“Zaho koa fa bebe, raha an̈isany ten̈a nafy taminaka, zaho tihiaraka tamy tsaiky lelahy fa tsy tamy tsaiky man̈angy. Sambarako raha nandalo fo baka izio, kanefa firaka izioty zaho mbala miady mare amy fan̈irian̈a ratsy io fo.”​—David, 23 taon̈o.

 David io Kristianin̈y, ke izy sady tihamparavoravo Zan̈ahary, izy tihiaraka amy lelahy karaha izy koa. Ke mba ho vitany edy ma hamparavoravo Zan̈ahary izikoa karaha zen̈y hataony? Akory fahitany Zan̈ahary lelahy manambady lelahy ndreky man̈angy manambady man̈angy?

•  Ino Raha Koran̈iny Baiboly Momba Zen̈y?

•  Dikanizen̈y ma...?

•  Karakory ndraiky izikoa...?

 Olo mety samby aminy hevitrinany, arakaraka kolontsain̈inany amy raha momba izio. Mety hiovaova koa hevitrinolo, izikoa fa mandeha fotoan̈a. Fa Kristianin̈y ndraiky tsy karaha zen̈y. Iro tsy man̈eky han̈aradrorony ndreky tsy man̈eky ‘afikofikony karazan̈a tsikony fampianaran̈a jiaby io.’ (Efesianina 4:14) Fitsipikiny Baiboly mikasiky lelahy manambady lelahy ndreky man̈angy manambady man̈angy (ndreky fitondranten̈a hafa) fo arehandro.

 Mazava raha koran̈iny Baiboly momba zen̈y. Karaha ty koran̈iny ao:

•  “Aza man̈ano firaisan̈a amy lelahy karaha fan̈anaovan̈a firaisan̈a amy man̈angy.”​—Levitikosy 18:22.

•  “Raha tiany fôndro fo tihataondro. ... Zen̈y dikany nan̈ambilany Zan̈ahary iro han̈araka fan̈irian̈any nofotro man̈isy baraka, fotony man̈angindro niala tamy fomba nan̈anaovany Zan̈ahary iro, ke nanjary nan̈ano raha tsy fatao.​—Romanina 1:24, 26.

•  “Anaro aza man̈eky ankadalainolo: Koa fa olo pijangajanga, panompo sampy, pandiadia vady, lelahy man̈eky andriany lelahy, lelahy manambady lelahy, pangalatra, olo tsy afapo amy raha anan̈any, mamolava, panihitihy, pandrava, tsy handova fanjakan̈any Zan̈ahary lahabiny e.”​—1 Korintianina 6:9, 10.

 Natao ninolo jiaby fitsipikiny Zan̈ahary io, nata lelahy tihanambady lelahy zen̈y nata man̈angy. Ke izikoa misy olo maniry mare han̈ano raha tsy mamparavoravo Zan̈ahary, mila mifehy ain̈inany izy.​—Kolosianina 3:5.

 Baiboly ma mivolan̈a fa mila halantsika iro lelahy manambady lelahy aby io?

 Ehe. Baiboly tsy man̈iraka atsika halain̈y olo, na azovy izy na azovy, nata izy tihanambady lelahy karaha izy na man̈angy karaha izy. Atsika irahiny ‘han̈ano raha hihavan̈ana aminolo jiaby’, na karakory eky fitondranten̈anany. (Hebreo 12:14) Ke tsy mety izikoa atsika mampijaly lelahy manambady lelahy, na tsy ho tia iro io, na ndreky mikafiry iro.

 Tokony hanohitry lalàn̈a man̈omba lelahy hanambady lelahy ma Kristianin̈y?

 Baiboly mivolan̈a fa lelahy araiky ndreky man̈angy araiky fo nataony Zan̈ahary nanjary fivadiany, ke iro roe io fo tokony han̈ano firaisan̈a. (Matio 19:4-6) Fa adihevitry momba lalàn̈a mivolan̈a fa lelahy samy lelahy afaka mifanambady zen̈y resaka politiky fo. (Jaona 18:36) Ke Kristianin̈y tsy manohan̈a sady tsy manohitry lalàn̈any fanjakan̈a momba lelahy manambady lelahy zen̈y.

 Lelahy araiky efa manambady lelahy, mbala afaka miova ma izy?

 Ia. Ohatra, nisy lelahy nan̈ano karaha zen̈y tamy taonjato voanalohany tan̈y, fa iro mbala nahavita niova. Baiboly mivolan̈a fa lelahy manambady lelahy tsy handova Fanjakan̈any Zan̈ahary. Fa ho izy ao koa: ‘Efa karaha zen̈y sasany taminaro taloha.’​—1 Korintianina 6:11.

 Ke dikanizen̈y ma olo araiky koa fa vôly nanambady lelahy, efa tsy man̈iry han̈ano izio eky izy? Ehe. Baiboly mivolan̈a: ‘Sikìna toetry vaovao, fotony arakarakany ahaizanaro ny marin̈y hahavy toetry io hahaivao fo sady hifan̈araka amy toetriny Araiky niasa izio.’ (Kolosianina 3:10) Dikanizen̈y mandeha tsihelihely fiovoan̈a io.

 Akory ndraiky izikoa lelahy araiky tihan̈araka fitsipikiny Zan̈ahary, kanefa izy mbala man̈iry mare hanambady lelahy?

 Olo tsiaraikiaraiky samy afaka mifidy hifehy fan̈irian̈a ratsinany. Akory han̈anaovany zen̈y? Baiboly mivolan̈a: “Mifen̈a fo han̈eky hitaritiny fan̈ahy, amy zen̈y anao tsy han̈atanteraka fan̈irian̈any nofotro foeky.”​—Galatianina 5:16.

 Zahava tsarabe fa andininy io tsy mivolan̈a fa olo tsy han̈ana fan̈irian̈a ratsy foeky. Fa izikoa izy zatra mianatra Baiboly ndreky mivavaka tsy tapaka, ho vitany fo hanohitry fan̈irian̈a aby io.

 Karaha zen̈y David nikoran̈intsika tamy voanalohany tio in̈y. Karaha ty nivolan̈iny, izikoa izy efa baka nikoran̈a problemonany io tamy raimandreninany kristianin̈y: “Nahatsiaro nahivankivan̈a be zay zaho. Haiko karaha in̈y, zaho nikoran̈a tsialohaloha tamindro, otrizay mba efa nilamin̈y tsara sain̈inaka.”

 Mahatsiaro sambatra fo lan̈iany olo man̈araka fitsipikiny Jehovah. Iro matoky fa fitsipikiny Jehovah io ‘mahitsy ndreky mamparavoravo fô’, ke ‘be rady azonolo mitandrin̈y izy.’​—Salamo 19:8, 11.