Isaiah 39:1-8
-
Messengers from Babylon (1-8)
39 That time, the king of Babylon, Merʹo·dach-balʹa·dan wey be the son of Balʹa·dan, send letters and gift go give Hez·e·kiʹah because e hear say e be de sick and e don well.
2 Hez·e·kiʹah happy as e de welcome them* and show them everything wey dey the house wey e de keep better-better things—the silver, the gold, the balsam oil, and other better oil, all the things wey e de use fight war, and everything wey them fit see for the places wey e de keep im better-better things. E no get anything wey Hez·e·kiʹah no show them for im own house* and for im whole kingdom.
3 After this one, prophet Isaiah come meet King Hez·e·kiʹah and ask-am say: “Wetin this men talk and where them come from?” So Hez·e·kiʹah talk say: “Them come from one far place, from Babylon.”
4 Then e ask-am say: “Wetin them see for your house?”* Hez·e·kiʹah answer-am say: “Them see everything for my house.* E no get anything wey I no show them for the places wey I de keep my better-better things.”
5 Isaiah come tell Hez·e·kiʹah say: “Make you hear the word of Jehovah of armies,
6 ‘See! Time de come when them go carry everything wey dey your house* and everything wey your papa-papa them don keep come reach today, go Babylon. Nothing go remain,’ na so Jehovah talk.
7 ‘And them go carry some of your own sons wey you go born go, and them go come be people wey get high position for the palace of the king of Babylon.’”
8 So Hez·e·kiʹah tell Isaiah say: “The word of Jehovah wey you don tell me so dey good.” Then e still talk say: “Because peace go dey and trouble no go dey* for my own time.”*
