ Ten̈a valera amintsika iro ranabavy aby io. Miasa mare iro mikarakara fianakavian̈andro, mitory vaovao tsara, ndreky manohan̈a fiangonan̈a. Akory ma fiheverany Jehovah ndreky Jesosy iro io? Akory fomba nitondrasany apostoly Paoly iro man̈angy aby io? Fahaizantsika valinizen̈y han̈ampy atsika hankasitraka mare iro ranabavy aby io.

4. Akory ahitan̈a fa samby valera amy Jehovah aby na lelahy na man̈angy?

⁴ Izikoa Baiboly zahan̈a, valera amy Jehovah aby na lelahy na man̈angy. Ohatra iziô tamy taonjato voanalohany, samby namezany Jehovah fan̈ahy masin̈y aby, na lelahy na man̈angy.  Iro nanjary nahay nivolan̈a tamy fivolan̈ana isankarazany, ndreky nahavita nan̈ano fahagagan̈a. (Asa. 2:1-4, 15-18) Tsy lelahy fo koa olo nifidiny Jehovah hiaraka hanjaka amy Kristy, fa misy viavy koa. (Gal. 3:26-29) Tsy zen̈y fo fa samby afaka man̈anten̈a hiain̈y mandrakizay ambony tany eto aby na lelahy na man̈angy, ary iro samby irahin̈y hitory vaovao tsara ndreky hampianatra Baiboly. (Mat. 28:19, 20; Apok. 7:9, 10, 13-15) Nisy fotoan̈a apostoly Paoly nikoran̈a momba Ranabavy Prisila, vadiny Akoila. Ndray efa haindro roe fivadiany io fa maro raha efa hainy Apolosy momba fahamarin̈ana, nifen̈y fo iro nan̈azava zen̈y taminany tamy fomba marin̈y tsarabe.​—Asa. 18:24-26.

5. Izikoa Lioka 10:38, 39, 42 zahan̈a, akory ahitan̈a fa Jesosy nan̈aja man̈angy?

⁵ Jesosy nan̈aja man̈angy. Iro Fariseo aby io tsy nan̈isy fotiny man̈angy. Iro tsy nety nikoran̈a tamy man̈angy foeky izikoa fa tankilanolo maro. Iro koa tsy nikoran̈a raha momba Soratra Masin̈y tamindro foeky! Fa Jesosy ndraiky tsy karaha zen̈y. Nikoran̈any fahamarin̈ana lalin̈y aby, na lelahy na man̈angy. * (Vakia Lioka 10:38, 39, 42.) Nisy man̈angy koa nimboàny Jesosy niaraka taminany nandeha nitory. (Lioka 8:1-3) Jesosy koa fa nivilominy Zan̈ahary, man̈angy olo nirahiny nivolan̈a zen̈y tamindro apostoly aby io.​—Jaona 20:16-18.

6. Akory nan̈aboahany Paoly fa izy nan̈aja man̈angy?

⁶ Nampirisihiny apostoly Paoly han̈aja man̈angy i Timoty. Nivolan̈a Paoly fa tokony hataony Timoty karaha ‘reny’ iro man̈angy efa matoe aby io, avio iro tsaiky viavy aby io tokony hindesiny karaha ‘anabavy.’ (1 Tim. 5:1, 2) Nifen̈y Paoly nan̈ampy Timoty hanan̈a finoan̈a matanjaka. Ndray zen̈y, nan̈eky izy fa mamany Timoty ndreky dadiny Timoty olo voanalohany nampianatra Timoty hahay Soratra Masin̈y. (2 Tim. 1:5; 3:14, 15) Paoly koa fa nanoratra taratasy handeha tamindro Romanin̈y aby io, izy nanon̈ono an̈aran̈a ranabavy maromaro, salakady nandefa sambitsara amindro. Izy tsy raha nahita ezaka mare nataondro ranabavy io fo fa ten̈a nankasitraka raha nataondro koa.​—Rom. 16:1-4, 6, 12; Fil. 4:3.

7. Ino aby fan̈ontanian̈a hidinihintsika iziô?

⁷ Koran̈iny Baiboly fa valera aby na rahalahy na ranabavy. Hitantsika tamy fehintsoratra aby tio in̈y raha zen̈y. Ny raha misy, iro ranabavy be fitiavan̈a sady tsy matity aby io ten̈a man̈ampy fiangonan̈a. Baka amy fitondranten̈a tsarandro mahavy fiangonan̈a hihavan̈a tsarabe ndreky hiray sain̈y. Ary raha zen̈y haindro antipan̈ahy aby io. Kanefa, nan̈ino ma iro ranabavy aby io nirahiny Jehovah mifôn̈o loha amy fotoan̈a sasany? Baka io rahalahy fo nitindreny Jehovah hanjary antipan̈ahy ndreky pan̈ampy amy fanompoan̈a. Fa zen̈y ma mivolan̈a fa izikoa fa rahalahy efa lohany ranabavy edy? Zen̈y raha hidinihintsika iziô.

