Numbers 36:1-13
-
Law about marriage for women wey go get property from their family (1-13)
36 The family heads of the people from the family line of Gil′e·ad the son of Ma′chir the son of Ma·nas′seh from the families of the sons of Joseph waka come, and talk for front of Moses and the chiefs, the family heads of Israel people.
2 Them talk say: “Jehovah command my lord to use lot share the land as property for Israel people; and Jehovah command my lord to give the property of our brother Ze·lo′phe·had to im daughters.
3 If them marry men from another tribe of Israel, them go still collect the women property from the property of our papa them and add-am to the property of the tribe wey the women marry enter, wey go make us lose part of the property wey be our own.
4 Now when Israel people de do Jubilee, them go still add the women property join the property of the tribe wey them go marry enter, wey go make them collect the women property from the property of the tribe of our papa them.”
5 Then Moses command Israel people as Jehovah command say: “Wetin the tribe of the sons of Joseph de talk dey correct.
6 This one na wetin Jehovah don command about the daughters of Ze·lo′phe·had: ‘Them fit marry anybody wey them want marry. But, make them marry person from the family of the tribe of their papa.
7 Make no property of Israel people move from tribe to tribe, because Israel people must keep the property of the tribe of their papa-papa them.
8 And any daughter wey get property as im own among the tribes of Israel go be the wife of person wey come from im papa tribe, so that Israel people go fit keep the property of their papa-papa them as their own.
9 Make no property move from one tribe to another tribe, because the tribes of Israel must keep their own property.’”
10 The daughters of Ze·lo′phe·had do just as Jehovah don command Moses.
11 So Mah′lah, Tir′zah, Hog′lah, Mil′cah, and Noah, wey be the daughters of Ze·lo′phe·had, marry the sons of their papa brothers.
12 Them come be wives of men from the families of Ma·nas′seh the son of Joseph so that their property go still dey for the tribe of their papa family.
13 This ones na the commandments and the decisions wey Jehovah give Israel people through Moses for the level lands wey dey the desert of Mo′ab near River Jordan for Jer′i·cho.
