Silempwale ni Yohani 17:1-26
17 Yesu omalihaka-ru ohimya itthu iya, aahiweha wiirimu, khwiira: “Tiithi, ewoora yoophiya. Munvuwihe mwaninyu, wiira mwaninyu owo oovuwiheni nyuwo,+
2 siisaale munvanhe anyu owerya woowaaruma atthu* ootheene,+ wiira aavahe okumi woohimala+ ootheene ale munvanhe anyu.+
3 Wiira awo aphwanye okumi woohimala,+ ahaana woosuwelani oratteene nyuwo, Muluku mmosa-ru eekeekhai+ ni omusuwela Yesu Kristu, yoowo omurumme anyu.+
4 Miyo kihoovuwihani elapo ela ya vathi+ ni koomaliha muteko waakirumme anyu ovara.+
5 Vano, Tiithi, mukivuwihe vakhiviru vanyu ni ovuwa waarina aka ni nyuwo, olumwenku ohinatthi opattuxiwa.+
6 “Kihaasuweliha nsina nanyu atthu mukivanhe anyu vathi-va.+ Awo yaari awinyu, nyuwo khukivaha, nave awo anneettela* moolumo anyu.
7 Vano aasuwela wiira itthu sootheene mukivanhe anyu, sinikhuma wa nyuwo.
8 Awo aasuwela eyo okhala wiira kihaahimeerya itthu sikilenle anyu.+ Nave anneemererya wiira tthiri miyo kikhumme wa nyuwo+ ni annikupali wiira ti nyuwo mukirumme.+
9 Miyo kinnaavekelela awo. Nkinaavekelela atthu a moolumwenkuni, masi kinaavekelela ale mukivanhe anyu, maana awo tawinyu.
10 Itthu sootheene siri sawaka ti sawinyu, nave sawinyu ti sawaka.+ Siiso, miyo koovuwihiwa eriyari aya.
11 “Miyo kinookhuma moolumwenkuni-mu, masi awo ari moolumwenkuni-mu,+ nave miyo kinnoorwa weiwo muri anyu. Tiithi Oowaarya, xontte mwaakhapelele+ mwaha wa nsina nanyu, nenno mukivanhe anyu, wiira awo akhale oowiiraana, siisaale hiyo niri ahu oowiiraana.+
12 Okathi kaari aka naawo, miyo kaanaakhapelela+ mwaha wa nsina nanyu, nenlo mukivanhe anyu. Miyo kihaakhapelela, nto khuuvo opwetexiwe,+ nnakhala mmosa, ohikhanle paahi ole onrowa opwetexiwa,+ wiira yiiraneye ele elempwale.+
13 Vano, miyo kinnoorwa weiwo muri anyu. Kinilavula itthu iya nlelo kiri ene moolumwenkuni, wiira awo atteeliwe murima vanceene ntoko miyo.+
14 Miyo kihaaleela moolumo anyu, masi olumwenku ola onnaanyokha, okhala wiira awo khaniirela mpantta olumwenku,+ siisaale miyo kihiniirela aka mpantta olumwenku.
15 “Nkinoovekelani wiira mwaakumihe moolumwenkuni-mu, masi wiira mwaakhapeleleke mwaha wa Satana.+
16 Awo khaniirela mpantta olumwenku,+ siisaale miyo kihiniirela aka mpantta olumwenku.+
17 Murumeele nuulumo nanyu wiira mwaakhalihe oowaarya,+ maana nuulumo nanyu ti neekeekhai.+
18 Siisaale mukirumme anyu moolumwenkuni, miyo-tho kihaaruma moolumwenkuni.+
19 Miyo kinnikhala oowaarya mwaha wa yaawo, wiira nave-tho awo akhalihiwe oowaarya ni ekeekhai.
20 “Nkinaavekelela yaala paahi, masi kinnaavekelela-tho ootheene ale anrowa okaamini, nuumala wiiwa ele atthu ala aniixuttiha aya,
21 wiira ootheene aya akhale oowiiraana,+ siisaale nyuwo Tiithi, muri anyu oowiiraana ni miyo, nave-tho miyo kiri aka oowiiraana ni nyuwo.+ Vano, awo animwiiraana ni hiyo, wiira olumwenku okupali wiira ti nyuwo mukirumme.
22 Miyo kihaavaha ovuwa mukivanhe anyu, wiira awo akhale amosa-ru, ntoko hiyo niri ahu mmosa-ru.+
23 Miyo naawo niri oowiiraana. Nyuwo ni miyo niri oowiiraana, wiira awo akhale oowiiraana voomalela. Siiso, olumwenku ola onoosuwela wiira ti nyuwo mukirumme, nave onoosuwela wiira siisaale mukiphentale anyu, nyuwo-tho muhaaphenta atthu awo.
24 Tiithi, kiniphavela wiira ale mukivanhe anyu akhale ni miyo opuro kinrowa aka okhala,+ wiira yoone ovuwa mukivanhe anyu, maana nyuwo mookiphenta olumwenku ohinatthi opattuxiwa.+
25 Tiithi a Xariya, tthiri olumwenku khonoosuwelani,+ masi miyo kinnoosuwelani.+ Nave-tho, atthu ala aasuwela wiira ti nyuwo mukirumme.
26 Miyo kihaasuweliha nsina nanyu, nave kinootepa waasuweliha,+ wiira ophenta onikiphentana anyu okhale naawo, nave-tho miyo kikhale oowiiraana naawo”.+
