YOOSOMA 17

Yesu Aari Mutthu a Mukhalelo Xeeni?

MURUMIHE

Okathi nniixutta ahu itthu Yesu aahimmye awe ni aapanke awe okathi aari awe valaponi, ninniweha mikhalelo orina awe. Nto eyo enninikhaliherya omwaattamela Tiithi awe, Yehova. Mikhalelo xeeni sikina Yesu orina awe? Ninrowa omutakiha sai Yesu mookumini mwahu?

1. Mwa enamuna xeeni Yesu onlikana awe ni Tiithi awe?

Yesu, aahikhala wiirimu ni Tiithi awe oophenta iyaakha ibilyau sinceene. Nto aahiixutta itthu sinceene. Tivonto, Yesu onnuupuwela, onnipaka itthu ni orina moonelo mmosaru ni Tiithi awe. (Mmusome Yohani 5:19.) Tthiri Yesu aahitakiha moomalela mikhalelo sa Tiithi awe. Tivonto aahimmye wira: “Ole okiwenhe, nave-tho ohaaweha Atiithi”. (Yohani 14:9) Vaavo munrowa anyu wiixuttaka mikhalelo sa Yesu, munrowa otepaka omusuwela Yehova. Mwa ntakiheryo, woona moota Yesu aathokorerya awe atthu, onnooniherya wira Yehova onnookhapelelani.

2. Yesu oonihenrye sai wira onnimphenta Yehova?

Yesu aahimmye so: “Wira olumwenku osuwele wira miyo kinnaaphenta Atiithi, kinniira siisaale Atiithi akirumme aya”. (Yohani 14:31) Okathi aari awe valaponi, Yesu aahooniherya wira onnimphenta vanceene Tiithi awe omwiiwelelaka hata okathi yoole wooxankiha. Ohiya-vo, Yesu aanisiveliwa waaleela atthu akina voohimya sa Tiithi awe ni waakhaliherya okhala apatthani a Muluku.—Yohani 14:23.

3. Yesu oonihenrye sai wira onnaaphenta atthu?

Biibiliya onihimya wira Yesu ‘anona orera okhala vamosá n’atthu’. (Miruku 8:31) Yesu aahooniherya waaphenta atthu aalipihaka ni waakhaliherya. Itthu sootikiniha Yesu aapanke awe, khahiyo sinooniherya owerya orina awe paahi, masi-tho sinnooniherya wira Yesu mutthu oothunku. (Marko 1:40-42) Yesu anaareerela murima atthu otheene ni khaakhalela nthalu. Moolumo a Yesu, yanaamaaliha ni waavaha nlipelelo atthu otheene yaarina murima wooloka yaawo yanwiriyana. Nave Yesu aaheemererya ohaawa ni wiiviwa mwaha woowi onnaaphenta atthu otheene. Masi Yesu onnitepa waaphenta atthu otheene aniiwelela itthu iixuttiha awe.—Mmusome Yohani 15:13, 14.

MWIIXUTTE ITTHU SIKINA

Mwiixutte mikhalelo sikina Yesu orina awe. Nave mmutakihaka Yesu mwaaphenteke atthu ni mukhaleke mutthu oovaha.

4. Yesu onnimphenta Tiithi awe

Ntakiheryo na Yesu, ninniniixuttiha moota nikhanle ahu omphenta Muluku. Mmusome Luka 6:12 ni Yohani 15:10; 17:26. Nuumala osoma khula yoolepa, mwaakhule nikoho ninttharelana:

Nimutakihaka Yesu, ninrowa wooniherya sai wira ninnimphenta Yehova?

Yesu aanimphenta Tiithi awe a wiirimu ni aanilavulana onvekelaka

5. Yesu aanaathokorerya atthu yaaphavela okhaliheriwa

Yesu aanaathokorerya atthu akina ovikana moota iithokorerya awe. Yesu aanirumeela okathi awe ni ikuru sawe wira aakhaliherye atthu akina hata okhulumunwe ene. Mmusome Marko 6:30-44, nuumala-vo, mwaakhule makoho anittharelana:

Mwa inamuna xeeni Yesu oonihenrye awe wira onnaathokorerya atthu?—Nwehe eversiikulu 31, 34, 41, ni 42.
Etthu xeeni yaamwiiriha Yesu waakhaliherya atthu akina?—Nwehe eversiikulu 34.
Okhala wira Yesu onitakiha mikhalelo sa Yehova, mikhalelo iyo siniwiixuttihani exeeni voohimya sa Yehova?
Ninrowa omutakiha sai Yesu moota aathokorerya awe atthu akina?

6. Yesu mutthu oovaha

Yesu, khaarina itthu sinceene, masi hata vaari siiso, owo aanaavaha atthu akina ele aarina awe. Nave Yesu oniphavela wira nikhaleke atthu oovaha. Musome Miteko 20:35, nuumala-vo mwaakhule nikoho ninttharelana:

Moovarihana ni moolumo ala a Yesu, ninrowa okhala sai atthu oohakalala?

Nwehe EVIIDIYU, nuumala-vo mwaakhule nikoho.

EVIIDIYU: “Ovaha onnitepa ohakalaliha”—Eviidiyu yaamukhaani (4:00)

Hata nihirina itthu sinceene, ninrowa okhala sai atthu oovaha?

Nyuwo mwaanisuwela?

Biibiliya onihimya wira nihaana onvekela Yehova mwa nsina na Yesu. (Mmusome Yohani 16:23, 24.) Vaavo hiyo nimpaka ahu eyo, ninnooniherya wira ninnivaha efaita ele Yesu opanke awe wira onikhaliherye okhala apatthani a Yehova.

ATTHU AKINA ANIHIMYA WIRA: “Muluku khoncala mixankiho sahu”.