“Mole Heʼeki Hoko Mai Toku Hola”

Ko te tagata neʼe ina ʼuli te kamio ʼotaʼota pea neʼe mole kei ina lava taki fakalelei ia te kamio. Neʼe ʼalu ai te kamio ki te kauala ʼaē neʼe haʼele ai te hahaʼi, ʼo ina tataʼo ai te taumātuʼa ʼaia pea mo te tagata ʼe taʼu 23. Ohagē ko tona tohi ʼi te sulunale ʼo New York City, neʼe mate atu aipē ia te taumātuʼa pea neʼe pogia ia te tagata tūpulaga. ʼI te temi ʼaē neʼe ōfo ai te tagata tūpulaga ʼaia pea mo sio ki te meʼa ʼaē neʼe hoko, neʼe ʼuluaki manatu fēnei: ‘Mole feala haku tui ki te meʼa ʼaenī neʼe hoko. ʼAtua, fakalelei tou loto, kae ke ke fakahao au.’ Neʼe ina ʼui fēnei: “Mole heʼeki hoko mai toku hola.”

NEʼE kua lagi kotou ʼosi logo ki ni ʼu fakamatala fēia. Kā hao he tahi mai he tuʼutāmaki, ʼe ʼui fēnei e te hahaʼi: ‘Neʼe mole heʼeki hoko mai tona hola,’ kae kā mate he tahi ʼi he fakaʼī, ʼe natou manatu fēnei: ‘Neʼe kua hoko mai tona hola,’ peʼe ‘ ʼe ko te finegalo ʼaia ʼo te ʼAtua.’ Tatau aipē peʼe natou ʼui neʼe kua ʼosi tohi fakatomuʼa ia tona kā haʼu pe neʼe kua tohi e te ʼAtua, kae ʼe natou tui fuli ki he meʼa e tahi. Tokolahi te hahaʼi ʼe natou tui ko te ʼu meʼa ʼaē ʼe hoko ʼi tonatou maʼuli pea mo tona ikuʼaga, kua ʼosi fakatuʼutuʼu fakatomuʼa ia pea ʼe mole feala ke tāʼofi e he tahi ia te hoko ʼo te meʼa ʼaia. ʼE mole fai ia te ʼu palalau ʼaia mokā hoko pē he mate peʼe ko he ʼu fakaʼī; pea ʼe mole ko he manatu foʼou ʼaia.

Ohagē lā ko te kau Papiloni, neʼe natou tui ko te ʼu gāue ʼa te tagata ʼe fakalogo ki te ʼu fetuʼu pea mo tonatou feʼoloʼaki ʼi te lagi. Koia neʼe natou kumi ai mai te lagi he ʼu fakaʼiloga moʼo takitaki nātou. Ko te kau Keleka pea mo te kau Loma neʼe natou ʼatolasioʼi ia te ʼu ʼatua fafine ʼe natou tohi fakatomuʼa te ʼu meʼa ʼaē ʼe hoko ʼi te maʼuli, pea neʼe hagē ʼi te tahi temi, neʼe natou maʼuhiga age ʼi te finegalo ʼo tonatou ʼu ʼatua tāfito, ʼaē ko Zeus pea mo Jupiter, he neʼe feala ki te ʼu ʼatua fafine ʼaia ke natou foaki ia he kā haʼu ʼe lelei peʼe ko he kā haʼu ʼe kovi.

ʼI te Potu ʼEsitē, ko te kau Inituisi pea mo te kau Putisi ʼe natou tui ko te ʼu meʼa ʼaē ʼe hoko ki he tahi ʼi te temi nei, ʼe ko te fua ʼo te meʼa ʼaē neʼe ina fai ʼi te temi muʼa, pea ʼaki tana ʼu gāue ʼi te maʼuli ʼaenī, ʼe ʼiloʼi ai anai te ʼu meʼa ʼaē kā hoko kiā ia ʼi te tahi age maʼuli. Ko te tahi age ʼu lotu, ʼaē ʼe kau kiai te ʼu tuʼuga lotu ʼo te Keletiate, ʼe natou toe tui kiai ʼaki tanatou akonaki ʼaē kua ʼosi fakatuʼutuʼu fakatomuʼa ia meʼa fuli ʼaē ʼe hoko ʼi totatou maʼuli.

Koia ʼe mole fakapunamaʼuli ai māʼiapē lā ʼi totatou temi ʼaē ʼe ʼui ai kua lahi age ia te ʼu meʼa kua tou mālama kiai pea mo tou tui pē ki he ʼu meʼa moʼoni, ʼe kei tui pē ia te hahaʼi tokolahi ko tonatou maʼuli, te ikuʼaga ʼo te ʼu meʼa ʼaē ʼe natou fai ʼi te ʼaho fuli, pea mo te tauʼaga fakaʼosi ʼo tonatou maʼuli kua ʼosi tohi fakatomuʼa ia pea ʼe mole feala hanatou tāʼofi ia te hoko ʼo te ʼu meʼa ʼaia. ʼE ko takotou manatu koa ʼaia ʼo ʼuhiga mo te maʼuli? Ko te ʼu meʼa ʼaē ʼe hoko ʼi te maʼuli, te ʼu fua lelei pea mo te ʼu faihala, māʼiapē lā mo te tupu ake ʼa he tamasiʼi pea mo te mate, ʼe kua ʼosi fakatuʼutuʼu fakatomuʼa koa? ʼE kotou tui koa ki te kua fakatuʼutuʼu fakatomuʼa ʼo tokotou maʼuli? Tou vakaʼi pe lava tokoni feafeaʼi mai ia te Tohi-Tapu moʼo tali ki te ʼu fehuʼi ʼaia.

[Haʼuʼaga ʼo te paki pasina 3]

Ken Murray/New York Daily News