Mety efa mampiasa tranonkala fifaneraseran̈a aby ry namanao, ke io fo koran̈andrô. Mety adroedroendrô anao fôtony anao mbala tsiary nan̈abian̈a kaonty. Fa ino raha tsara ho hainao? Aviô ino raha tôkony hataonao?

 Tsy anao zaraiky tatran’izen̈y. Maro raimandreny tsy man̈omba zanakandrô hampiasa tranonkala fifaneraseran̈a. Mety haindrô baka fa olo araiky mampiasa izio mety:

•   Ho kivy mare ndreky ho voan’ny aretin̈y mifandray amin’ny aretin-tsain̈y.

•   Mety hahita sary vetaveta, handefa na hahazo mesazy vetaveta, aviô hampijalin’olo an̈atin’izio ao.

•   Tsy hifankahazo amy kamarady.

 Maro tanora nifidy tsy ampiasa tranonkala fifaneraseran̈a eky. Tsapandrô fa voka-dratsin’izio tamindrô bebe tozay hatsaran̈a nazondrô baka tamin’izio. Aleva onon̈o hely baka raha niain̈an’ny tanora aby ty:

•   Tsapan’i Priscilla fa lanin’ny tranonkala fifaneraseran̈a fotoan̈a jiaby tôkony nan̈anaovany raha hafa.

•   Lôso nahita raha tsy mety zahavan̈a Jeremy koa fa nampiasa izio.

•   Hitan’i Bethany fa baka amizio nahavy izy nanjary tsy vôly nieritreritry fiain̈anan’olo.

 “Nadosoko tamy telefaoninaka application aby io. Ravoravo zaho nahavita nan̈ano zen̈y. Zaho tsy ngôma izio foeky! Ravoravo zaho iziôty fôtony zaho lôso misy fotoan̈a an̈anaovako raha farany matomboko aminaka.”​—Sierra.

 “Tranonkala fifaneraseran̈a io man̈andevo ankitin̈y, aviô ndraikindraiky zaho nanjary niasaloha amy raha hivolan̈in’olo momba raha aboakako ao, ke raha zen̈y ten̈a halako. Tsy nora taminaka namono kaontinaka, fa zaho koa fa niala izio, direkty zaho nahatsapa nahivankivan̈a. Ren̈iko nahainilamin-tsain̈y fo zaho koa fa tsisy izio.”​—Kate.

 Areha volan̈an’olobenao. Aboaha irô fa anao matotro ke man̈eky fitsipiky apetrakandrô fa tsy meloko na be tarain̈y.

 Toro lalan̈an’ny Baiboly: ‘Olo adala malaky man̈aboaka heloko, fa olo misy jery ndraiky manan̈a faharetan̈a sady mahafehy ten̈a.’​—Ohabolana 29:11, Fandikan-teny Mora Vakin̈y.

 Misy olo mety han̈amia jery anao hampiasa tranonkala fifaneraseran̈a fa tsy atao hain’olobenao na hamoron̈o kaonty ambadimbadiky an̈y. Diso anao koa man̈ano zen̈y! Izikoa anao mavandy, anao hanjary hiasaloha ndreky hinjehin’ny eritreritry. Tsy zen̈y fo fa anao havozo tsao tatran’iry papanao, ke amy fotoan̈a zen̈y anao hanjary tsy hatokisandrô eky.

 Toro lalan̈an’ny Baiboly: “Zahay mba man̈iry han̈ano ny marin̈y amy raha jiaby.”​—Hebreo 13:18.

 Ataova raha hahavy anao ho resy lahatra. Karaha nataondrô tanora nikoran̈intsika taloha tarỳ in̈y, diniha ino aby antony tsy tôkony hampiasanao tranonkala fifaneraseran̈a. Izikoa mazava tsara aminao nan̈ino izio tsy mahatsara anao, anao ho resy lahatra tsy hampiasa izio, tsy nohon’ny olobenao fo fa baka aminao tômpiny koa. Karaha in̈y, izikoa misy namanao man̈ontany nan̈ino anao tsy hita amizio ao, anao tsy ho men̈amen̈atra. Ke irô tsy han̈adroadro anao eky.

 Fehiny: Areha volan̈an’olobenao, aviô diniha nan̈ino anao tsy tôkony hampiasa tranonkala fifaneraseran̈a, amy zen̈y anao tômpiny foeky resy lahatra fa mety fanapahan-kevitrindrô. Aviô farany, aza adin̈a fa velon̈o fo anao ndray tsy mampiasa tranonkala fifaneraseran̈a.