8. Mifan̈araka aminy Efesianina 5:23, izio ma izikoa fa rahalahy efa lohany ranabavy edy? Hazavà.

⁸ Karakory marin̈y! Izio ma izikoa fa rahalahy tsy efa lohany ranabavy edy? Aha! Kristy zaraiky fo lohany ranabavy jiaby amy fiangonan̈a ao. (Vakia Efesianina 5:23.) Lelahy manambady manan̈a fahifan̈a amy vadiny. Fa tsaiky lelahy araiky ndray vita batisa, izy tsy manan̈a fahifan̈a amy reniny. (Efes. 6:1, 2) Misy erany koa fahifan̈any antipan̈ahy amy rahalahy ndreky ranabavy. (1 Tes. 5:12; Heb. 13:17) Akory ndraiky ranabavy tsy  manambady? Mila man̈aja ry olobeny fo izy. Kanefa efa tsy ambany fahifan̈any babany eky izy, izikoa efa be ke efa tsy mipetraka amindro. Mila man̈aja antipan̈ahy koa izy. Fa karaha ataony rahalahy jiaby an̈ivony fiangonan̈a, Jesosy zaraiky fo lohany ranabavy tsy manambady.

9. Ino mahavy ranabavy, ndraikindraiky, mila mifôn̈o loha?

⁹ Lelahy namezany Jehovah fahifan̈a hitariky an̈ivony fiangonan̈a, fa tsy man̈angy. (1 Tim. 2:12) Ino antony? Fotony tiany Jehovah hilamin̈y fiangonan̈a. Zen̈y koa nahavy izy nanendry Jesosy hanjary lohany lelahy jiaby. Izikoa ranabavy araiky tsy maintsy man̈ano andraikitry tokony hataony rahalahy, tsy maintsy mifôn̈o loha ranabavy io, fotony zen̈y raha takìny Jehovah. * (1 Kor. 11:4-7) Nan̈ino ma Jehovah man̈iraka ranabavy hifôn̈o loha? Fotony izy tihan̈ambany iro? Tsy zen̈y foeky! Tiany Jehovah haboakandro ranabavy aby io fa man̈aja fahifan̈a napetrany iro. Atsika iziô ndraiky hizaha karakory ma fahifan̈a namezany Jehovah iro lohany fianakavian̈a ndreky iro antipan̈ahy aby io.

10. Ino ma mety mahavy antipan̈ahy araiky tihan̈apetraka fitsipiky harehany fiangonan̈a?

¹⁰ Iro antipan̈ahy aby io tia Kristy, avio tiandro koa ondrikondriky nankin̈iny Jehovah ndreky Jesosy tamindro. (Jaona 21:15-17) Ke iro koa fa mikarakara fiangonan̈a, iro mety hieritreritry ain̈indro mira babanolo jiaby ao. Tsy ratsy sain̈y iro koa man̈ano zen̈y. Lohany fianakavian̈a afaka man̈apetraka fitsipiky hiarovan̈a fianakavian̈anany. Ke mety misy antipan̈ahy mieritreritry fa afaka man̈apetraka  fitsipiky hiarovan̈a ondrikondrikiny Zan̈ahary koa izy. Mety misy piaramanompo foeky mampirisiky antipan̈ahy han̈ano zen̈y. Amy karakory? Tiandro hanapakevitry amy plasindro iro antipan̈ahy aby io. Kanefa, mitovy ma fahifan̈any antipan̈ahy ndreky fahifan̈any lohany fianakavian̈a?

11. Ino aby raha mampitovy andraikitriny lohany fianakavian̈a ndreky niny antipan̈ahy?

¹¹ Izikoa dinihin̈y volan̈any apostoly Paoly, misy raha itovizany hely andraikitriny lohany fianakavian̈a ndreky niny antipan̈ahy. (1 Tim. 3:4, 5) Ohatra iziô, Jehovah mivolan̈a fa izikoa lelahy araiky manambady, mila man̈aja izy vady amanjanakanany fotony izy lohany fianakavian̈a. (Kol. 3:20) Karaha zen̈y koa, Jehovah man̈iraka atsika han̈aja iro antipan̈ahy aby io. Jehovah man̈iraka lohany fianakavian̈a ndreky iro antipan̈ahy aby io, han̈ampy olo ambany fahifan̈andro hihavan̈a tsarabe aminany ndreky hankahery iro. Karaha ataony lohany fianakavian̈a, iro antipan̈ahy aby io mila man̈ampy piaramanompo an̈atiny problemo. (Jak. 2:15-17) Na lohany fianakavian̈a zen̈y na antipan̈ahy, iro samby ampirisihiny Jehovah han̈ampy olo han̈araka lalàn̈any Zan̈ahary ndreky han̈ampy iro ‘tsy hiala amy raha voasoratra’ amy Baiboly ao.​—1 Kor. 4:6.

12-13. Izikoa Romanina 7:2 zahan̈a, ino tsy mampiran̈a andraikitriny lohany fianakavian̈a amy niny antipan̈ahy?

 ¹² Kanefa, misy raha tsy mampitovy andraikitriny antipan̈ahy amy niny lohany fianakavian̈a. Jehovah nanendry antipan̈ahy hanjary pitsara. Izikoa misy olo nan̈ano fahotan̈a maventy kanefa tsy mety mibebaka, antipan̈ahy namezany Jehovah andraikitry han̈adoso olo io tsy ho an̈isany fiangonan̈a. (1 Kor. 5:11-13) Karakory ndraiky lohany fianakavian̈a?

¹³ Misy fahifan̈a namezany Jehovah iro lohany fianakavian̈a aby io, fa tsy namezany iro antipan̈ahy aby io. Ohatra iziô, lohany fianakavian̈a namezany Jehovah fahifan̈a han̈apetraka fitsipiky harehany fianakavian̈anany, ndreky han̈ano raha han̈arehandro fitsipiky aby zen̈y. (Vakia Romanina 7:2.) Izy afaka mivolan̈a amy zanany, kelera zanany io tokony mody koa fa alin̈y. Izikoa zanany tsy man̈araka volan̈anany, izy afaka man̈asazy zanany io. (Efes. 6:1) Mazava ho azy fa lelahy araiky koa be fitiavan̈a, han̈ontany hevitriny vadiny antsendriky izy vo han̈apetraka fitsipiky, fotony iro “nofotro araiky.” *​—Mat. 19:6.

14. a) Koran̈iny Marka 10:45 fa Jehovah nifidy Jesosy ho lohany fiangonan̈a. Nan̈ino ma raha zen̈y pare tsarabe? b) Ino andraikitriny Filankevipitantan̈ana? (Zahava “ Andraikitriny Filankevipitantan̈ana.”)

¹⁴ Jehovah koa fa nan̈amia vidipan̈avotan̈a, nivangainy tamy liony Jesosy aby fahin̈ananolo tsiaraikiaraiky an̈ivony fiangonan̈a ndreky fahin̈ananolo jiaby mbala hino Jesosy. (Vakia Marka 10:45; Asa. 20:28; 1 Kor. 15:21, 22) Jesosy nahafoe ain̈inany han̈avotan̈a atsika, ke rariny izikoa Jehovah nifidy izy ho lohany fiangonan̈a. Jesosy manan̈a fahifan̈a  amintsika, ke izy manan̈a zò han̈apetraka fitsipiky harehanolo jiaby, na olo tsiaraikiaraiky zen̈y na fianakavian̈a na fiangonan̈a. (Gal. 6:2) Manan̈a zò han̈itsy atsika koa izy, izikoa tsy arehantsika fitsipikinazy sasany. Tsy zen̈y fo raha ataony Jesosy fa mikarakara atsika tsiaraikiaraiky koa, fotony atsika io tiany.​—Efes. 5:29.

15-16. Ino ma raha ianaranao baka amy raha nivolan̈iny Marley ndreky Benjamin?

¹⁵ Man̈aja Kristy iro ranabavy aby io izikoa man̈araka taridalan̈andro lelahy voatendry hikarakara iro. Karaha ty ho Ranabavy Marley, mipetraka an Etazonỳ: “Ten̈a raha maventy aminaka andraikitrinaka, na amy tokantran̈o zen̈y na an̈ivony fiangonan̈a. Ke mifen̈y fo zaho han̈aja fahifan̈a napetrakany Jehovah. Tsy sarotro aminaka foeky man̈ano zen̈y, fotony na i ramoseko na iro ranadahy aby io, samby man̈aja zaho ndreky mankasitraka raha ataoko.” Maro ranabavy mitovy hevitry amy Marley zen̈y.

¹⁶ Akory an̈aboahany rahalahy fa mazava aminany tsarabe fahifan̈a napetrakany Jehovah zen̈y? Amy fan̈ajan̈a ranabavy. Karaha ty ho Benjamin, rahalahy baka an Angletera: “Maro raha nianarako baka tamindro ranabavy aby io. Ohatra, lera iro mamaly teny. Misy lera koa koran̈indro aminaka fomba nahitandro vokatra tamy fanompoan̈a. Ilain̈a ankitin̈y iro ranabavy aby io!”

17. Nan̈ino ma atsika tokony han̈aja fahifan̈a napetrakany Jehovah?

¹⁷ Mila mazava aminolo jiaby an̈ivony fiangonan̈a fahifan̈a napetrakany Jehovah, na lelahy zen̈y na man̈angy na lohany fianakavian̈a na antipan̈ahy. Fotony zen̈y hahavy fiangonan̈a hiray sain̈y. Fa ny ten̈a maventy, han̈amia voninahitry Babantsika be fitiavan̈a andan̈itry an̈y raha zen̈y.​—Sal. 150:6.